Pitirizani ‘Kuwangisana Unango na Ndzace’

1. Mwakubverana na 1 Atesalonika 5:11, ndi basa ipi inafunika kucitwa na ife tonsene?

KODI imwe mwacita kale basa yakumanga peno kusasanyira paswa Nyumba ya Umambo? Khala ndi tenepo, imwe musakumbuka ntsiku yakutoma idasonkhana imwe pakumala kumanga peno kusasanyira paswa nyumba ineyi. Mwakukhonda penula imwe mwapereka takhuta kakamwe kuna Yahova. Panango mwalira na kutsandzaya, pontho nee mwakwanisa kuimba mwadidi nyimbo yakutoma thangwi ya kutsandzaya kweneku. Mwandimomwene, Nyumba za Umambo zakumangwa mwadidi zisapasa mbiri Yahova. Mbwenye ife tinakwanisa kumpasa mbiri tingacita ntundu unango wa basa. Basa ineyi isaphataniza cinthu cakufunika kakamwe kupiringana kumanga Nyumba za Umambo. Iyo isaphataniza kuwangisa anthu onsene anabwera mu Nyumba za Umambo toera kulambira Yahova. Mpostolo Paulu akhanyerezera ntundu unoyu wa basa pidalemba iye mafala anagumanika pa 1 Atesalonika 5:11, akuti ndi lemba ya nsolo uno.—Lerini.

2. Tinapfundzanji mu nsolo uno?

² Mpostolo Paulu ndi citsandzo cadidi kakamwe thangwi iye akhadziwa kuwangisa abale na alongo ace. Iye akhaabvera ntsisi. Mu nsolo uno, ife tinapfundza kuti iye aphedza tani abale na alongo ace toera (1) kupirira nyatwa, (2) kukhala a ntendere unango na ndzace na (3) kuwangisa cikhulupiro cawo kuna Yahova. Natenepa tendeni tione kuti tinatowezera tani citsandzo cace mbatiwangisambo abale na alongo athu lero.—1 Akor. 11:1.

PAULU APHEDZA ABALE NA ALONGO ACE TOERA KUPIRIRA PINENTSO

3. Ndi maonero api akulinganira akhali na mpostolo Paulu?

³ Paulu akhafuna kakamwe abale na alongo ace. Nakuti Paulu athimbanambo na pinentso, iye akhakwanisa kubvera ntsisi abale na alongo ace mu ndzidzi ukhathimbana iwo na pinentso. Paulendo unango, nakuti Paulu nee akhali na kobiri izinji akhafunika kuphata basa toera akwanise kutsalakana pikhafuna iye na pikhafuna andzace. (Mabasa 20:34) Iye akhaphata basa yakusona matenti. Pidafika iye ku Korinto, iye atoma kuphata basa pabodzi na Akila na Prisila. Mbwenye “m’masabudu onsene” iye akhamwaza mphangwa kuna Ayuda na Agerego. Buluka penepo, pidafika Sila na Timoti, “Paulu atoma kuphatisira ndzidzi wace onsene m’basa yakumwaza mphangwa.” (Mabasa 18:2-5) Paulu nee akhaduwala kuti cinthu cakufunika kakamwe mu umaso wace ndi kutumikira Yahova. Nakuti Paulu akhali waphinga mu utumiki, pontho akhaphata basa mwakuwanga toera atsalakane pinthu pyakumanungo, iye akhakwanisa kuwangisa abale na alongo ace. Iye aakumbusa toera akhonde kutawirisa kuti pinentso na cifuno cakutsalakana mabanja awo pikhonde kuacitisa kuduwala ‘pinthu pyakufunika kakamwe’ pyakuti ndi kulambira Yahova.—Afil. 1:10.

