Xikola Ya Utumiki Wa Mulungu Ya 2015 Inatiphedza Kuthimizira Maluso Athu a Kupfundzisa

¹ Nyamasalmo Dhavidhi alemba: ‘Pinalonga ine na mulomo wanga na pinanyerezera ntima wanga, pikome pa maso panu, Yahova, linga yanga na muomboli wanga.’ (Sal. 19:14) Ife tisafunambo kuti mafala athu akomerese Yahova thangwi tisapasa ntengo mwai wathu wakulonga undimomwene m’mpingo na mu utumiki. Xikola Ya Utumiki Wa Mulungu ndi ibodzi mwa njira zinatipfundzisa Yahova toera kucita utumiki. Cipfundziso ceneci cisacitwa masumana onsene m’mipingo yakupiringana 111.000 pa dziko yonsene yapantsi. Iyo isaphedza abale na alongo a makuziro akusiyanasiyana pa dziko yonsene toera kukhala akuthema ninga atumiki a mphangwa zadidi, aluso pakupfundzisa, akulonga mwacilemedzo na mwakukhonda gopa.​—Machitiro 19:8; Akol. 4:6.

² Ndandanda ya xikola ya 2015 inadzaphataniza ntsonga za n’kabukhu Mafala Akutoma a Bhibhlya, bukhu Biblya Isapfunzisanji na bukhu Ufuni Wa Mulungu. Pontho mwacitwambo macinjo a ndzidzi wa ntsonga zikulu za Bhibhlya na khundu N.° 1. Macinjo anewa pabodzi na pitsogolero pya kucitwa kwa makhundu a xikola pinadzadingwa mu ndima zinatowerera.

³ Ntsonga Zikulu Za Bhibhlya: Abale anapaswa khundu ineyi anadzadinga ntsonga ibodzi yakufunika na yakubveka mwadidi ya kulerwi kwa Bhibhlya kwa sumana mu phindi ziwiri. Kukhunganyika mwadidi kunadzacitisa kulonga ntsonga yakuphindulisa mpingo na kutoweza ndzidzi. Natenepa, mpingo unadzapitiriza na mphindi zitanthatu toera kupereka matawiro m’masegundu 30 peno akucepa a ntsonga zakufunika zidagumana iwo mu kuleri kwawo Bhibhlya kwa sumana. Pyenepi pisaphemba kukhunganyika mwadidi toera kupereka ntawiro wakubveka m’masegundu 30, mbwenye kucita pyenepi mphyakufunika kakamwe kwa ife. Pontho pinadzapasa mwai anango toera kupereka matawiro a pinthu pidapfundza iwo.

⁴ Nkhundu N.° 1: Ndzidzi wa kuleri Bhibhlya wapungulwa mbukhala mphindi zitatu peno zakucepa pontho anadzalerwi mavesi akucepa a Bhibhlya. Ale anatambira khundu ya kuleri Bhibhlya asafunika kuyesera m’maulendo mazinji mu kuleri mwakugaluza na kubvesera mwacidikhodikho malongero na kuleri mwakutowezeka toera mphangwa zibveke mwadidi. Atumiki onsene a Yahova asafunika kuwangisira toera kuleri mwadidi, thangwi kuleri ndi kwakufunika kakamwe mu ulambiri wathu. Ndi pyakutsandzayisa tani kwa ife kuona anathu azinji mbakaleri mwadidi! Anyakubala asafunika kusimbwa thangwi ya kuwangisira kwawo mwaufuni mu kuphedza anawo kukhala anyakuleri adidi.

⁵ Nkhundu N.° 2: Khundu iyi inadzacitwa na mulongo mu mphindi zixanu. Asafunika kuphatisira nsolo udapaswa iye. Khala nkhani yabuluswa n’kabukhu Mafala Akutoma a Bhibhlya, isafunika kugomezera khundu ya basa ya m’munda yakuti ndi yakuphata basa n’cisa canu. Khala nkhani yabuluswa m’bukhu Biblya Isapfunzisanji, isafunika kugomezera khundu ya basa ya m’munda yakuti ndi yakudzoloereka n’cisa canu. Khala nkhani yabuluswa m’bukhu Ufuni Wa Mulungu, nyakupfundza asafunika kufokotoza nsolo udapaswa iye, kusankhula malemba akuthema toera kuaphatisira na kupangiza kuti midida ya Bhibhlya inaphatisirwa tani mu umaso Wacikristu. Malemba anango akuti asabverana na nsolo anakwanisambo kuphatisirwa. Muyang’aniri wa xikola anadzasankhula mphedzi.

