Tinakulisa Tani Ufuni Wathu Kwa Mulungu na Kwa Anthu

Maseze Akristu nee asakakamizwa kubvera Mwambo wa Mose, mbwenye matongero mawiri makulu a mwambo unoyu asapangiza pinafuna Yahova kuna ife: Kufuna Mulungu na anthu. (Mat. 22:37-39) Ife nee tisabalwa na ufuni unoyu, na thangwi ineyi tisafunika kuukulisa. Mphapo tinacita tani pyenepi? Njira ibodzi ndi kuleri Bhibhlya ntsiku zonsene. Tingaleri Bhibhlya tinakwanisa kudziwa makhaliro a Mulungu na kuona “udidi” unaticitira Yahova ntsiku na ntsiku. (Masal. 27:4) Tingacita pyenepi, ufuni wathu kwa iye unathimizirika, pontho manyerezero athu anabverana na ace. Pyenepi pinaticitisa kubvera matongero a Mulungu, kuphatanizambo analonga pya kupangiza ufuni wandimomwene kwa anango. (Jwau 13:34, 35; 1 Jwau 5:3) Onani maonero matatu akuti anakuphedzani kukomerwa na kuleri kwanu Bhibhlya:

• Phatisirani luso yanu yakunyerezera. Mu ndzidzi unaleri imwe, nyerezerani ninga mukuona pinacitika. Kodi musakwanisa kuona mbuto ikhacitika pinthu pyenepi, kubva dzumbi na khwema? Kodi musakwanisa kudzindikira mabvero a anthu analongwa?

  

• Cinjani njira yanu yakuleri. Imwe munakwanisa kuleri mwekhene mwakugaluza, peno kubvesera mphangwa zakugravarwi. M’mbuto mwakuleri kwene basi kutomera Genesi mpaka Apokalipse, munakwanisa kuleri makhundu analonga ntsonga peno munthu m’bodzi ene. Mwacitsandzo, phatisirani khundu 4 peno 16 ya kabukhu Citsogolero Toera Kupfundza Mafala a Mulungu toera kuleri pya umaso wa Yezu. Pontho munakwanisa kuleri kapitulu yonsene idabuluswa lemba ya ntsiku. Lerini mabukhu a m’Bhibhlya mwakubverana na ndandanda idalemberwa iwo.

  

• Wangisirani toera kubvesesa pinaleri imwe. M’mbuto mwakuleri makapitulu mazinji pa ntsiku, mphyadidi kuleri kapitulu ibodzi toera kubvesesa mphangwa zinaleri imwe na kuzinyerezera mwacidikhodikho. Nyerezerani pya makhaliro a mu ndzidzi uneule na pitsandzo pinagumanika mwenemu. Khala mukupfundza mu Bhibhlya ya Tradução do Novo Mundo, phatisirani mapa na mavesi anango toera kubvesesa pinaleri imwe. Fufudzani ntsonga zakuti nee mwazibvesesa. Pingakwanisika, phatisirani ndzidzi ninga udaphatisira imwe pakuleri toera kunyerezera mwacidikhodikho pidaleri imwe.