Kuthimizira Maluso Athu mu Utumiki​—Phatisirani Bukhu ‘Khalani Mu Ufuni Wa Mulungu’ Toera Kukhuya Mitima ya Anyakupfundza

THANGWI YANJI MPHYAKUFUNIKA: Toera kulambira Yahova mwakutawirika, anthu asafunika kupfundza midida ya Yahova mbacita pinthu mwakubverana na pinapfundza iwo. (Iza. 2:3, 4) Bukhu yaciwiri inaphatisira ife toera kuphedza anyakupfundza Bhibhlya kuti aphatisire midida ya Bhibhlya mu umaso wawo wa ntsiku na ntsiku ndi bukhu yakuti ‘Ufuni Wa Mulungu.’ (Aheb. 5:14) Tisafunika kuwangisira kukhuya mitima yawo toera akulumizike kucita macinjo mwakubverana na pinapfundza iwo.—Aroma 6:17.

TINACITA TANI PYENEPI:

• Khunganyikani mwadidi, mbamunyerezera pyakufuna pya nyakupfundza wanu. Khunganyani mibvundzo yakuti inakuphedzani kudziwa manyerezero na mabvero a nyakupfundza thangwi ya mphangwa zinapfundza iye.—Mis. 20:5; be-T 259

• Phatisirani mabokosi anagumanika m’bukhu toera kuphedza nyakupfundza wanu kuona kufunika kwa kuphatisira midida ya Bhibhlya

• Phedzani nyakupfundza wanu toera kunyerezera kuti anacita tani angathimbana na pisankhulo pinakhuya cikumbuntima cace, mbwenye lekani kuncitira pisankhulo.—Agal. 6:5

• Mwaluso, dzindikirani khala nyakupfundza wanu asafuna ciphedzo toera kuphatisira midida inango ya Bhibhlya. Mwakukoma ntima muwangiseni toera acite macinjo mwakubverana na ufuni wace kwa Yahova.—Mis. 27:11; Jwau 14:31