Towezerani Citsandzo Ca Aprofeta—Nahuni
1. Tisapfundzanji kubulukira m’bukhu ya Nahuni?
1 Madembe a Ninive wakale asapangiza kuti ninga mudalongera mprofeta Nahuni, Yahova asatcinyusa anyamalwa Ace, ngakhale anyamalwa akuwanga kakamwe, nkhabe kwanisa kuthimbana na Iye. (Nah. 1:2, 6) Kudinga mwacidikhodikho profesiya ya Nahuni kunatiphedza toera kukwanirisa utumiki wathu.
2. Tinacitanji toera mphangwa zathu zikhale zakuwangisa?
2 Kupereka Cibalangazo na Cidikhiro: Kwa anango, m’bukhu ya Nahuni musagumanika basi ene mapikiro akufudzwa kwa Ninive, nzinda ukulu wakudzikuza wa dziko ya Asirya wakale. (Nah. 1:1; 3:7) Mbwenye mapikiro anewa akhali mphangwa zadidi kwa mbumba ya Yahova. Dzina ya Nahuni isabveka “Nyakubalangaza,” iye apereka cinyindiro kwa Ayuda andzace cakuti mwakukhonda dembuka anyamalwa awo mbadafudzwa! Nahuni apangizambo kuti Yahova ndi “nkhopswe pa ntsiku za nyatwa.” (Nah. 1:7) Mu ndzidzi unamwaza ife mphangwa, ifembo tisagawira mphangwa zadidi, na kuwangisa anango toera kusaka citsidzikizo kuna Yahova.—Nah. 1:15.
3. Tinakwanisa tani kusangizira Nahuni mu kuphatisira pitsandzo peno misangani?
3 Phatisirani Pitsandzo Na Misangani: Yahova apumira Nahuni toera kulonga kuti kufudzwa kwa Ninive mbakudakhala sawasawa na kwa Teba nzinda wa Ejito wakuti ukhadamala kale kufudzwa na Asirya. (Nah. 3:8-10) Mu ndzidzi unalonga ife na anthu thangwi yakufudzwa kwa makhaliro ano akuipa, tinakwanisa kugomezera maprofesiya a Bhibhlya anapangiza kuti Yahova asakwanirisa mafalace mu unyomonyomo onsene. Mwacitsandzo, pidaenda Ababilonya na a Medya kamenyana na nzinda wa Ninive mu caka 632 M.N.W., madzi akhadabvumba kakamwe mbadzadza nkulo wa Tigre mbukuka, madzi anewa agomola khundu ibodzi ya mpanda wakukhonda pitika wa nzinda. Mwakucimbiza, nzinda wa Ninive wafudzwa ninga mukhadapikira Yahova.—Nah. 1:8; 2:6.
4. Tinakwanisa tani kulonga munjira yakukhonda nentsa kubvesesa mu utumiki?
4 Longani Munjira Yakukhonda Nentsa Kubvesesa: Nahuni alemba mbafokotoza pinthu munjira yakukhuya ntima. Ntsonga zikhalonga iye zikhabveka mwadidi. (Nah. 1:14; 3:1) Munjira ibodzi ene, tisafunika kuphatisira mafala akukhonda nentsa kubvesesa. (1Akor. 14:9) Paulendo wakutoma, fokotozani mwadidi cifuniro ca ulendo wanu. Mu ndzidzi unapfundza imwe Bhibhlya na anthu, aphedzeni toera kukulisa cikhulupiro kwa Yahova na Mafalace, na kubvesesa kuti mphangwa zenezi zisakhuya tani umaso wawo.—Arom. 10:14.
5. Ndi cinyindiro cipi cinagumana ife mu profesiya ya Nahuni?
5 Cinyindiro ca Nahuni cakuti mafala a Yahova asakwanirisika mwakukhonda phonya cisapangizika pakweca m’bukhu ya Bhibhlya inadziwika na dzina yace. Mu ndzidzi wakuti kumala kwa dziko ya Sathani kuli cifupi, ife tisagumana cibalangazo m’mafala awa akupumirwa: ‘Nyatwa nkhabe kuonekabve kaciwiri tayu.’—Nah. 1:9.