NSOLO WA PFUNDZIRO 33
NYIMBO 130 Khalani Akulekererana
Yahova Asafuna Kuti Abale na Alongo Atsalakane Tani Anthu Adacita Madawo?
“Munthu angacita madawo, ife tiri na m’phedzi.” —1 JUW. 2:1
PINAFUNA IFE KUPFUNDZA
Mu nsolo uno tinaona kuti tinapfundzanji na pinthu pidacitika mu mpingo wa ku Korinto mu ndzidzi wakuti m’bale m’bodzi acita madawo makulu.
1. Yahova asafuna kuti anthu acitenji?
YAHOVA acita anthu na ufulu wakusankhula. Imwe musaphatisira ufulu unoyu ndzidzi onsene unacita imwe pisankhulo. Cisankhulo cakufunika kakamwe cakuti munthu anakwanisa kucicita ndi cisankhulo cakuperekeka kuna Yahova na kumulambira pabodzi na abale na alongo athu. Yahova asafuna kuti anthu onsene acite pyenepi. Thangwi yanji? Thangwi iye asafuna anthu, pontho asafuna kuti iwo akhale akutsandzaya. Iye asafuna kuti iwo akhale na uxamwali wakuwanga na iye mbakhala m’maso kwenda na kwenda.—Dheu. 30:19, 20; Agal. 6:7, 8.
2. Yahova asafuna kuti ale adacita madawo acitenji? (1 Juwau 2:1)
2 Ngakhale tenepo, Yahova nee asakakamiza anthu toera kuntumikira. Yahova asatawirisa kuti m’bodzi na m’bodzi asankhule ekhene pinafuna iye kucita. Akulu a mpingo asafunika kucitanji Nkristu wakubatizwa angacita madawo? Iye angakhonda kutcunyuka, asafunika kubuluswa mu mpingo. (1 Akor. 5:13) Ngakhale tenepo, Yahova asafuna kuti munthu unoyu adacita madawo abwerere kuna Iye. Mwandimomwene, Yahova acita masasanyiro a ciomboli toera kulekerera ale anatcunyuka madawo awo. (Lerini 1 Juwau 2:1.) Yahova ndi waufuni kakamwe, pontho asapanga ale adacita madawo toera atcunyuke.—Zak. 1:3; Aroma 2:4; Tiya. 4:8.
3. Tinapfundzanji mu nsolo uno?
3 Yahova asafuna kuti tikhale na manyerezero mabodzi ene na ace thangwi ya madawo na anthu anacita madawo. Nsolo uno unapangiza kuti tinacita tani pyenepi. Ife tinapfundza kuti Paulu apanga abale toera acitenji mu mpingo wa ku Korinto mu ndzidzi wakuti m’bale m’bodzi acita madawo. Pontho tinapfundza kuti Paulu apanga abale toera acitenji pidatcunyuka mamuna unoyu. Kusiyapo pyenepi, tinapfundzambo kuti Yahova asapibva tani thangwi ya anthu adacita madawo.
NINJI PIDACITIKA MU MPINGO WA KU KORINTO?
4. Ninji pidacitika mu mpingo wa ku Korinto? (1 Akorinto 5:1, 2)
4 Lerini 1 Akorinto 5:1, 2. Mu ndzidzi ukhacita iye ulendo wace wacitatu ninga misionaryo, Paulu abva pinthu pyakutsukwalisa pidacitika mu mpingo wa Korinto. M’bale m’bodzi wa mu mpingo unoyu akhacita ulukwali na nkazi wa babace. Ngakhale anthu akuti nee akhalambira Mulungu akhadziwa kuti pyenepi pikhali pyakuipa kakamwe! Mbwenye abale anyerezera kuti m’bale unoyu nee akhafunika kubuluswa mu mpingo. Panango iwo anyerezera kuti thangwi ya kucita pyenepi, akhapangiza kuti ali kubvera ntsisi ninga pinacita Yahova kuna anthu akusowa ungwiro. Mbwenye Yahova nee asatawirisa kuti anthu anacita madawo apitirize kucita khundu ya atumiki ace. Thangwi ya madawo adacita munthu unoyu panango anthu anango akuti nee akhalambira Yahova adzudzumika, pontho akhalonga mwakuipa atumiki a Yahova. Iye mbadapitiriza mu mpingo, Akristu anango panango mbadatoma kucitambo pinthu pikhacita iye. Mphapo Paulu apanga abale toera acitenji?