4. Paulu na Timoti aphedza tani Akristu andzawo toera apirire kutcingwa?

⁴ Pidamala kwene kukhazikiswa mpingo ku Tesalonika, abale na alongo atcingwa kakamwe. Mu ndzidzi udacimwana anyakutcinga kugumana Paulu na Sila, iwo akwata “abale angasi mbaenda nawo mpaka kuna atongi a nzinda.” Iwo akhakhuwa: ‘Anthu awa asacita pinthu pinakhonda kubverana na mitemo ya Sezari.’ (Mabasa 17:6, 7) Pyenepi pyacitisa kuti Akristu anewa apswa agope kakamwe thangwi yakutcingwa na amuna a mu nzinda. Panango iwo mbadabwerera nduli mbasiya kutumikira Yahova, mbwenye Paulu nee akhafuna kuti pyenepi picitike. Natenepa maseze iye pabodzi na Sila akhafunika kubuluka, iwo acita masasanyiro toera mpingo unoyu upswa utsalakanwe mwadidi. Paulu akumbusa Akristu a ku Tesalonika kuti: ‘Ife tatuma Timoti, m’bale wathu toera akuwangiseni, pontho akubalangazeni mu cikhulupiro canu kuti akhonde kuoneka munthu pakati panu wakuti anafeweswa na nyatwa zenezi.’ (1 Ates. 3:2, 3) Panango Timoti akhaona mu ndzidzi ukhatcingwa abale mu nzinda udakula iye ku Listra. Iye aona kuti Paulu akhawangisa tani abale kweneko. Nakuti Timoti aona njira idaphedza Yahova abale ku Listra, iye mbadakwanisa kupasa cinyindiro abale na alongo ku Tesalonika kuti pinthu mbapidaafambira mwadidi.—Mabasa 14:8, 19-22; Aheb. 12:2.

5. M’bale Bryant aphindula tani na ciphedzo ca m’bale Tony?

⁵ Ndi pinthu pipi pinango pidacita Paulu toera kuwangisa abale na alongo ace? Pidabwerera Paulu na Bharnabhe ku Listra, Ikonyo na Antiokiya, ‘iwo akhazikisa akulu a mpingo mu mpingo ubodzi na ubodzi.’ (Mabasa 14:21-23) Mwakukhonda penula, akulu a mpingo anewa abalangaza abale na alongo m’mipingo ninga pinacita akulu a mpingo lero. Onani mafala adalonga m’bale Bryant. Iye alonga: “Pikhali ine na pyaka 15 pyakubalwa, pai wanga abuluka panyumba, pontho mai wanga abuluswa mu mpingo. Ine ndikhaona kuti ndiri ndekhene, pontho ndatsukwala kakamwe.” Mphapo ninji pidaphedza m’bale Bryant toera kupirira pinentso pyenepi? Iye alonga: “Nkulu wa mpingo anacemerwa Tony akhacedza na ine pa misonkhano na midzidzi inango. Iye andipanga pya atumiki anango a Yahova akuti akhathimbana na pinentso, mbwenye akhapitiriza kukhala akutsandzaya. Iye aleri pabodzi na ine Masalmo 27:10, pontho kazinji kene akhalonga pya Ezekiya wakuti atumikira Yahova mwakukhulupirika maseze pai wace nee akhali wa citsandzo cadidi.” Kodi pinthu pyenepi pyaphedza tani m’bale Bryant? Iye alonga: “Na ciphedzo ca m’bale Tony, mwakukhonda dembuka ine ndatoma kutumikira m’basa ya ndzidzi onsene.” Akulu a mpingo, khalani dzololo toera kuphedza ale akuti asafuna kubva ‘mafala adidi’ toera kuabalangaza ninga Bryant.—Mis. 12:25.

6. Paulu aphatisira tani mbiri za umaso toera kuwangisa abale na alongo ace?

⁶ Paulu akumbusa abale na alongo ace kuti “nsoka ukulu wa amboni” wapirira pinentso thangwi ya ciphedzo ca Yahova. (Aheb. 12:1) Paulu akhadziwa kuti mbiri za umaso za ale adapirira ntundu onsene wa nyatwa zikhaphedza abale na alongo toera apitirize kunyerezera ‘nzinda wa Mulungu wa m’maso.’ (Aheb. 12:22) Pyenepi pisacitikambo lero. Thangwi ife tisawangiswa kakamwe na njira idaphedza Yahova Jidhiyoni, Bharaki, Dhavidhi, Samweli na atumiki anango azinji a Yahova. (Aheb. 11:32-35) Pontho tisawangiswambo na pitsandzo pya abale na alongo akukhulupirika lero. Ku ofesi ikulu ya Mboni za Yahova, abale asatambira matsamba a abale na alongo akuti awangiswa cikhulupiro cawo thangwi yakuleri mbiri za umaso za atumiki a Yahova a ntsiku zino.

