Bokosi Ya Mibvundzo
◼ M’mwazi mphangwa mbadzati kuthema toera kubatizwa, pasafunika kumala midzidzi mingasi mbakagumanika pa misonkhano ya mpingo na kucita khundu mu utumiki?
Kubatizwa ndi cisankhulo cakufunika kakamwe cakuti munthu anakwanisa kucicita. Natenepa, munthu mbadzati kuthema toera kubatizwa, iye asafunika kukhala na cidziwiso cakulinganira ca pinthu pinafuna Mulungu kuna iye. Kusiyapo pyenepi, iye asafunika kupangiza kutonga kwace toera kuphatisira midida ya Mulungu.
Akristu asabvera ntemo wakukhonda kusiya kusonkhana pabodzi, natenepa, m’mwazi mphangwa wakukhonda kubatizwa asafunika kukhala waphinga mu kugumanika pa misonkhano ya mpingo. (Aheb. 10:24, 25) Iye asafunikambo kutawira pa misonkhano. Panango, asafunika kulembesa pa Xikola ya Utumiki wa Mulungu, ngakhale kuti nee pisaphembwa.
Nakuti Akristu apaswa basa yakumwaza mphangwa zadidi na kucita anyakupfundza, m’mwazi mphangwa wakukhonda kubatizwa asafunika kucita khundu mu utumiki mwakukhonda phonya mbadzati kubatizwa. (Mat. 24:14; 28:18, 19) Kodi iye asafunika kumala nthanda zingasi mbakamwaza mphangwa mbadzati kubatizwa? Mwandimomwene, iye asafunika kukhala na ndzidzi wakuthema toera apangize kuti ndi waphinga mu utumiki mu nthanda zonsene. (Sal. 78:37) Mbwenye, nee pasafunika kupita ndzidzi wakulapha kutomera pa ndzidzi udatoma iye kumwaza mphangwa mpaka kuthema kubatizwa, panango nthanda zakucepa. Kodi asafunika kupereka midzidzi mingasi ya basa ya m’munda? Nkhabepo miyambo yakukhazikiswa. Akulu a mpingo asafunika kucita mwakulinganira pakudinga makhaliro akuthema a m’mwazi mphangwa m’bodzi na m’bodzi.—Luka 21:1-4.
Akulu a mpingo (peno atumiki akutumikira a m’mipingo yakuti akulu a mpingo ndi akucepa) ale anagumana na anafuna kubatizwa asafunika kukumbuka kuti anthu onsene ndi akusiyana, natenepa asafunika kuona mwadidi pakusankhula munthu toera kubatizwa. Iwo asafunikira kuona khala iye ali na cifuno candimomwene cakukhala m’bodzi wa Mboni za Yahova na kupangiza cilemedzo thangwi ya mwai uli na iye wakukhala mu gulu ya Yahova na kumwaza mphangwa. Akulu asadziwa kuti iye nee akola mwauzimu peno nee ali na maluso a m’mwazi mphangwa wakubatizwa. Khala iye nee athema kubatizwa akulu a mpingo asafunika kundziwisa mwaufuni mu kuphatisira Malemba na kumphedza toera kupitiriza kutambira ciphedzo cauzimu.