Mwazani Mphangwa Mwaphinga Ninga Yezu

1. Mboni za Yahova zasiyana tani na ale analonga kuti ndi Akristu?

ATUMIKI a Yahova asafuna kakamwe kumwaza mphangwa zadidi, pontho asacita basa ineyi mwaphinga. Pyenepi pisaacitisa kukhala akusiyana na anthu anango analonga kuti ndi Akristu. (Tito 2:14) Mbwenye m’midzidzi inango pisanentsa kukhala waphinga. Panango munapibva ninga nkulu wa mpingo m’bodzi adalonga kuti: “Midzidzi inango, nee ndisakhala na cifuno cakumwaza mphangwa.”

2. Thangwi yanji midzidzi inango panango pinanentsa kukhala aphinga m’basa yakumwaza mphangwa?

² Panango imwe musakomerwa kakamwe kutumikira Yahova munjira zinango kupiringana basa yakumwaza mphangwa. Thangwi yanji? Thangwi tingamanga na kusasanyira Nyumba za Umambo, kuphedza abale na alongo adagwerwa na cidengwa na kuawangisa, tisakwanisa kuona kuti basa idacita ife yaphedza tani abale na alongo athu. Kusiyapo pyenepi, ife tisatsandzaya kakamwe kukhala m’mbuto zenezi thangwi tisafunana, tisakhala muntendere, pontho tisapibva kuti abale na alongo asapereka takhuta thangwi ya pinthu pinacita ife. Mbwenye panango tamwaza mphangwa mu pyaka pizinji mucisa cibodzi cene, pontho taona kuti ndi anthu akucepa anafuna kubvesera mphangwa zathu. Kusiyapo pyenepi, nakuti kumala kwa dziko ino kuli dhuzi kakamwe, anthu asapitiriza kutiida. (Mat. 10:22) Mphapo ninji pinafuna kutiphedza toera kupitiriza kukhala aphinga peno kuthimizira phinga yathu m’basa yakumwaza mphangwa?

3. Mwakubverana na Luka 13:6-9, tisapfundzanji na phinga ikhali na Yezu?

³ Pinthu pidacita Yezu pinakwanisa kutiphedza toera kukhala aphinga m’basa yakumwaza mphangwa. Pikhali iye pa dziko yapantsi, Yezu apitiriza kumwaza mphangwa mwaphinga. (Lerini Luka 13:6-9.) Yezu alandanisa basa yace na kuwangisira kukhacita mamuna m’bodzi akhaphata basa m’munda wa mauva. Mamuna unoyu atceka nsambvu mbautsalakana mu pyaka pitatu, mbwenye nee ukhabala misapo. Munjira ibodzi ene, Yezu amwazira mphangwa Ayuda mu pyaka pitatu, mbwenye azinji a iwo nee atawira mphangwa zace. Ngakhale tenepo, ninga mamuna ule wakuti nee asiya kutsalakana nsambvu wace, Yezu nee asiya kuphedza anthu na kuamwazira mphangwa mwaphinga.

4. Ndi pinthu pipi pinai pinafuna ife kupfundza mu nsolo uno?

⁴ Mu nsolo uno, tinapfundza kuti Yezu apitiriza tani kukhala waphinga m’basa yakumwaza mphangwa, makamaka m’miyezi yace mitanthatu yakumalisa pa dziko yapantsi. (Onani nota de estudo “Depois disso” pa Luka 10:1) Kubvera pidapfundzisa Yezu na kuntowezera kunatiphedza toera tikhale aphinga. Natenepa tinapfundza pinthu pinai thangwi ya Yezu pyakuti pinatiphedza toera tikhale aphinga ninga iye: (1) Iye akhaikha cifuno ca Yahova pa mbuto yakutoma, (2) akhabvesesa maprofesiya a Bhibhlya, (3) akhanyindira kuti Yahova anamphedza, pontho (4) akhali na maonero adidi thangwi ya anthu.

