Phatisirani Mwaluso Makhundu a Bukhu Bhibhlya Isapfundzisanji

Mu ndzidzi wakuti nyakupfundza Bhibhlya akupfundza Bhibhlya isapfundzisanji na kuphatisira pinapfundza iye, anathambaruka mbabala misapo yauzimu. (Sal. 1:1-3) Tinakwanisa kuphedza nyakupfundza wathu wa Bhibhlya toera kuthambaruka mu kuphatisira mwadidi makhundu akufunika a bukhu Bhibhlya Isapfundzisanji.

Mibvundzo Yakutoma: Nsolo ubodzi na ubodzi usatoma na mibvundzo yakuti matawiro ace ali nkati mwa nsolo. Munakwanisa kucita mibvundzo ineyi kuna nyakupfundza toera kusaka maonero ace kuti akulise cifuno mwa pinafuna kupfundzwa. Peno kum’phemba toera aitawire mwacigwagwa. Angatawira mwakuphonyeka nee musafunika kumpanga ndzidzi unoyu. Matawiro ace anakuphedzani kudziwa ntsonga zinafunika kugomezerwa.​—Mis. 16:23; 18:13.

N’thimiziro: Khala nyakupfundza akubvesesa mwadidi na asatawira pinapfundza iye pa nsolo, basi ene munamuwangisa toera aone ekha n’thimiziro wace. Pa pfundziro yakutowera, phatisirani mphindi zakucepa toera kuona khala abvesesa. Mbwenye, khala pinam’phedza, phatisirani ndzidzi wa pfundziro toera kudinga n’thimiziro mu kuleri ndima na kucita mibvundzo idakhunganyika imwe mwanyapantsi.

Bokosi ya Kubwerezera Pidapfundzwa: Bokosi ineyi inagumanika kunkhomo kwa nsolo iri na mafala akuti asatawira mibvundzo iri pakutoma kwa nsolo. Munakwanisa kuphatisira khundu ineyi toera kukhala na cinyindiro khala nyakupfundza wanu abvesesa na asakwanisa kufokotoza ntsonga zakufunika. Lerini pabodzi ntsonga ibodzi na ibodzi mwakugaluza na malemba anagumanika penepo. Buluka penepo phembani nyakupfundza toera afokotoze mukuphatisira lemba peno malemba kuti thangwi yanji mafala anewa ndi andimomwene.​—Mach. 17:2, 3.