PAULU APANGIZA ABALE NA ALONGO ACE KUTI ANAKHALA TANI MU NTENDERE

7. Mwapfundzanji na uphungu wa Paulu unagumanika pa Aroma 14:19-21?

⁷ Ife tinakwanisa kuwangisa abale na alongo athu tingalonga na kucita pinthu pinakhazikisa ntendere mu mpingo. Ife nee tisafunika kukhala akugawana thangwi yakusiyana maonero. Ife nee tisafunika kukakamira maonero athu khala m’bale peno mulongo nee acita pinthu pinaphonyana na pinalonga Bhibhlya. Mwacitsandzo, mu mpingo wa ku Roma mukhali na Akristu akuti akhali Ayuda na anango akuti nee akhali Ayuda. Mu ndzidzi udasiya kuphatisirwa Mwambo wa Mose, alambiri a Yahova nee akhafunikabve kubvera mitemo ya mwambo unoyu ukhakhondesa kudya mitundu inango ya pyakudya. (Marko 7:19) Kubulukira mu ndzidzi unoyu, Akristu anango akuti akhali Ayuda akhaona kuti akhali akusudzuka toera kudya ntundu onsene wa pyakudya, mbwenye Ayuda anango akhaona kuti ndi pyakuipa kudya pyakudya pyenepi. Na thangwi ineyi mpingo wakhala wakugawika. Mpostolo Paulu aapanga kufunika kwa kukhazikisa ntendere. Iye alonga: “Mphyadidi kukhonda kudya nyama peno kumwa vinyu, peno kucita cinthu cinango cakuti cinagwegwedusa m’bale wako.” (Lerini Aroma 14:19-21.) Natenepa Paulu aphedza Akristu andzace toera aone kuti kugawana kweneku kukhali kwakugopswa kuna Akristu onsene mu mpingo. Kusiyapo pyenepi, iye akhali dzololo toera kucinja makhaliro ace kuti akhonde kugwegwedusa anango. (1 Akor. 9:19-22) Ife tinakwanisambo kuwangisa abale na alongo athu na kukhala antendere tingacalira kukhala akugawana thangwi yakucita pinthu pinakomerwa na ife.

8. Paulu acitanji toera kuphedza abale kukhazikisa ntendere mu mpingo?

⁸ Paulu apangiza citsandzo cadidi cakukhazikisa ntendere na ale akuti nee akhabverana thangwi ya pinthu pyakufunika kakamwe. Mwacitsandzo, anango mu mpingo akhafuna kuti Akristu akuti nee akhali Ayuda asidzwe, panango toera akhonde kutcingwa na Ayuda. (Agal. 6:12) Paulu nee aphedzera maonero anewa, mbwenye m’mbuto mwakukakamira maonero ace, iye aphemba uphungu mwakucepeseka kuna apostolo na akulu a mpingo ku Yerusalemu. (Mabasa 15:1, 2) Thangwi yakucita pyenepi, Paulu aphedza Akristu anewa toera akhale akutsandzaya na antendere mu mpingo.—Mabasa 15:30, 31.

9. Tinatowezera tani citsandzo ca Paulu?

⁹ Pa mpingo pangaoneka kukhonda bverana, ife tinakwanisa kukhazikisa ntendere mukusaka uphungu kuna ale adakhazikiswa na Yahova. Kazinji kene ife tinakwanisa kugumana uphungu m’mabukhu athu peno m’pitsogolero pinapereka gulu ya Yahova. Tingawangisira kuphatisira pitsogolero pyenepi m’mbuto mwakukakamira maonero athu, tinaphedzera toera mpingo ukhale muntendere.

10. Ninji pontho pidacita Paulu toera kukhazikisa ntendere mu mpingo?

¹⁰ Paulu akhazikisa ntendere mu mpingo mukulonga makhaliro adidi a abale na alongo ace, tayu makhaliro awo akuipa. Mwacitsandzo, mafalace akumalisa mu tsamba idalembera iye Akristu a ku Roma, Paulu alonga madzina a abale na alongo azinji, pontho kazinji kene alonga pinthu pyadidi pikhacita iwo. Ife tinakwanisa kutowezera citsandzo ca mpostolo Paulu tingalonga makhaliro adidi a abale na alongo athu. Tingacita pyenepi, ife tisakhala na uxamwali wakuwanga na abale na alongo athu, pontho tisafunana kakamwe unango na ndzace.

