Ife Tisapfundziswa na Mpfundzisi Wathu Wankulu

CITSANDZO CA ANYAKUBALANGA

Kunkhomo kwa caka ca 1950, anyakubalanga afuluka ku Italya mbaenda ku Kindersley, provinsya ya Saskatchewan, Kanadha. Buluka penepo, iwo apfundza undimomwene, pontho undimomwene unoyu wadzakhala wakufunika kakamwe kuna pai wanga, mai wanga, m’bale wanga wankulu na abale anga anango awiri atsikana. Ndisakumbuka kuti pikhali ine mwana ndikhaenda kazinji kene m’basa ya m’munda na anyakubalanga, pontho tikhamala ndzidzi uzinji m’basa ineyi. Natenepa, midzidzi inango pakucedza ndisalonga kuti ndatumikira ninga “mpainiya wakuphedza” pikhali ine na pyaka pisere pyakubalwa!

Maseze anyakubalanga akhali akutcerenga, iwo akhawangisira toera kutumikira Yahova. Mwacitsandzo, mu caka ca 1963, iwo agulisa pinthu pyawo pizinji toera kukhala na kobiri kuti akwanise kuenda ku nsonkhano wa gawo unacemerwa abale na alongo a madziko anango ku Pasadena, Califórnia, E.U.A. Mu caka ca 1972 tafuluka mbatienda ku nzinda wa Trail, ku Colúmbia Britânica, Kanadha, kwakuti kukhali nsindzo wa makilometru 1.000 buluka kukhali ife. Ife tacita pyenepi toera kuphedzera basa yakumwaza mphangwa kuna anthu analonga Ciitaliya mu cisa ceneci. Pai wanga akhaphata basa ninga nyakuonera nyumba. Toera kutumikira Yahova, iye akhonda mabasa mazinji akuti mbadatambira kobiri izinji.

Ine ndisapereka takhuta kuna anyakubalanga thangwi yakukhazikisa citsandzo cadidi kuna ine na kuna abale anga atatu. Iwo ndi adatoma kundipfundzisa m’basa ya Yahova. Iwo andipfundzisambo cinthu cakuti cipo ndinaciduwala: Ndingaikha Umambo pa mbuto yakutoma, Yahova ananditsalakana.—Mat. 6:33.

KUTOMA BASA YA NDZIDZI ONSENE

Mu caka ca 1980, ine ndamanga banja na mulongo wakubalika anacemerwa Debbie, pontho wakuti akhafuna kakamwe kutumikira Yahova. Nakuti tikhafuna kutumikira m’basa ya ndzidzi onsene, Debbie atoma kutumikira ninga mpainiya pidapita miyezi mitatu pakumala kumanga banja. Pidapita caka cibodzi, ife tafuluka mbatienda ku mpingo ukhali na amwazi mphangwa akucepa, pontho ine ndatomambo kutumikira ninga mpainiya pabodzi na nkazanga.

Mukupita kwa ndzidzi, ife tafewa manungo, pontho tikhafuna kufuluka. Mbwenye pakutoma talonga na muyang’aniri wa cisa. Mwaufuni iye atipanga undimomwene: “Imwe muli kuthimizira nyatwa zanu mwekhene. Thangwi basi ene muli kunyerezera pinentso pinathimbana na imwe. Mbwenye mungasaka pinthu pyadidi, imwe munapigumana.” Unoyu ukhali uphungu wakufunika kuna ife. (Mas. 141:5) Mwakukhonda dembuka, ife taphatisira uphungu unoyu, pontho tadzindikira kuti mwandimomwene tikhacitikirwa na pinthu pizinji pyadidi. Azinji mu mpingo akhafuna kucita pizinji m’basa ya Yahova, kuphatanizambo aphale, atsikana na anango akuti acibale awo nee akhatumikira Yahova. Pyenepi pyatipfundzisa kuti tinganyindira Yahova, iye anatiphedza kupirira nyatwa zakuti panango zisaoneka ninga zakunentsa kakamwe. (Mik. 7:7) Pinthu pyadzacinja mbatikhala pontho akutsandzaya.

Apfundzisi a xikola yathu yakutoma ya upainiya akhadatumikira m’madziko anango. Iwo atipangiza mafoto, pontho alonga nyatwa zidatamba iwo na nkhombo zidakhala na iwo mu ndzidzi ukhatumikira iwo m’madziko anango ninga amisionaryo. Pyenepi pyaticitisa kufuna kutumikirambo ninga amisionaryo.

