Mibvundzo Inacitwa na Anyakuleri

Kodi nsolo wakuti “Dzina Yanu Mbiceneswe” unagumanika mu Ncenjezi wa Junho 2020 watiphedza tani toera kubvesesa kukhulupira kwathu dzina ya Yahova na utongi wace ukulu?

Mu nsolo unoyu, ife tapfundza cinthu cibodzi cakufunika kakamwe cakuti cisakhuya anthu onsene pabodzi na aanju. Cinthu ceneci ndi kuceneswa kwa dzina ikulu ya Yahova. Natenepa, kutonga kwa Yahova kusabverana na kuceneswa kwa dzina yace. Munjira ibodzi ene, kupitiriza kukhala wakukhulupirika kuna Mulungu ndi kwakufunika kakamwe toera kucenesa dzina ya Yahova.

Thangwi yanji cincino tisalonga kakamwe kuti kuceneswa kwa dzina ya Yahova ndi kwakufunika? Tendeni tione mathangwi matatu.

Yakutoma, Sathani apswipisa dzina ya Yahova m’munda wa Edheni. Mbvundzo udacita Sathani kuna Eva usapangiza kuti Yahova nee ndi wakupasa mwakudzala manja, pontho pitsogolero pidapereka iye kuna Adhamu na Eva nee pikhali pya ufuni. Buluka penepo Sathani alonga pinthu pyakusiyana na pidalonga Yahova. Iye alonga kuti Mulungu ndi wauthambi. Natenepa, iye apswipisa dzina ya Yahova. Iye apaswa dzina ya “Dyabo,” yakuti isabveka “nyakupambizira.” (Juwau 8:44) Nakuti Eva atawira uthambi udalonga Sathani, iye nee abvera Mulungu, pontho apangiza kuti nee akhafuna kutongwa na Iye. (Gen. 3:1-6) Mpaka lero, Sathani asapitiriza kupswipisa dzina ya Yahova mbamwaza uthambi thangwi ya iye. Ale anatawira uthambi unoyu nee asabvera Yahova. Natenepa kuna atumiki a Mulungu, kulonga mwakuipa dzina yakucena ya Yahova ndi cinthu cakuipa kakamwe. Ineyi ndi thangwi ikulu inacitisa kuti pa dziko paoneke nyatwa na uipi.

Yaciwiri, toera kuphedza aanju na anthu, Yahova anadzacenesa dzina yace. Ceneci ndi cinthu cakufunika kakamwe kuna Yahova. Na thangwi ineyi, iye alonga: “Ine ndinadzacenesa dzina yanga ikulu.” (Ezek. 36:23) Pontho Yezu apangiza kuti m’maphembero a atumiki akukhulupirika a Yahova, cinthu cakufunika kakamwe ndi kuceneswa kwa dzina ya Yahova pidalonga iye kuti: “Dzina yanu mbiceneswe.” (Mat. 6:9) Kusiyapo pyenepi, mwakubwereza-bwereza Bhibhlya isalonga kuti tisafunika kupasa mbiri dzina ya Yahova. Mwacitsandzo, onani malemba awa mangasi: “Pasani mbiri dzina yakuthema ya Yahova.” (1 Kro. 16:29; Mas. 96:8) “Imbani nyimbo toera kusimba dzina yace ikulu.” (Mas. 66:2) “Ndinadzapasa mbiri dzina yanu kwenda na kwenda.” (Mas. 86:12) Ubodzi mwa maulendo adalonga Yahova thangwi ya pyenepi kubulukira kudzulu, ndi mu ndzidzi udalonga Yezu pa templo mu Yerusalemu kuti: “Baba, pasani mbiri dzina yanu.” Buluka penepo Yahova atawira: “Ine ndaipasa kale mbiri, pontho ndinadzaipasa mbiri.”—Juwau 12:28.a

Yacitatu, ndzidzi onsene cifuniro ca Yahova cisabverana na dzina yace. Nyerezerani kufunika kwa dzina ya Yahova pakumala kwa mayesero akumalisa kunkhomo kwa Utongi wa Kristu wa Pyaka Cikwi. Aanju na anthu anapibva tani thangwi ya dzina ya Yahova pa ndzidzi unoyu? Toera kutawira mbvundzo unoyu, tendeni tione pinthu piwiri: Kukhulupirika kwa anthu na utongi wa Mulungu. Kodi anthu akukhulupirika anadzapitiriza kuyeserwa toera kupangiza kuti ndi akukhulupirika? Nkhabe. Thangwi pa ndzidzi unoyu iwo anadzakhala aungwiro, pontho cikhulupiro cawo cayeserwa kale. Kusiyapo pyenepi, iwo anadzatambira umaso wakukhonda mala. Kodi aanju na anthu anadzapitiriza kupenula khala Mulungu athema kutonga? Nkhabe. Thangwi pa ndzidzi unoyu iwo anadzakhala akuphatana mbatawira utongi wa Yahova. Mphapo ndiye tani dzina ya Yahova?

Pa ndzidzi unoyu, anthu onsene anadzadziwa undimomwene thangwi ya Yahova, pontho dzina yace inadzaceneswa. Mbwenye dzina ya Yahova inapitiriza kukhala yakufunika kakamwe kuna atumiki ace onsene akukhulupirika kudzulu na pa dziko yapantsi. Thangwi yanji? Thangwi iwo anadzaona Yahova mbapitiriza kucita pinthu pyakudzumatirisa. Nyerezerani basi: Nakuti mwakucepeseka Yezu anadzapereka utongi kuna Yahova, Mulungu ‘anadzakhala ntongi m’bodzi basi wa pinthu pyonsene.’ (1 Akor. 15:28) Buluka penepo, anthu pa dziko yapantsi anadzatsandzaya na “ufulu wa mbiri ya ana a Mulungu.” (Aroma 8:21) Pakumalisa, Yahova anadzakwanirisa cifuniro cace cakucitisa kuti atumiki ace akudzulu na a pa dziko yapantsi akhale akuphatana.—Aef. 1:10.

Pinthu pyenepi pinakhuya tani atumiki a Yahova kudzulu na pa dziko yapantsi? Mwakukhonda penula, ife tinapitiriza kukhala na cifuno cakuwanga ca kusimba dzina ya Yahova. Nyamasalmo Dhavidhi alemba: “Mbasimbwe Yahova Mulungu . . . Dzina yace yakubvekera mbisimbwe kwenda na kwenda.” (Mas. 72:18, 19) Ife tinapitiriza kugumana mathangwi anango toera kusimba Yahova kwenda na kwenda.

Dzina ya Yahova isapangiza pinthu pyonsene thangwi ya iye. Kusiyapo pyenepi, dzina yace isatikumbusambo pya ufuni wace. (1 Juwau 4:8) Ndzidzi onsene tinakumbuka kuti Yahova aticita thangwi ya ufuni, atipasa ntsembe ya ciomboli thangwi ya ufuni, pontho apangiza kuti utongi wace ndi wakulungama thangwi ya ufuni. Ife tinadzaona Yahova mbapitiriza kupangiza ufuni kuna ife kwenda na kwenda. Ife tinadzapitiriza kufuna kukhala na uxamwali wakuwanga na iye ninga Babathu mbatiimba nyimbo zakunsimba kwenda na kwenda.—Mas. 73:28.