5. Paulu apanga abale toera acitenji, pontho mafala adalonga iye asabvekanji? (1 Akorinto 5:13) (Onanimbo foto.)
5 Lerini 1 Akorinto 5:13. Yahova atsogolera Paulu toera kulembera tsamba abale mu mpingo wa ku Korinto mbafokotoza kuti munthu anacita madawo mbakhonda kutcunyuka asafunika kubuluswa mu mpingo. Mphapo abale na alongo mu mpingo akhafunika kutsalakana tani munthu unoyu? Paulu aapanga toera ‘asiye kucita uxamwali’ na munthu unoyu. Pyenepi pisabvekanji? Paulu afokotoza kuti pyenepi pikhabvekambo ‘kukhonda kudya na munthu unoyu.’ (1 Akor. 5:11) Tingakhala pabodzi na munthu toera kudya naye, ndi pyakukhonda nentsa toera kucita uxamwali na munthu unoyu. Natenepa, Paulu akhafuna kulonga kuti abale na alongo mu mpingo nee akhafunika kukhala pabodzi na munthu unoyu. Pyenepi mbapidatsidzikiza mpingo toera ukhonde kukhala na anthu a makhaliro akuipa. (1 Akor. 5:5-7) Kusiyapo pyenepi, pyenepi pinakwanisa kuphedza munthu adacita madawo toera adzindikire kuti atsukwalisa Yahova mbatcunyuka.
Yahova atsogolera Paulu toera kulembera tsamba mpingo wa ku Korinto mbaadziwisa kuti nyakudawa wakukhonda tcunyuka asafunika kubuluswa mu mpingo (Onani ndima 5)
6. Abale atawira tani pitsogolero pidapereka Paulu, pontho mamuna adacita madawo adzacitanji?
6 Pidamala iye kutumiza tsamba yace kuna Akristu a ku Korinto, Paulu akhabvundzika khala abale mbadacita pidalonga iye. Tito apanga Paulu mphangwa zakutsandzayisa. Abale abvera pitsogolero pya Paulu mbabulusa mu mpingo munthu unoyu akhacita madawo. (2 Akor. 7:6, 7) Pontho pidamala abale kuphatisira pitsogolero pya Paulu, mamuna unoyu adzatcunyuka. Iye acinja makhaliro ace mbatoma pontho kubvera mitemo ya Yahova. (2 Akor. 7:8-11) Mphapo ndi pinthu pipi pinango pidalonga Paulu kuna abale toera apicite?
ABALE MU MPINGO AKHAFUNIKA KUTSALAKANA TANI MUNTHU ADATCUNYUKA?
7. Ninji pidacitika thangwi yakubulusa mu mpingo munthu adacita madawo? (2 Akorinto 2:5-8)
7 Lerini 2 Akorinto 2:5-8. Paulu alonga: “Nakuti munthu unoyu asandikwa na anthu azinji, pyakwana.” Kusandikwa kudacitwa mamuna unoyu kukhali toera kumphedza kuti atcunyuke, natenepa mpingo nee ukhafunikabve kupitiriza kunsandika.—Aheb. 12:11.
8. Ndi pinthu pipi pinango pidalonga Paulu toera abale na alongo apicite?
8 Paulu apanga abale mu mpingo kuti: “Musafunika kumulekerera na ntima onsene, mbamum’balangaza” na ‘kupangiza kuti imwe musanfuna.’ Onani kuti Paulu akhafuna kuti mpingo ucite pizinji kupiringana basi ene kutawirisa kuti mamuna unoyu abwezereswe. Paulu akhafuna kuti abale apangize mamuna unoyu na mafala awo na macitiro awo kuti mwandimomwene amulekerera, pontho asanfuna. Natenepa m’bale unoyu mbadakhala na cinyindiro cakuti abale na alongo akomerwa thangwi yakubwerera kwace mu mpingo.
