Phatisirani jw.org Mu Utumiki Wanu

Web site yathu ndi feramentu yadidi kakamwe toera kutiphedza kumwaza mphangwa zadidi mpaka “ku nkhomo ya madziko onsene.” (Mach. 1:8) Anaciro nyumba azinji nkhabe kwanisa kupita okhene mu jw.org. Mbuto mwace, iwo asadziwa pizinji thangwi ya Web site ineyi angamala kuphedzwa na m’mwazi mphangwa.

Muyang’aniri wa cisa m’bodzi ali na vidyu yakuti Thangwi Yanji Tisafunika Kupfundza Bhibhlya? mu ntokodzi wace wa m’manja, iye asapangiza anthu vidyu ineyi ndzidzi onsene unakhala iye na mwai. Mwacitsandzo, mu utumiki wa nyumba na nyumba, iye asalonga: “Ndikucedza na anthu toera kuaphedza kugumana matawiro a mibvundzo iyi mitatu yakufunika kakamwe: Thangwi yanji dziko yadzala na nyatwa kakamwe? Kodi Mulungu anadzazimalisa tani? Na tinathimbana nazo tani mu ndzidzi uno? Vidyu iyi ya mphindi zingasi isalonga pya mibvundzo ineyi.” Buluka penepo, iye asaliza vidyu mbaona kuti mwanaciro nyumba anakhuyiwa tani. Vidyu ineyi isaphata ntima kakamwe, natenepa, anthu azinji asayang’ana pa ntcini mpaka kumala kwa vidyu. Buluka penepo, muyang’aniri wa cisa asalonga: “Mwabva kuti munakwanisa kuphemba pfundziro ya Bhibhlya mu Interneti. Nakuti ndiri pano, ndinakwanisa kukupangizani mwakucimbiza.” Mwanaciro nyumba angatawira, iye asapangiza pfundziro mu kuphatisira bruxura Mphangwa Zadidi. Khala mwanaciro nyumba nkhabe ndzidzi, iye asacita masasanyiro toera kucita pyenepi paulendo unafuna kudza. Angaenda ku mbuto inaguliswa xaya, iye asalonga mafala mabodzi ene kuna munthu anakhala cifupi na iye pakumala kutomesa makani munjira yadidi. Kodi imwe musaphatisira jw.org mu utumiki wanu?