Nyerezerani Pontho Ntsonga Zakufunika

Kodi mwanentseka kale toera kukumbuka pinthu pidamala imwe kupfundza? Pyenepi pisacitika kuna ife tonsene. Mphapo ninji pinafuna kutiphedza? Kunyerezera ntsonga zakufunika.

Mu ndzidzi unapfundza imwe, limirani toera kulemba ntsonga zakufunika kakamwe. Mpostolo Paulu apanga anthu akhafuna kuleri matsamba ace toera acite pyenepi. Iye alonga: ‘Cinthu cakufunika kakamwe ndi ici.’ (Aheb. 8:1) Munjira ineyi, iye aphedza anyakuleri toera kubvesesa pinthu pikhalonga iye, pontho aaphedza kubvesesa kuti ntsonga ibodzi na ibodzi isabverana tani.

Imwe munakwanisa kukoya mphindi khumi pakumala kucita pfundziro ya munthu paekha, toera kunyerezera ntsonga zakufunika kakamwe zidapfundza imwe. Mungakhonda kukumbuka pidapfundza imwe, onani pontho misolo ming’ono-ming’ono peno lerini nzera wakutoma wa ndima ibodzi na ibodzi idapfundza imwe. Pyenepi pinakuphedzani toera kukumbuka pidapfundza imwe. Khala mwapfundza cinthu cipswa, yeserani kucifokotoza na mafala anu ene. Munganyerezera ntsonga zakufunika, nee munaduwala pinthu pidapfundza imwe, pontho munabvesesa mwadidi kuti munapiphatisira tani mu umaso wanu.