Munacitanji Toera Mukhunganyike Mwadidi Ntsiku ya Cikumbuso?

Kutomera caka cino, ife tinakhala na ndzidzi uzinji toera kukhunganyika mwadidi Cikumbuso ca kufa kwa Kristu. Khala Cikumbuso cinacitwa pakati pa sumana, sumana ineyi nkhabe kudzacitwa Nsonkhano wa Umaso Wathu Wacikristu na Utumiki. Khala Cikumbuso cinacitwa pakumala kwa sumana, nkhabe kudzacitwa nkhani yapakweca nee Pfundziro ya Ncenjezi. Mphapo, munaphatisira tani mwadidi ndzidzi unoyu? Akristu a mu ndzidzi wakale akhakhunganyika mwanyapantsi, ifembo tisafunika kukhunganyika mbidzati kufika ntsiku ineyi yakupambulika. (Luka 22:7-13; Utumiki Wathu wa Umambo 03/15 tsa. 1) Pontho tonsene tisafunika kukhunganya mitima yathu. Tinacita tani pyenepi?

• Nyerezerani kuti thangwi yanji ndi pyakufunika kuenda ku Cikumbuso.—1 Akor. 11:23-26

• Citani phembero, pontho nyerezerani kuti uxamwali wanu na Yahova uli tani.—1 Akor. 11:27-29; 2 Akor. 13:5

• Lerini, pontho nyerezerani mwadidi Malemba analonga thangwi ya Cikumbuso.—Juw. 3:16; 15:13

Amwazi mphangwa anango asaleri Malemba analerwi mu ndzidzi wa Cikumbuso anagumanika mu kabukhu Kudinga Malemba Ntsiku na Ntsiku, mbaanyerezera mwadidi. Anango asaleri mavesi a Bhibhlya anagumanika mu nsolo uno. Anangombo asaleri misolo ya Ncenjezi inalonga pya Cikumbuso na ufuni udapangiza Yahova na Yezu kuna ife. Mbwenye mwakukhonda tsalakana pinafuna ife kupfundza, kumbukani kuti cifuniro cathu ndi kuwangisa uxamwali wathu na Yahova na Mwanace.