Lekani Kudembuka

Kubulukira padaphatanizwa Web site yathu mbitoma kuphata basa, maphembo a mapfundziro a Bhibhlya mu Interneti akuthimizirika kakamwe. Maphembo akuthimizirika asacitwa kubulukira m’masasanyiro akupereka umboni m’mbuto zapakweca. Ofesi ya filiali isatsalakana maphembo anewa mwakukhonda dembuka. Mwacitsandzo, khala phembo yacitwa mu jw.org, akulu a mpingo a mu cisa cinagumanika munthu adapangiza cifuno asatambira tsamba peno mphangwa kubulukira ku ofesi ya filiali mukupita ntsiku ziwiri. Mbwenye mphangwa zinabuluka mu pisa zisapangiza kuti anango adaphemba pfundziro ya Bhibhlya adzati kucedzerwa m’masumana mazinji. Tinacitanji toera kupereka ciphedzo mwakucimbiza cifuno ca munthu mbicidzati kuthowa?​—Mko. 4:14, 15.

Munthu anakhala mu cisa canu angapangiza cifuno, mwakucimbiza lembani formularyo Queira Visitar (S-43) mbamuipereka kuna mulembi wa mpingo wanu pa nsonkhano wanu unafuna kudza. Pa ntsiku ineyi peno nkati mwa ntsiku ziwiri, mulembi asafunika kupereka formularyo ineyi ku mpingo wakuthema, peno kutumiza ku ofesi ya filiali mu kuphatisira njira ya Mpingo toera kupita mu jw.org. Akulu a mpingo asafunika kuona Web site mwakukhonda phonya. Angatambira mphangwa zakuti asafunika kucedzera munthu, iwo asafunika kucita pyenepi mwakucimbiza. M’mwazi mphangwa onsene anaphembwa toera kucedzera munthu, asafunika kuikha pyenepi pa mbuto yakutoma. Khala munthu nee agumanika panyumba, panango munakwanisa kusiya tsamba pabodzi na numero ya ntokodzi wanu na mphangwa zinango.