AKHAIKHA CIFUNO CA YAHOVA PA MBUTO YAKUTOMA

5. Yezu apangiza tani kuti akhaikha cifuno ca Mulungu pa mbuto yakutoma?

⁵ Yezu amwaza mphangwa zadidi mwaphinga thangwi akhadziwa kuti Mulungu akhafuna kuti iye acite pyenepi. (Luka 4:43) Basa yakumwaza mphangwa ikhali yakufunika kakamwe mu umaso wace. Ngakhale miyezi yakumalisa ya utumiki wace, iye akhapitiriza kuenda “nzinda na nzinda, cisa na cisa mbakapfundzisa anthu.” (Luka 13:22) Yezu apfundzisambo anango toera amwaze mphangwa zadidi ninga iye.—Luka 10:1.

6. Mabasa anango n’gulu ya Yahova asaphedzera tani basa yakumwaza mphangwa? (Onanimbo foto.)

⁶ Mpaka lero, basa yakumwaza mphangwa isapitiriza kukhala yakufunika kakamwe kuna Yahova na Yezu. (Mat. 24:14; 28:19, 20) Mwandimomwene, mabasa onsene anacita ife mu gulu ya Yahova asaphedzera basa yakumwaza mphangwa. Mwacitsandzo, tisamanga Nyumba za Umambo toera anthu anapfundza Bhibhlya alambire Yahova mwenemo. Kusiyapo pyenepi, mabasa onsene anacitwa pa Bheteli ndi toera kuphedzera basa yakumwaza mphangwa. Pontho ife tisaphedza abale na alongo athu adagwerwa na cidengwa. Ife tisacita pyenepi tayu basi ene toera kuapasa pinthu pidasowa iwo, mbwenye toera kuaphedzambo kuti apitirize kulambira Yahova pyakuti pisaphataniza kumwaza mphangwa. Natenepa tingakumbuka kuti basa yakumwaza mphangwa ndi yakufunika kakamwe kuna Yahova, tinakulumizika toera kucita basa ineyi mwaphinga. M’bale János anatumikira ninga nkulu wa mpingo ku Húngria alonga: “Ndisawangisira toera kukumbuka kuti nkhabepo basa inango inacita ife mu gulu ya Yahova yakuti inapitira mbuto basa yakumwaza mphangwa. Iyo ndi yakufunika kakamwe.”

7. Thangwi yanji Yahova asafuna kuti tipitirize kumwaza mphangwa? (1 Timoti 2:3, 4)

⁷ Ife tinakwanisa kuthimizira phinga yathu yakumwaza mphangwa, tingaona pinthu munjira inapiona Yahova. Iye asafuna kuti anthu onsene atawire mphangwa zadidi toera apulumuswe. (Lerini 1 Timoti 2:3, 4.) Na thangwi ineyi, iye asatiphedza toera kuthimizira maluso athu akumwaza mphangwa. Mwacitsandzo, tiri na bhruxura yakuti Funani Anthu—Citani Anyakupfundza yakuti isatipasa maonero akuti tinatomesa tani makani na cifuno cakutomesa pfundziro ya Bhibhlya. Maseze akhonde kutumikira Yahova cincino, panango anakhala na mwai wakucita pyenepi nyatwa ikulu mbidzati kumala. Pinthu pinaapanga ife cincino, panango pinaaphedza ntsogolo toera acite cisankhulo ceneci. Mbwenye pyenepi basi ene pinacitika tingapitiriza kumwaza mphangwa.

AKHABVESESA MAPROFESIYA A BHIBHLYA

8. Ndi maprofesiya api a m’Bhibhlya adaphedza Yezu toera kuphatisira mwadidi ndzidzi wace?

⁸ Yezu akhadziwa kuti maprofesiya anango a m’Bhibhlya mbadakwanirisika tani. Mwacitsandzo, iye akhadziwa kuti mbadacita basa yakumwaza mphangwa mu pyaka pitatu na miyezi mitanthatu. (Dhan. 9:26, 27) Yezu akhadziwambo ndzidzi ukhafuna iye kuphiwa, pontho kuti mbadafa tani. (Luka 18:31-34) Natenepa, iye akhaphatisira mwadidi ndzidzi wace mbakamwaza mphangwa zadidi mwaphinga toera kumalisa basa yace.

