Kucitisa Mapfundziro a Bhibhlya Mwakuphata Ntima
1. Ndi basa ipi iri na amwazi mphangwa akuti asacitisa mapfundziro a Bhibhlya?
1 Nkhabepo munthu anatumikira Mulungu mwakukhonda ‘kukweiwa’ na Yahova. (Jwau 6:44) Ngakhale tenepo, amwazi mphangwa anacitisa mapfundziro a Bhibhlya asafunika kucita khundu yawo mu kuphedza anthu toera kufendedzera Babawo wakudzulu. (Tgo. 4:8) Pyenepi pisaphemba kukhunganyika. Kuleri basi ndima ibodzi na ibodzi na kucita mibvundzo idalembwa nee kunaphedza anyakupfundza athu kubvesesa mphangwa na kuthambaruka mwauzimu.
2. Ndi maphindu api anadzagumanika tingacitisa pfundziro ya Bhibhlya mwakuphata ntima?
2 Toera kucitisa mapfundziro a Bhibhlya mwakuphata ntima, amwazi mphangwa asafunika kuphedza anyakupfundza awo toera (1) kubvesesa pinapfundzisa Bhibhlya, (2) kutawira pinapfundzisa Bhibhlya na (3) kuphatisira pinapfundzisa Bhibhlya. (Jwau 3:16; 17:3; Tgo. 2:26) Mbwenye pinakwata nthanda zizinji toera kupfundzisa munthu kucita pyenepi. Mbwenye thanyo ibodzi na ibodzi isapangiza kukula kwa uxamwali wace na Yahova mbaperekeka kwa iye.
3. Thangwi yanji apfundzisi aluso asacita mibvundzo ya kudziwa maonero?
3 Ndi Api Manyerezero a Nyakupfundza Bhibhlya?: Toera kudziwa khala nyakupfundza Bhibhlya wathu asabvesesa na asatawira pinapfundza iye, calirani kulonga kakamwe, mbwenye wangisani nyakupfundza kulonga maonero ace. (Tgo. 1:19) Kodi iye asabvesesa pinalonga Bhibhlya pa ntsonga inadinga ife? Anakwanisa kufokotoza ntsonga ineyi m’mafala ace ene? Kodi asapibva tani thangwi ya pinthu pinapfundza iye? Kodi iye asakhulupira kuti pinapfundzisa Bhibhlya mphyandimomwene? (1 Ates. 2:13) Asaona kuti pinapfundza iye pinakwanisa kucinja umaso wace? (Akol. 3:10) Toera kugumana matawiro a mibvundzo ineyi, tisafunika kucita mwacilemedzo mibvundzo ya kudziwa maonero ace mbatibvesera.—Mat. 16:13-16.
4. Tisafunika kucitanji khala nyakupfundza asanentseka kubvesesa peno kuphatisira pinapfundza iye m’Bhibhlya?
4 Kazinji kene pisakwata ndzidzi toera anyakupfundza asiye misambo na manyerezero awo akale. (2 Akor. 10:5) Ndiye tani khala nyakupfundza wathu nee asatawira peno kuphatisira pinapfundza iye? Kupirira ndi kwakufunikambo toera kusiya kuti Mafala a Mulungu na nzimu wakucena piphate basa muntima mwa nyakupfundza. (1 Akor. 3:6, 7; Aheb. 4:12) Mbuto wa kunkakamiza, mphyadidi kwenda pa ntsonga inango khala pisanentsa kwa nyakupfundza kubvesesa peno kuphatisira cipfundziso ca Bhibhlya. Tingapitiriza kumpfundzisa mwakupirira na mwaufuni kubulukira m’Bhibhlya, panango mu kupita kwa ndzidzi anadzakulumizika toera kucita macinjo akufunika.