11. Tinakhazikisa tani ntendere tingadawisirana na anango?

¹¹ Midzidzi inango, ngakhale Akristu akukola mwauzimu anakwanisa kukhonda bverana unango na ndzace. Pyenepi pyacitika kuna Paulu na xamwali wace Bharnabhe. Iwo akhali na maonero akusiyana thangwi yakukwata Marko toera aende pabodzi na iwo paulendo wawo waumisionaryo. “Iwo aketesana kakamwe,” pontho nee acitabve ulendo unoyu pabodzi. (Mabasa 15:37-39) Mbwenye Paulu, Bharnabhe na Marko akhazikisa ntendere, pontho pyenepi pisapangiza kuti iwo akhafuna kakamwe kuti mpingo ukhale muntendere na wakuphatana. Mukupita kwa ndzidzi Paulu asimba Bharnabhe na Marko. (1 Akor. 9:6; Akol. 4:10) Ife tisafunikambo kukhazikisa ntendere tingadawisirana na anango mu mpingo, pontho tisafunika kupitiriza kuona makhaliro awo adidi. Tingacita pyenepi, ife tinakhala muntendere na akuphatana.—Aef. 4:3.

PAULU AWANGISA CIKHULUPIRO CA ABALE NA ALONGO ACE

12. Ndi pinentso pipi pinathimbana na abale na alongo athu lero?

¹² Ife tinakwanisa kuwangisa abale na alongo athu tingaaphedza toera awangise cikhulupiro cawo kuna Yahova. Anango asasingirirwa na acibale awo akuti nee ndi Mboni za Yahova na andzawo akubasa peno akuxikola. Anango ali na utenda wakugopswa peno asathimbana na manyerezero akuipa. Kusiyapo pyenepi, anango abatizwa kale kakamwe, pontho asadikhira mu pyaka pizinji kufudzwa kwa dziko ino. Pinthu pyenepi pinakwanisa kuyesera cikhulupiro ca Akristu lero. Akristu a mu ndzidzi wa apostolo athimbanambo na pinentso pibodzi pyene. Mphapo Paulu acitanji toera kuwangisa abale na alongo ace?

13. Paulu aphedza tani ale akhasingirirwa thangwi ya pinthu pikhakhulupira iwo?

¹³ Paulu aphatisira Malemba toera kuwangisa cikhulupiro ca abale na alongo ace. Mwacitsandzo, Akristu akuti akhali Ayuda panango nee akhadziwa pinthu pikhafuna iwo kulonga mu ndzidzi ukhalonga acibale awo akukhonda khulupira kuti uphemberi Waciyuda ukhali wakufunika kakamwe kupiringana Wacikristu. Mwakukhonda penula, tsamba idalemba Paulu kuna Ahebheri yawangisa kakamwe Akristu anewa. (Aheb. 1:5, 6; 2:2, 3; 9:24, 25) Natenepa iwo mbadakwanisa kuphatisira mphangwa zidalemba Paulu toera kudziwa kuti anatawira tani acibale awo akukhonda khulupira. Lero, ife tinakwanisambo kuphedza abale na alongo athu anasingirirwa toera aphatisire mabukhu athu kuti akwanise kufokotoza pinakhulupira iwo. Pontho khala aphale na atsikana asasingirirwa thangwi yakukhulupira kuti ndi Mulungu adacita pinthu, ife tinakwanisa kuaphedza toera agumane mphangwa zinacitisa kukhulupira pyenepi m’bhruxura yakuti A Vida—Teve um Criador? na A Origem da Vida—Cinco Perguntas Que Merecem Resposta.