9. Thangwi yanji kubvesesa maprofesiya a m’Bhibhlya kusatiphedza toera kumwaza mphangwa mwaphinga?

⁹ Kubvesesa maprofesiya a m’Bhibhlya kusatiphedza toera kumwaza mphangwa mwaphinga, thangwi tisadziwa kuti thimize pano dziko ino inamala. Bhibhlya ikhadalonga pinthu pikhafuna kucitika mu ntsiku zakumalisa, pontho yalonga kuti anthu mbadakhala tani mu ntsiku zenezi. Ife tisaona pinthu pyenepi mbapikacitika. Ife tisaonambo kuti Utongi wa Dziko Yonsene wa Anglo-Amerikana na Rusya, kuphatanizambo ale anaaphedzera ali kukwanirisa profesiya inalonga kuti mambo wakunterero na mambo wakunkwiriro mbadamenyana “mu ndzidzi wakumalisa.” (Dhan. 11:40) Kusiyapo pyenepi, tisabvesesa kuti miyendo ya dzimunthu inalongwa pa profesiya ya Dhanyeli isaimirira Utongi wa Dziko Yonsene wa Anglo-Amerikana. Ife tiri na cinyindiro cakuti thimize pano, Umambo wa Mulungu unafudza mautongi onsene a anthu. Maprofesiya anewa asapangiza kuti ndzidzi unafuna kucitika pyenepi uli dhuzi kakamwe, pontho tisafunika kumwaza mphangwa zadidi mwakucimbiza.

10. Maprofesiya a m’Bhibhlya asatiphedza tani toera tipitirize kumwaza mphangwa?

¹⁰ M’maprofesiya a Bhibhlya muli na mphangwa zadidi zakuti tisafuna kupangambo anango. Mulongo Carrie anakhala ku República Dominicana alonga: “Ndinganyerezera pinthu pyadidi kakamwe pinafuna kucita Yahova ntsogolo, ine ndisakhala na cifuno cakupanga anango pinthu pyenepi. Nyatwa zinatamba anthu zisapangiza kuti iwo asafunika kudziwa mphangwa zenezi zadidi.” Kusiyapo pyenepi, maprofesiya a m’Bhibhlya asapangiza kuti Yahova ndzidzi onsene asatiphedza m’basa yakumwaza mphangwa. Leila anakhala ku Hungria alonga: “Lemba ya Izaiya 11:6-9 isandikumbusa kuti anthu onsene anakwanisa kucinja na ciphedzo ca Yahova. Na thangwi ineyi, ine ndisafuna kumwaza mphangwa zadidi kuna anthu onsene, ngakhale kuna ale anaoneka ninga nee anatawira. M’bale Christopher wa ku Zambiya alonga: “Lemba ya Marko 13:10 isalonga kuti mphangwa zadidi mbazidamwazwa pa dziko yonsene. Natenepa ndi mwai ukulu kakamwe kuphedzera kukwanirisika kwa profesiya ineyi.” Ndiye tanimbo imwe? Ndi maprofesiya api a m’Bhibhlya anakuphedzani toera mupitirize kumwaza mphangwa?

AKHANYINDIRA KUTI YAHOVA ANAMPHEDZA

11. Thangwi yanji Yezu akhafunika kunyindira Yahova toera apitirize kumwaza mphangwa mwaphinga? (Luka 12:49, 53)

¹¹ Yezu akhanyindira kuti Yahova mbadamphedza toera apitirize kumwaza mphangwa mwaphinga. Iye akhalonga mwadidi na mwacilemedzo. Ngakhale tenepo, Yezu akhadziwa kuti mphangwa zadidi mbazidacitisa anango kuipirwa. (Lerini Luka 12:49, 53.) Thangwi yakumwaza mphangwa zadidi, atsogoleri a mauphemberi ayesera kumupha mwakubwereza-bwereza. (Juw. 8:59; 10:31, 39) Ngakhale tenepo, Yezu apitiriza kumwaza mphangwa thangwi akhadziwa kuti Yahova akhali na iye. Yezu alonga: “Nee ndiri ndekhene, mbwenye baba adandituma ali na ine. . . . Iye nee anandisiya ndekhene, thangwi ndzidzi onsene ndisacita pinthu pinakomerwa na iye.”—Juw. 8:16, 29.