9. Thangwi yanji pikhali pyakunentsa kuna anango toera kulekerera m’bale adabwezereswa mu mpingo?
9 Panango pikhali pyakunentsa kuna abale na alongo anango toera kupangiza ufuni kuna mamuna unoyu pidabwezereswa iye mu mpingo. Thangwi yanji tisalonga tenepo? Anango panango akhapitiriza kuipirwa thangwi iye abweresa nyatwa mu mpingo. Pontho anango panango akhapitiriza kutsukwala thangwi ya pinthu pyakuipa pidacita iye. Abale na alongo mu mpingo akhawangisira kakamwe toera kubvera mitemo ya Yahova. Natenepa akhaona kuti ndi kusowa ulungami kuti mamuna unoyu adacita madawo makulu abwezereswe mu mpingo. (Onani Luka 15:28-30.) Mphapo thangwi yanji mpingo ukhafunika kupangiza ufuni wandimomwene kuna m’bale unoyu adabwezereswa?
10-11. Ndi pinthu pipi pyakuti mbapidacitika akulu a mpingo mbadakhonda kulekerera m’bale adatcunyuka?
10 Nyerezerani kuti mamuna unoyu mbadapibva tani akulu a mpingo mbadakhonda kum’bwezeresa pidatcunyuka iye, peno mbadapibva tani abale na alongo mu mpingo mbadakhonda kumpangiza ufuni pidabwezereswa iye? Panango iye ‘mbadatsukwala kakamwe’ mbafewa manungo, peno mbadanyerezera kuti nee anakwanisabve kutumikira pontho Yahova. Panango nee mbadawangisirabve toera kukhala na uxamwali wakuwanga na Mulungu.
11 Ndi pinthu pipi pinango pyakuti mbapidacitika, abale na alongo mbadakhonda kulekerera mamuna unoyu adatcunyuka? Panango iwo mbadaluza uxamwali wawo na Yahova. Thangwi yanji? Thangwi iwo mbadapangiza kuti nee ali kutowezera Yahova wakuti asalekerera nyakudawa angatcunyuka. M’mbuto mwace, iwo mbadatowezera Sathani wakuti ndi wakuipa na wakukhonda bvera ntsisi. Iwo mbadatawirisa kuti Sathani aaphatisire toera kucitisa mamuna unoyu kusiya kutumikira Yahova.—2 Akor. 2:10, 11; Aef. 4:27.
12. Abale na alongo mbadatowezera tani Yahova?
12 Mphapo abale na alongo mu mpingo wa ku Korinto mbadatowezera tani Yahova, m’mbuto mwakutowezera Sathani? Toera kucita pyenepi, iwo akhafunika kulekerera nyakudawa wakutcunyuka, ninga pinacita Yahova. Onani pidalonga anyakulemba Bhibhlya angasi thangwi ya Yahova. Dhavidhi alonga kuti iye ndi ‘wadidi, pontho ali dzololo toera kulekerera.’ (Mas. 86:5) Mikeya alemba: “Mbani Mulungu wakulandana na imwe, wakuti asalekerera madodo na madawo?” (Mik. 7:18) Pontho Izaiya alonga: “Anyakucita pyakuipa mbasiye njira zawo, pontho anyakucita pyauphanga mbasiye manyerezero awo; mbabwerere kuna Yahova, ule wakuti anaabvera ntsisi, mbabwerere kuna Mulungu wathu, wakuti anaalekerera na ntima onsene.”—Iza. 55:7.
13. Thangwi yanji ndi pyakufunika kubwezeresa mu mpingo munthu adatcunyuka? (Onani bokosi yakuti “Mamuna wa ku Korinto Amala Ndzidzi Ungasi Toera Kubwezereswa?”)