Toera kukwanirisa cifuno cathu, mu caka ca 1984 ife tafuluka mbatienda ku Quebec, kwakuti kusalongwa Cifransa, nsindzo wa makilometru 4.000 buluka ku Colúmbia Britânica. Kweneko tikhafunika kupfundza makhaliro mapswa na cilongero cipswa. Cinentso cinango cikathimbana na ife cikhali cakusowa kobiri. Midzidzi inango toera kudya tikhafunika kukumba maphuphu a bambaya m’munda mukhatawiriswa ife na mwanaciro. Debbie akhaphika bambaya unoyu munjira zakusiyana-siyana. Mwakukhonda tsalakana nyatwa zenezi, ife takwanisa kupirira mwakutsandzaya. Pontho tikhali na cinyindiro cakuti Yahova akhatitsalakana.—Mas. 64:10.

Ntsiku inango, abale a ku Bheteli aligari mwakukhonda dikhira. Iwo atipanga toera tiende katumikira ku Bheteli ya ku Kanadha. Ife tikhadaprenxeri mapetisau toera kuenda ku Xikola ya Jiliyadhi. Natenepa maseze tatsandzaya pidacemerwa ife toera katumikira ku Bheteli, ife tatsukwalambo. Ngakhale tenepo, tatawira kuenda katumikira ku Bheteli. Pidafika ife, tabvundza m’bale Kenneth Little, m’bodzi wa komiti ya filiali kuti “tinacitanji tingacemerwa ku Xikola ya Jiliyadhi?” Iye atawira: “Tinacedza thangwi ya pyenepi mungacemerwa.”

Pidapita sumana ibodzi, ine na Debbie tacemerwa toera kuenda ku Xikola ya Jiliyadhi. Natenepa tikhafunika kucita cisankhulo. M’bale Little atipanga: “Mwakukhonda tsalakana cinthu cinafuna imwe sankhula, ntsiku zinango munanyerezera kuti mbapidakhala mwadidi khala mwasankhula cinthu cinango. Pisankhulo piwiri pyene ndi pyadidi. Yahova anapasa nkhombo cisankhulo cinafuna imwe kucita. Ife tatawira kuenda ku Xikola ya Jiliyadhi, pontho mukupita kwa ndzidzi, ife taona kuti mafala adalonga m’bale Little akhali andimomwene. Ife tikhalonga mafala awo kuna abale na alongo anango akuti ninga ife akhafunambo kusankhula basa toera kutumikira Yahova.

UMASO WATHU NINGA AMISIONARYO

Ife tatsandzaya kucita khundu ya anyakupfundza 24 a turma 83 ya Xikola ya Jiliyadhi. Pyenepi pyacitika mu Abril wa 1987 ku Brooklyn, Nova York. M’bale Ulysses Glass na Jack Redford akhali apfundzisi athu. Miyezi mixanu yapita mwakucimbiza kakamwe, pontho ife tagradhuwari pa ntsiku 6 ya Setembro ya 1987. Ife tapangwa toera tiende katumikira ku Haiti, pabodzi na John na Marie Goode.

Amisionaryo akhabuluka ku Jiliyadhi nee akhatumizwa ku Haiti kutomera mu caka ca 1962, pidathamangiswa amisionaryo mu dziko ineyi. Pidapita masumana matatu pakumala kugradhuwari, ife taenda katumikira ku Haiti pa mpingo ung’ono wa amwazi mphangwa 35 ku mapiri, kwakuti kukhali kutali na nzinda. Ife tikhali aphale, nee tikhadziwa pizinji, pontho tikhali n’nyumba ibodzi ene na amisionaryo anango. Anthu a mucisa cikhali ife, akhali akutcerenga kakamwe, pontho azinji nee akhadziwa leri. Mu ndzidzi ukhali ife mucisa ceneci, anthu akhacita uviyaviya, anyankhondo akhacinja ntongi mwakukakamiza, pontho mukhacitika pyondzi.

Ife tapfundza pizinji thangwi yakupirira na kutsandzaya kwa abale na alongo a ku Haiti. Azinji akhathimbana na nyatwa, mbwenye akhafuna Yahova, pontho akhakomerwa na basa yakumwaza mphangwa. Mulongo m’bodzi wakukalamba nee akhadziwa leri, mbwenye akhakwanisa kukoya Malemba cifupi na 150 mu nsolo. Nyatwa zikhacitika mu cisa ceneci zikhaticitisa kufuna kakamwe mphangwa za Umambo wa Mulungu wakuti unamalisa nyatwa za anthu. Ndi pyakutsandzayisa kakamwe kuona anango mwa anyakupfundzathu akutoma a Bhibhlya mucisa ceneci mbatumikira ninga apainiya a ndzidzi onsene, apainiya akupambulika na akulu ampingo.