12. Yezu aphedza tani anyakupfundzace toera apitirize kumwaza mphangwa angatsalakanwa mwakuipa?

¹² Yezu akumbusa anyakupfundzace kuti akhafunikambo kunyindira Yahova. Mwakubwereza-bwereza Yezu aapanga kuti Yahova mbadaaphedza, ngakhale atsalakanwe mwakuipa. (Mat. 10:18-20; Luka 12:11, 12) Yezu aapangambo toera akhale akucenjera. (Mat. 10:16; Luka 10:3) Iye aapanga toera akhonde kukakamiza anthu kutawira mphangwa za Umambo. (Luka 10:10, 11) Kusiyapo pyenepi, aapangambo toera athawe pingafunika. (Mat. 10:23) Ngakhale kuti Yezu akhali waphinga, pontho akhanyindira Yahova, iye nee akhaikha umaso wace pangozwi mwakusowa mathangwi.—Juw. 11:53, 54.

13. Thangwi yanji munakwanisa kukhala na cinyindiro cakuti Yahova anakuphedzani?

¹³ Lero, ife tisafunikambo kunyindira ciphedzo ca Yahova toera timwaze mphangwa mwaphinga maseze titsalakanwe mwakuipa. (Apok. 12:17) Thangwi yanji munakwanisa kunyindira kuti Yahova anakuphedzani? Thangwi ya pinthu pidaphemba Yezu m’phembero inagumanika pa Juwau kapitulu 17. Yezu aphemba Yahova toera atsalakane apostolo, pontho Yahova atawira phembo ineyi. Bukhu ya Mabasa isapangiza kuti Yahova aphedza tani apostolo toera kumwaza mphangwa mwaphinga maseze akhatsalakanwa mwakuipa. Mu phembero ibodzi ene, Yezu aphembambo Yahova toera atsalakane ale akhafuna kutawira mphangwa za apostolo. M’bodzi wawo ndimwe. Yahova asapitiriza kucita pyenepi lero. Iye anakuphedzani munjira ibodzi ene idaphedza iye apostolo.—Juw. 17:11, 15, 20.

14. Tisadziwa tani kuti tinakwanisa kupitiriza kumwaza mphangwa mwaphinga? (Onanimbo foto.)

¹⁴ Maseze pikhale pyakunentsa kakamwe kumwaza mphangwa zadidi mwaphinga ntsiku zino zakumalisa, Yezu atipasa cinyindiro cakuti tinaphedzwa. (Luka 21:12-15) Ninga Yezu na anyakupfundzace, ife tisasiya kuti anthu asankhule okhene khala anabvesera mphangwa zathu peno nkhabe. Pontho nee tisaketesana nawo. Ngakhale m’mbuto zakuti basa yathu isakhondeswa, abale na alongo athu asakwanisa kumwaza mphangwa thangwi asanyindira Yahova, tayu mphambvu zawo. Munjira ibodzi ene idapasa Yahova mphambvu atumiki ace nduli, iye anatipasambo mphambvu toera “basa yakumwaza mphangwa iphatwe mwakukwana,” mwakubverana na cifuno cace. (2 Tim. 4:17) Natenepa, nyindirani Yahova, pontho iye anakuphedzani toera mumwaze mphangwa mwaphinga.

