Munadzabandza Mwai? Cikumbuso Cinafuna Kudza Cinatiphedza Toera Kupereka Takhuta
1 Cikumbuso cinafuna kucitwa pa ntsiku 14 ya Bwinja cisatipasa mwai wakupambulika toera kukulisa na kupangiza kupereka takhuta thangwi ya udidi wa Yahova. Lemba ya Luka 17:11-18 isapangiza kuti Yahova na Yezu asapasa ntengo kakamwe kupereka takhuta. Mwakutsukwalisa, mwa anyamatanya khumi adawangiswa, m’bodzi basi ndiye adabandza mwai toera kupereka takhuta. Ntsogolo, muoni wa ciomboli unadzawangisa ntundu onsene wa utenda, na kucitisa anthu kukhala na umaso wakukhonda mala! Mwakukhonda penula, ife tinadzapereka takhuta kuna Yahova ntsiku zonsene thangwi ya nkhombo zenezi. Mphapo, tinapangiza tani kupereka takhuta m’masumana anafuna kudza?2. Tinakulisa tani kupereka kwathu takhuta thangwi ya ciomboli?
2 Kulisani Kupereka Takhuta: Mabvero akupereka takhuta asabulukira m’manyerezero. Toera kutiphedza kukulisa kupereka kwathu takhuta ku ciomboli, ndandanda wakuleri Bhibhlya mu ndzidzi wa Cikumbuso unagumanika mbuto zingasi, ninga mu n’thimiziro B12 wa Tradução do Novo Mundo revisada, n‘Cingerezi, kabukhu Examine as Escrituras Diáriamente, na mu Calendário. Ndiye tani kudinga mphangwa zenezi ninga banja? Kucita pyenepi kunadzathimizira kupereka kwathu takhuta ku ciomboli. Ninga maphindu, pyenepi pinadzakhuya makhaliro athu.—2 Akor. 5:14, 15; 1 Jwau 4:11.
3. Ndi mu njira zipi zakuti tinakwanisa kupangiza kupereka takhuta mu ndzidzi wa Cikumbuso?
3 Pangizani Kupereka Takhuta: Kupereka takhuta kusapangizwa na mabasa. (Akol. 3:15) Nyamatanya adapereka takhuta awangisira toera kugumana Yezu mbapereka takhuta. Mwakukhonda penula, iye alongambo mwakugalamuka kuna anango thangwi ya cirengo cakuwangiswa kwace. (Luka 6:45) Kodi kupereka takhuta thangwi ya ciomboli kunadzatikulumiza toera kucita khundu mwaphinga mu kampanya yakudziwisa Cikumbuso? Upainiya wakuphedza peno kuthimizira utumiki wathu mu ndzidzi wa Cikumbuso ndi njira inango yakupangiza kupereka takhuta. Pa ntsiku ya Cikumbuso, ntima wakupereka takhuta unadzatikulumiza toera kutambira alendo na kuperekeka toera kutawira mibvundzo yawo.
4. Tinabandza tani mwai toera kucita pizinji mu ndzidzi wa Cikumbuso?
4 Kodi Cikumbuso ceneci cinadzakhala cakumalisa? (1 Akor. 11:26) Ife nkhabe kupidziwa. Mbwenye tisadziwa kuti cingapita, wapitambo mwai wathu wakupambulika toera kupereka takhuta. Munadzabandza mwai unoyu? Tisadikhira kuti mafala athu akupereka takhuta na kunyerezera mwacidikhodikho kwa ntima wathu pikomerese Yahova, Ule adatipasa ciomboli mwakudzala manja.—Sal. 19:14.
[Mibvundzo Ya Pfundziro]