Pikhali ife ku Haiti, ife tadziwana na m’phale unango wakuti akhali misionaryo wa uphemberi wa Mórmon, pontho ife takhala na mwai wakucedza naye thangwi ya Bhibhlya kazinji kene. Pidapita pyaka pingasi ife tatambira tsamba yace. Iye alemba: “Ine ndinabatizwa pa nsonkhano wa cisa unatowera! Ndisafuna kubwerera ku Haiti toera ndikatumikire ninga mpainiya wakupambulika mbuto ibodzi ene ikhali ine misionaryo wa Mórmon.” Iye acitadi pyenepi, pontho atumikira mu pyaka pizinji pabodzi na nkazace.

KU EUROPA NA KU AFRIKA

Pidatoma pontho basa ya kumwaza mphangwa mu dziko ibodzi ya ku Europa, ife tapangwa toera kuenda katumikira kweneko. Mu caka ca 1992 ife taenda ku Liubliana, dziko ya Eslovénia, dhuzi na kudakula anyakubalanga mbadzati kufuluka kuenda ku Italya. Mu ndzidzi unoyu, n’dziko yakuti kale ikhacemerwa Iugoslávia mukhali na nkhondo. Filiali ya ku Viena, Áustria, kuphatanizambo maofesi a ku Zagreb, Croácia, na Belgrado ya ku Sérvia, akhayang’anira basa yakumwaza mphangwa n’dziko ineyi. Mbwenye mu ndzidzi unoyu, dziko ibodzi na ibodzi mbidakhala na Bheteli yawo.

Natenepa tikhafunika kupfundza cilongero cipswa na makhaliro mapswa. Anthu a kweneko asalonga: “Jezik je težek,” mafala akuti asabveka “cilongero ndi cakunentsa.” Unoyu ukhali undimomwene! Ife tadzumatirwa na kukhulupirika kwa abale na alongo, thangwi iwo akhali dzololo toera kutawira macinjo akhacita gulu, pontho taona nkhombo zidaapasa Yahova. Taonambo kuti Yahova asasasanyira pinthu mwaufuni, pontho asacita pyenepi mu ndzidzi wakuthema. Ife tapfundza pinthu pizinji pikhali ife ku Eslovénia, pontho pinthu pikhadapfundza ife m’mbuto zinango pyatiphedza toera kupirira pinentso pikhathimbana na ife kweneko.

Mbwenye ife tapitiriza kutambira macinjo. Mu caka ca 2000, tacinjwa toera kuenda katumikira ku Costa do Marfim, Afrika. Mbwenye thangwi ya nkhondo, mwezi wa Novembro wa 2002, ife tathawira ku Serra Leoa. Nkhondo yakuti yacitika mu pyaka 11 ikhamala kwene mu dziko ineyi. Pikhali pyakunentsa kubuluka ku Costa do Marfim mwakututumusa. Natenepa, pinthu pidapfundza ife pyatiphedza toera kupitiriza kukhala akutsandzaya.

Ife basi ene tikaikha manyerezero athu kuna anthu azinji akhatawira kupfundza undimomwene na abale na alongo aufuni akuti akhadamala kutamba nkhondo mu pyaka pizinji. Iwo akhali akutcerenga, mbwenye akhapasambo anango pinthu pikhali na iwo. Mulongo m’bodzi apasa nguwo Debbie. Pakutoma Debbie akhonda, mbwenye mulongo alonga: “Mu ndzidzi wa nkhondo abale na alongo a madziko anango atiphedza. Cincino ndi ndzidzi wangambo toera kuphedza anango.” Ife tatowezera citsandzo ca abale na alongo anewa.

Ife tabwerera ku Costa do Marfim, mbwenye uviyaviya ukhapitiriza. Natenepa, mwezi wa Novembro wa 2004, ife takwatwa na ndeka mbatibuluka mu dziko ya Costa do Marfim, mbwenye m’bodzi na m’bodzi wa ife, basi ene abuluka na pasta ibodzi ing’ono. Ntsiku ineyi namasiku, ife tagona pantsi, pa mbuto ikhali anyankhondo a ku Fransa, pontho mangwana mwace takwatwa mbatienda ku Suisa. Pidafika ife tcititciti, komiti ya filiali na apfundzisi a Escola de Treinamento Ministerial pabodzi na akazawo atitambira mwadidi, atikhumbatira, atipasa cakudya cakupisa na maxokolati a ku Suisa. Pyenepi pyaticitisa kupibva kuti tisafuniwa kakamwe.

Ife tatumikira ku Gana mu ndzidzi wakucepa, buluka penepo tabwerera ku Costa do Marfim mu ndzidzi udathowa uviyaviya. Ufuni wa abale na alongo watiphedza toera kupirira macinjo anewa. Ine na Debbie taona kuti maseze ndi nsambo wa atumiki a Yahova kupangiza ufuni, tikhafunika kupereka takhuta thangwi ya pyenepi. Mwandimomwene, ife tadzindikira kuti midzidzi ineyi yakunentsa ikhacita khundu yakupfundziswa kwathu.