14. Paulu acitanji maseze akhali wakuphatika na basa yakumwaza mphangwa na yakupfundzisa?

¹⁴ Paulu awangisa abale na alongo ace toera apangize ufuni na kucita “mabasa adidi.” (Aheb. 10:24) Iye aphedza abale na alongo ace, tayu basi na pinthu pidalonga iye, mbwenye aaphedzambo na pinthu pidacita iye. Mwacitsandzo, mu ndzidzi ukhathabuka Akristu a ku Yudeya na njala, Paulu atumiza pinthu toera kuaphedza. (Mabasa 11:27-30) Maseze Paulu akhali wakuphatika na basa yakumwaza mphangwa na yakupfundzisa, ndzidzi onsene akhasaka miyai toera kuphedza ale akhafuna ciphedzo mu pinthu pyakumanungo. (Agal. 2:10) Mukucita pyenepi, iye aphedza abale na alongo toera akhale na cinyindiro cakuti Yahova mbadaatsalakana. Lero, tingaphatisira ndzidzi wathu, mphambvu zathu na maluso athu toera kuphedza abale na alongo anagwerwa na pidengwa, ife tisaaphedzambo toera kuwangisa cikhulupiro cawo. Tinakwanisambo kucita pyenepi tingacita pyakupereka kazinji kene toera kuphedzera basa yathu pa dziko yonsene yapantsi. Munjira zenezi na zinango, ife tisaphedza abale na alongo athu toera anyindire kuti Yahova cipo anaasiya okhene.

15-16. Tisafunika kucitanji toera kuphedza abale na alongo ali na cikhulupiro cakufewa?

¹⁵ Paulu apitiriza kuphedza ale akhali na cikhulupiro cakufewa. Iye aabvera ntsisi, pontho acedza nawo mwakukoma ntima. (Aheb. 6:9; 10:39) Mwacitsandzo, tsamba idalembera iye Ahebheri, kazinji kene aphatisira fala yakuti “ife.” Pyenepi pyapangiza kuti akhafunikambo kuphatisira uphungu ukhapereka iye. (Aheb. 2:1, 3) Ninga Paulu, ife nee tisafunika kusiya kuphedza abale na alongo ali na cikhulupiro cakufewa. M’mbuto mwace, tisafunika kuawangisa mukupangiza kuti tisaatsalakana. Tingacita pyenepi, tinapangiza kuti tisaafuna. Kulonga nawo mwakukoma ntima na mwaufuni kunaawangisa kakamwe.

¹⁶ Paulu apasa abale na alongo cinyindiro cakuti Yahova akhaona mabasa awo adidi. (Aheb. 10:32-34) Ife tinakwanisambo kucita pibodzi pyene tingaphedza mulongo peno m’bale ali na cikhulupiro cakufewa. Ife tinakwanisa kum’phemba toera alonge kuti adziwa tani undimomwene wa Bhibhlya, peno kumpanga toera anyerezere midzidzi idaona iye ciphedzo ca Yahova. Ife tinakwanisa kuphatisira mwai unoyu toera kumpanga kuti Yahova nee aduwala ufuni udapangiza iye, pontho nee anansiya ekhene. (Aheb. 6:10; 13:5, 6) Pyenepi panango pinawangisa abale na alongo anewa toera apitirize kutumikira Yahova.

‘PITIRIZANI KUWANGISANA UNANGO NA NDZACE’

17. Ndi maluso api akuti tinakwanisa kuakulisa?

¹⁷ Ninga munthu anacita basa yakumanga nyumba asathimizira maluso ace mukupita kwa ndzidzi, ife tinakwanisambo kuthimizira maluso athu akuwangisana unango na ndzace. Ife tinakwanisa kuphedza anango toera apirire mayesero mukuapanga pitsandzo pya atumiki a Yahova a nduli adapirirambo mayesero. Ife tinakwanisa kukhazikisa ntendere tingalonga pinthu pyadidi pinacita anango, pontho tingawangisira kukhazikisa ntendere tingadawisirana na anango. Kusiyapo pyenepi, ife tinakwanisambo kuwangisa cikhulupiro ca abale na alongo athu mukuapanga undimomwene wakufunika wa Bhibhlya, kuapasa pinthu pyakumanungo na kuphedza ale anafewa mwauzimu.

18. Kodi muli wakutonga toera kucitanji?

¹⁸ Abale na alongo anacita basa yakumanga nyumba za gulu yathu asatsandzaya kakamwe. Ife tinakwanisambo kutsandzaya tingaphedza abale na alongo athu toera akhale na cikhulupiro cakuwanga. Mwakusiyana na basa yakumanga nyumba zakuti mukupita kwa ndzidzi zinafudzika, basa yakuwangisa abale na alongo athu inabweresa maphindu a kwenda na kwenda. Natenepa, tendeni ‘tipitirize kubalangazana na kuwangisana unango na ndzace.’—1 Ates. 5:11.