Nyimbo Zipswa Mu Ulambiri!
1 Pa nsonkhano wa pacaka wa Watch Tower Bible and Tract Society of Pennsylvania, udacitwa pa ntsiku 4 nthanda ya Malandalupya ya 2014, pacitwa cidziwiso ca kusasanyira papswa bukhu yathu ya nyimbo. Mwandimomwene cikhali cidziwiso cakutsandzayisa kakamwe! Anyakubvesera onsene akumbuswa kufunika kwa nyimbo zathu za Umambo mu ulambiri wathu.—Sal. 96:2.
2 Panango munabvundza, ‘Thangwi yanji pisafunika kusasanyira bukhu ya nyimbo?’ Pana mathangwi mazinji. Yakutoma, kubvesesa kwathu Malemba kusapitiriza kuthimizirika na pyenepi pisakhuyambo mafala a nyimbo zathu. (Mis. 4:18) Thangwi inango yakusasanyira: Mafala mazinji na mafraze anaphatisirwa m’bukhu ya nyimbo inaphatisira ife abuluswa m’Bhibhlya ya Tradução do Novo Mundo yakale. Cincino mafala anewa asafunika kucinjwa toera abverane na mafala anagumanika m’Bhibhlya yakusasanyirwa paswa. Nakuti pana basa ikulu kakamwe toera kucinja mafala, pyaoneka kuti mphyakufunika kuthimizira nyimbo zingasi zipswa m’bukhu ya nyimbo.
3 Tisafunika kudikhira mpaka kubuluswa kwa bukhu ipswa ya nyimbo toera kutoma kuphatisira nyimbo zipswa? Nkhabe. Tiri akutsandzaya kukudziwisani kuti mu nthanda zinatowerera, nyimbo zenezi zinadzaikhwa mu Web site, jw.org. Nyimbo ipswa ingabuluswa, inadzaikhwa pa khundu yakumalisa ya Nsonkhano Wa Basa na cidzindikiro cakuti “nyimbo ipswa.”
4 Tinapfundza Tani Nyimbo Zipswa: Panango pinakhala pyakunentsa kupfundza nyimbo ipswa. Ngakhale tenepa, ninga nyamasalmo, ife tisafunika kuimba pa misonkhano yathu ya mpingo ‘tayu kukhala akumatama.’ (Sal. 30:12, NM) Toera kupfundza nyimbo ipswa, towezerani maonero awa akukhonda nentsa.
Mungabvesera kazinji kene nyimbo zenezi, pinadzakhala pyakukhonda nentsa kuzikumbukira.
Citani pyenepi mpaka kuidziwa mwadidi.
5 Mu nthanda za ntsogolo, nyimbo ipswa ingasankhulwa toera kumalisa nayo Nsonkhano Wa Basa, mpingo unadzabvesera kabodzi nyimbo yamalimba. Buluka penepo anyakubvesera anadzaimba mu kutowezera nyimbo zamalimba, ninga pinacita ife pa kuimba nyimbo zinango.
6 Tisafunika kudziwa kuti kuimba pa misonkhano yathu kusacitisa tonsene kukhala akutsandzaya mu kugaluza mafala athu toera kusimba Yahova. Natenepa, nee tisafunika kukhala na nsambo wakubuluka panja mwakusowa mathangwi mu ndzidzi unaimbwa nyimbo pa misonkhano yathu Yacikristu.
7 Pana njira inango yakupereka takhuta thangwi ya nyimbo zathu zakucena. Pa misonkhano ya cisa na ya gawo, nyimbo zamalimba zisaimbwa pakutoma kwa makhundu onsene. Kawiri pacaka, abale na alongo asaperekeka kubulukira pa dziko yonsene yapantsi mu kuphatisira mpfuma zawo kuenda ku Patterson, Nova York, toera kacita nyimbo zadidi kakamwe zinaphatisirwa mu ulambiri wathu. Natenepa, muimiriri wa khundu angatiphemba toera kukhala m’mbuto zathu na kubvesera nyimbo zidakhunganyikirwa ife, tisafunika kucita pyenepi. Kucita pyenepi kunadzatiphedza toera kukhunganya mitima yathu ku mphangwa zinafuna kubvesera ife.—Esd. 7:10.
8 Lero tinadzamalisa misonkhano yathu na nyimbo ipswa ya nsolo wakuti “O Reino já Governa!” Nyimbo ineyi, idalongwa pa nsonkhano wa pacaka, yakhunganywa makamaka toera kukhala cidzindikiro ca pyaka 100 pya kukhazikiswa kwa Umambo.
9 Inde, nyimbo zipswa ndi “pinthu pyadidi” pyakubuluka kwa Yahova. (Mat. 12:35a) Tendeni tikhale akutonga kupfundza nyimbo zenezi zipswa na kuziimba na ntima onsene, toera kusimba mwakuthema na kupasa mbiri Mulungu wathu!—Sal. 147:1.