AKHALI NA MAONERO ADIDI THANGWI YA ANTHU

15. Tisadziwa tani kuti Yezu akhali na maonero adidi thangwi ya basa yakumwaza mphangwa?

¹⁵ Yezu akhali na maonero adidi thangwi ya basa yakumwaza mphangwa. Pyenepi pyamphedza toera apitirize kukhala waphinga. Mwacitsandzo, pidapita caka cibodzi pakumala kutoma basa yakumwaza mphangwa, Yezu aona kuti anthu azinji akhafuna kubvesera mphangwa zadidi. Iye alandanisa anthu anewa na munda ukhali na pyakudya pyakuti pikhadamala kutokota toera kubvunwa. (Juw. 4:35) Pidapita caka cibodzi, iye apanga anyakupfundzace: “Basa yakubvuna ndi ikulu, mbwenye anyabasa ndi akucepa.” (Mat. 9:37, 38) Mukupita kwa ndzidzi, iye alonga pontho: “Mwandimomwene, basa yakubvuna ndi ikulu . . . phembani Mwanaciro munda kuti atumize anyabasa toera kubvuna.” (Luka 10:2) Yezu apitiriza kukhala na cinyindiro cakuti anthu mbadatawira mphangwa zadidi, pontho iye akhatsandzaya iwo angacita pyenepi.—Luka 10:21.

16. Misangani ya Yezu yaphedza tani anyakupfundzace toera akhale na maonero adidi thangwi ya basa yakumwaza mphangwa? (Luka 13:18-21) (Onanimbo foto.)

¹⁶ Toera kuphedza anyakupfundzace kuti apitirize kukhala aphinga, Yezu aapangiza kuti mphangwa zadidi mbazidaphedza tani anthu. Mwacitsandzo, onani misangani miwiri idaphatisira iye. (Lerini Luka 13:18-21.) Yezu aphatisira nsangani wa mbeu ya mostardha toera kuapfundzisa kuti mphangwa za Umambo mbazidamwazika, pontho nkhabe cinthu cikhafuna kupingiza pyenepi. Mu nsangani unango, iye aphatisira ntombwe wakutupisa mikate toera kupangiza kuti mphangwa za Umambo mbazidamwazika na kucitisa anthu anafuna kuzitawira kucinja umaso wawo, ngakhale pikwate ndzidzi toera macinjo anewa aoneke. Natenepa, Yezu aphedza anyakupfundzace toera kubvesesa kuti mphangwa zadidi zikhamwaza iwo mbazidaphedza anthu azinji.

17. Thangwi yanji tisafunika kupitiriza kumwaza mphangwa zadidi mwaphinga?

¹⁷ Tinganyerezera kuti basa yakumwaza mphangwa iri kuphedza anthu azinji kakamwe pa dziko yonsene yapantsi, ife tisakhala na cifuno cakupitiriza kumwaza mphangwa mwaphinga. Pyaka pyonsene, anthu azinji kakamwe asagumanika pa Cikumbuso, pontho asapfundza Bhibhlya na ife. Kusiyapo pyenepi, azinji asabatizwa mbatoma kumwaza mphangwa pabodzi na ife. Nee tisadziwa kuti ndi angasi anafuna kutawira mphangwa zathu. Pinadziwa ife ndi pyakuti Yahova ali kugumanya mwinji ukulu unafuna kupulumuka pa nyatwa ikulu. (Apok. 7:9, 14) Yahova ndi Mwanaciro munda, pontho asadziwa kuti ndi angasi anafuna kutawira. Natenepa, tiri na mathangwi adidi toera tipitirize kumwaza mphangwa.

18. Ninji pinafuna ife kuti anthu adzindikire thangwi ya ife?

¹⁸ Kutomera kale, anyakupfundza a Yezu asadziwika na phinga yawo m’basa yakumwaza mphangwa. Mwacitsandzo, apostolo amwaza mphangwa mwacipapo na mwaphinga mbacitisa anthu ‘kudzindikira kuti iwo akhali pabodzi na Yezu.’ (Mabasa 4:13) Lero, anthu angationa m’basa yakumwaza mphangwa, ife tisafuna kuti iwo akhale na cinyindiro cakuti tisatowezerambo phinga ya Yezu pakumwaza mphangwa zadidi.