⁶ Nkhundu N.° 3: Khundu iyi inadzacitwa na m’bale peno mulongo mu mphindi zixanu. Ingapaswa mulongo, isafunika kucitwa ninga Nkhani N.° 2. Ingapaswa m’bale, isafunika kucitwa ninga nkhani kwa anyakubvesera. Ingabuluswa m’bukhu Biblya Isapfunzisanji, isafunika kucitwa ninga khundu ya basa ya m’munda mwakubverana na cisa canu. Khala yabuluswa m’bukhu Ufuni Wa Mulungu, nyakupfundza asafunika kubvekesa nsolo, kusankhula malemba akuthema na kupangiza kuti midida ya Bhibhlya inaphatisirwa tani mu umaso Wacikristu.

⁷ Nkhundu Ipswa Ya N.° 3 Kwa Abale: Khala nkhani yabuluswa n’kabukhu Mafala Akutoma a Bhibhlya peno m’bukhu Ufuni Wa Mulungu, isafunika kucitwa ninga citsandzo ca kulambira kwa banja peno basa ya m’munda. Kazinji kene muyang’aniri wa xikola anadzasankhula mphedzi na citsandzo. Mphedzi asafunika kukhala wa m’banja ya nyakupfundza peno m’bale wa m’mpingo. Malemba anango akuti asagomezera midida ya Bhibhlya mwakubverana na nsolo anakwanisambo kuphatisirwa mu citsandzo. Midzidzi inango nkulu wa mpingo anakwanisa kupaswa khundu ineyi. Akulu a mpingo asafunika kusankhula okhene mphedzi na citsandzo. Mwakukhonda penula, pyenepi pinadzawangisa mpingo kuona akulu a mpingo mbakapangiza maluso awo akupfundzisa na ciwalo ca banja peno m’bale unango.

⁸ Uphungu: Muyang’aniri wa xikola anadzaphatisira mphindi ziwiri pakumala kwa khundu ibodzi na ibodzi ya nyakupfundza toera kusimba na kupereka uphungu wakuphedza wakubuluswa m’bukhu Beneficie-se da Escola do Ministério Teocrático. Muyang’aniri wa xikola angalonga khundu ya nyakupfundza, iye nee asafunika kudziwisa mwanyapantsi luso yakulonga idapangwa nyakupfundza kuti akhunganyike. Pakumala kwa khundu ibodzi na ibodzi, muyang’aniri asafunika kusimba na ntima onsene, kulonga luso yakulonga idapaswa nyakupfundza, mbalonga thangwi yanji nyakupfundza acita mwadidi pa ntsonga ineyi peno mwaluso analonga kuti thangwi yanji mbipidakhala pyadidi kuti nyakupfundza apitirize kutsalakana ntsonga ineyi.

⁹ Formularyo ya uphungu wa nyakupfundza isagumanika pa tsamba 79 mpaka 81 m’bukhu yace ya Escola do Ministério. Nyakupfundza angamala kucita khundu yace, muyang’aniri wa xikola anadzalemba m’bukhu ya nyakupfundza na kumbvundza pakhundu khala acita exercicíos yakubverana na luso yakulonga idapaswa iye. Kusimba pabodzi na maonero anango toera kuphedza nyakupfundza anakwanisa kuperekwa pakumala kwa misonkhano peno pa ndzidzi unango. Citsalakano cinatambira anyakupfundza onsene pa xikola cisafunika kuoniwa ninga mwai wakuaphedza kuthambaruka mwauzimu.​—1 Tim. 4:15.

¹⁰ Khala nyakupfundza asapiringana ndzidzi, muyang’aniri wa xikola peno nyakuphedza asafunika kumulimirisa mwaluso. Nyakupfundza angaona cidzindikiro ca kumala kwa ndzidzi asafunika kumalisa mafala analonga iye mbabuluka pa platifomu.​—Onani bukhu Escola do Ministério, tsa. 282, ndima 4.

¹¹ Onsene anakwanirisa midida asawangiswa kucita khundu mu Xikola Ya Utumiki Wa Mulungu. (Onani bukhu Escola do Ministério, tsa. 282, ndima 6.) Cipfundziso ca xikola ineyi cisapereka miyai kwa atumiki a Yahova toera kumwaza na kupfundzisa mphangwa zadidi za Umambo mwacinyindiro, mwacilemedzo na mwaufuni. Mwakukhonda penula, Yahova asakomerwa kusimbwa na onsene anaphindula na cipfundziso ca Mulungu!​—Sal. 148:12, 13; Iza. 50:4.