Towezerani Citsandzo Ca Aprofeta—Mikeya
1. Ndi mbvundzo upi wakuti panango Mikeya aucita, mphapo thangwi yanji kumwaza kwace mphangwa nee kukhali kwapezi?
1 ‘Kodi kumala kwa makhaliro ano a pinthu kunafika lini?’ Panango mprofeta Mikeya acitambo mbvundzo ubodzi ene mu ndzidzi ukhamwaza iye mphangwa za kutonga kwa Yahova thangwi ya maumambo a Israele na Yuda. Mbwenye basa yakumwaza mphangwa idacita Mikeya nee ikhali yapezi. Mu caka 740 M.N.W., mu ntsiku za Mikeya, mafala a Yahova a kufudzwa kwa Samariya akwanirisika. (Mik. 1:6, 7) Mukupita kwa ndzidzi, Yerusalemu afudzwa mu caka 607 M.N.W. (Mik. 3:12) Tinatowezera tani citsandzo ca Mikeya mu ndzidzi unadikhira ife kutonga kwa Yahova mu ntsiku zathu?
2. Tinapangiza tani kupirira mu ndzidzi unadikhira ife ntsiku ya Yahova, thangwi yanji?
2 Khalani Wakupirira: Mikeya alemba: “Maseze na ipyo, ine ndinakhulupira [Yahova] mpulumusi wanga, Iyembo anadzandibvera.” (Mik. 7:7) Mwandimomwene, Mikeya nee akhakhala kwene basi mbadikhira kumala kufike. Iye apitiriza kuphata basa mwakuwanga ninga mprofeta wa Yahova. Munadikhira ife ntsiku ya Yahova, tisafunikambo kucita khundu ‘m’mabasa a makhaliro akucena na macitiro anapangiza kuperekeka kwa Mulungu.’ (2 Ped. 3:11, 12, Tradução do Novo Mundo) Kupirira kwa Yahova kusapasa anthu ndzidzi toera kutcinyuka. (2 Ped. 3:9) Natenepa, ife tisabvera cenjezo ya Bhibhlya yakutowezera kupirira kwa aprofeta.—Tgo. 5:10.
3. Thangwi yanji tisafunika kuphemba Yahova toera atipase nzimu wace wakucena?
3 Nyindirani Mphambvu Ya Yahova: Ngakhale kuti Mikeya akhali na basa yakunentsa, iye anyindira Yahova toera kuona mphambvu yakucita basa ineyi. (Mik. 3:8) Natenepa, Bhibhlya isatiwangisa toera kuphemba mphambvu ya Mulungu. Iye asapasa mphambvu mwakudzala manja kwa anyakuneta, toera akwanise kucita mabasa awo Acikristu. (Sal. 84:5, 7; Iza. 40:28-31) Musaona pyenepi mu umaso wanu wakutumikira Mulungu? Kodi musaphemba Yahova ndzidzi onsene toera akupaseni ciphedzo ca mphambvu yace ya nzimu wakucena?—Luka 11:13.
4. Umaso wa Mikeya usatipasa citsandzo canji cadidi kakamwe lero?
4 Kucita cifuno ca Mulungu, cikhali cinthu cakufunika kakamwe mu umaso wa Mikeya. Iye akhali wakutonga kupitiriza kukhala wakukhulupirika, maseze akhali pakati pa makhaliro akuipa. Mu njira ibodzi ene, umumphu wathu usayeserwa ntsiku zonsene. Natenepa, tendeni tikhale akutonga kufamba mu dzina ya Yahova Mulungu wathu “kwenda na kwenda.”—Mik. 4:5.