13 Toera kutowezera Yahova, abale na alongo mu mpingo wa ku Korinto, akhafunika kupangiza kuti asafuna mamuna unoyu, pontho ali akutsandzaya thangwi ya kubwerera kwace. Paulu alonga kuti iwo angalekerera mamuna unoyu adatcunyuka, mbadapangiza kuti ndi “anthu akubvera mu pinthu pyonsene.” (2 Akor. 2:9) Ndimomwene kuti pakhadapita miyezi yakucepa pakumala kubuluswa kwace mu mpingo, mbwenye iye akhadatcunyuka. Natenepa, akulu a mpingo nee akhafunika kudembuka kumbwezeresa mu mpingo.
TINATOWEZERA TANI ULUNGAMI WA YAHOVA NA NTSISI ZACE?
14-15. Tisapfundzanji na njira idatsalakanwa mamuna wa ku Korinto? (2 Pedhru 3:9) (Onanimbo foto.)
14 Mphangwa zinalonga pya njira idatsalakanwa mamuna wa ku Korinto zalembwa m’Bhibhlya “toera kutipfundzisa.” (Aroma 15:4) Kubulukira mu pinthu pyenepi, ife tisapfundza kuti Yahova nee asatawirisa kuti anthu anacita madawo mbakhonda kutcunyuka apitirize mu mpingo. Anango panango asanyerezera kuti nakuti Yahova ndi wantsisi, iye asatawirisa kuti munthu adacita madawo mbakhonda kutcunyuka apitirize mu mpingo. Mbwenye Yahova nee asapangiza ntsisi munjira ineyi. Maseze Yahova ndi wantsisi, iye nee asatawirisa makhaliro akuipa. Njira inaona iye pinthu pyadidi na pyakuipa nee isacinja. (Yuda 4) Yahova mbadatawirisa kuti anyakudawa akukhonda tcunyuka apitirize mu mpingo, pyenepi nee mbapidapangiza kuti iye ndi wantsisi, thangwi pinaikha pangozwi abale na alongo mu mpingo.—Mis. 13:20; 1 Akor. 15:33.
15 Ife tisapfundza kuti Yahova nee asafuna kuti munthu afudzwe. Iye asafuna kuti anthu onsene apulumuke. Iye asabvera ntsisi anthu anacinja manyerezero awo na macitiro awo mbafuna kukhala pontho na uxamwali na iye. (Ezek. 33:11; lerini 2 Pedhru 3:9.) Pidatcunyuka mamuna wa ku Korinto mbasiya makhaliro ace akuipa, Yahova aphatisira Paulu toera kudziwisa mpingo kuti iye akhafunika kulekererwa mbatambirwa mwadidi.
Ife tisatowezera ufuni wa Yahova na tsisi zace, tingakhala aufuni na akukoma ntima kuna munthu adabwezereswa mu mpingo (Onani ndima 14-15)
16. Musapibva tani thangwi ya njira idatsalakanwa mamuna wa ku Korinto?
16 Citsandzo ca mpingo wa ku Korinto cisapangiza kuti Yahova ndi waufuni na waulungami. (Mas. 33:5) Kupfundza pyenepi kusatikulumiza toera kusimba kakamwe Yahova. Ife tisapereka takhuta kakamwe na ntsisi zace, thangwi tonsene ndife anyakudawa, pontho tisafuna kulekererwa. Ife tisaperekambo takhuta kuna Yahova thangwi ya masasanyiro adacita iye a ciomboli toera kulekerera madawo athu. Pisatiwangisa kakamwe kudziwa kuti Yahova asafuna anthu, pontho asafuna kuti iwo akhale na umaso wakutsandzaya.
17. Ndi mibvundzo ipi inafuna kutawirwa m’misolo inatowera?
17 Munthu angacita madawo makulu lero, akulu a mpingo anatowezera tani ufuni wa Yahova na kuphedza munthu unoyu toera atcunyuke? Abale na alongo mu mpingo asafunika kucitanji akulu a mpingo angabulusa peno kubwezeresa munthu unoyu mu mpingo? Mibvundzo ineyi inatawirwa m’misolo inatowera.
NYIMBO 109 Tifunane na Ntima Onsene