KUKHALA M’MASO NINGA AKRISTU
Sakani Kudziwa Pinanyerezera Mulungu
Ife tisafunika kukomeresa Yahova mu pinthu pyonsene pinacita ife. (Mis. 27:11) Toera kucita pyenepi, ife tisafunika kucita pinthu mwakubverana na manyerezero ace, ngakhale kuti pa ndzidzi unoyu nee tiri na ntemo toera kutitsogolera. Mphapo ninji pinafuna kutiphedza toera kucita pyenepi?
Pfundzani Bhibhlya mwakukhonda phonya. Mu ndzidzi unaleri ife Bhibhlya, tisafunika kuona ndzidzi unoyu ninga tiri kucedza na Yahova. Ife tinakwanisa kudziwa pinanyerezera Yahova tingaona kuti iye atsalakana tani mbumba yace, pontho tingadinga pitsandzo pya ale adacita pinthu pyadidi na pya ale adacita pinthu pyakuipa. Tingafuna kucita cisankhulo, nzimu wakucena unatiphedza toera kukumbuka pinthu pyakufunika pidapfundza ife na midida idapfundza ife m’Mafala a Mulungu.—Juwau 14:26.
Fufudzani. Mungafuna kucita cisankhulo bvundzikani tenepa: ‘Ndi mavesi api peno ndi makhundu api a Bhibhlya anafuna kundiphedza toera kubvesesa maonero a Yahova thangwi ya cisankhulo cinafuna ine kucita?’ Phembani ciphedzo ca Yahova, pontho phatisirani mabukhu athu anagumanika mu cilongero canu toera akuphedzeni kugumana midida ya Bhibhlya yakuti isabverana na cisankhulo cinafuna imwe kucita.—Masal. 25:4.
ONANI VIDHYU YA NSOLO WAKUTI ‘TITHAMANGE MWAKUPIRIRA’—TIDYE CAKUDYA CADIDI, BULUKA PENEPO, TAWIRANI MIBVUNDZO IYI:
Ndi mikakamizo ipi idathimbana na mulongo adaona ife mu vidhyu?
Kodi imwe mbamudaphatisira tani mabukhu athu toera kugumana mphangwa zakuti zinakuphedzani kuti mupirire mikakamizo ninga ineyi?
Tingakhala na ndzidzi wakufufudza na kucita pfundziro ya munthu paekha, pinatiphedza tani toera kucita pisankhulo pyadidi?—Aheb. 5:13, 14