KU MÉDIO ORIENTE

Mu caka ca 2006, ife tatambira tsamba idabuluka ku ofesi ikulu ya Mboni za Yahova, pontho tsamba ineyi ikhalonga kuti ife tikhafunika kuenda katumikira ku Médio Oriente. Kweneko tathimbana pontho na pinentso, tikhafunika kupfundza pilongero pipswa na kudzolowera makhaliro mapswa. Tikhafunika kupfundza pinthu pizinji mu dziko ineyi mwakuti mukhali na nyatwa thangwi ya mautongi na mauphemberi. Ife takomerwa na kubva pilongero pyakusiyana-siyana m’mipingo, pontho taona kuti tinakwanisa kukhala akubverana tingabvera pitsogolero pya gulu ya Yahova. Ife tadzumatirwa kakamwe na abale na alongo thangwi azinji a iwo mwacipapo apirira kutcingwa na acibale, andzawo a kuxikola, andzawo a kubasa na mavizinyu.

Mu caka ca 2012, ife taenda ku nsonkhano wa gawo wakupambulika ku Tel Aviv, Izraeli. Nsonkhano unoyu ukhali ulendo wakutoma wakuti atumiki a Yahova azinji agumanikana pabodzi kutomera mu Pentekoste 33, Pakumala Kubalwa kwa Kristu. Pyenepi pyakhala pyakutsandzayisa kakamwe, pontho pyenepi nee tinapiduwala!

Mu ndzidzi unoyu, ife tapangwa toera kuenda ku dziko yakuti basa yathu ikhakhondeswa. Ife takwata mabukhu athu, taenda m’basa yakumwaza mphangwa, pontho taenda ku misonkhano ya cisa yakuti ikhali na anthu akucepa. Mu dziko ineyi mukhali na anyankhondo akuti akhali na mpfuti, pontho mukhali na apolixa m’miseu mizinji, mbwenye tikhali akutsidzikizika pikhacita ife mphole-mphole pakufamba na amwazi mphangwa anango.

KUBWERERA KU AFRIKA

Mu caka ca 2013, ife tapangwa toera kuenda katumikira ku Bheteli ya Kinshasa, ku Kongo, dziko yakuti ndi ikulu na yakubalika kakamwe, mbwenye ndi yakutcerenga, pontho kazinji kene musacitika nkhondo. Pakutoma, ife talonga kuti “tisadziwako ku Afrika; ife tiri dzololo toera kuenda.” Mbwenye pakhali na pinthu pizinji toera kupfundza, makamaka pikhafamba ife m’miseu yakuti nee yasasanyirwa mwadidi, pontho nee ikhali na maponti. Ife taona pinthu pizinji pyadidi, kuphatanizambo kupirira na kutsandzaya kwa abale na alongo mwakukhonda kutsalakana nyatwa, kukomerwa kwawo na basa yakumwaza mphangwa na kuwangisira kwawo toera kugumanika pa misonkhano ya mpingo na ya cisa. Ife taona kuti basa ya Umambo ikhafamba mwadidi basi ene thangwi ya ciphedzo ca Yahova na nkhombo zace. Pyaka pidatumikira ife m’basa ya ndzidzi onsene ku Kongo, ife tapfundza pinthu pizinji pyakufunika, pontho takhala na axamwali akuti ndi ninga acibale athu.

Kunkhomo kwa caka ca 2017, ife tapangwa toera tiende katumikira ku Afrika do Sul. Ineyi ikhali Bheteli ikulu kakamwe kupiringana Mabheteli anango mudatumikira ife. Pontho mabasa akhacita ife pa Bheteli ineyi akhali mapswa kuna ife. Kweneko kukhalimbo na pinthu pizinji toera kupfundza, mbwenye pinthu pidapfundza ife kale pyatiphedza kakamwe. Ife tisafuna kakamwe abale na alongo athu akuti ndi akukhulupirika mu pyaka pizinji. Ndi pyakudzumatirisa kuona abale akuti abuluka m’mbuto zakusiyana-siyana, pontho ali na makhaliro akusiyana-siyana mbaphata basa mwakuphatana pa Bheteli. Nkhombo za Yahova zisaoneka pakweca, thangwi atumiki ace ali na makhaliro adidi, pontho asabvera pinalonga Bhibhlya.

Mu pyaka pizinji, ine na Debbie tatumikira m’mbuto zakusiyana-siyana. Natenepa tapfundza kudzolowera makhaliro akusiyana-siyana na kupfundza pilongero pipswa. Midzidzi inango pinthu pikhanentsa, mbwenye Yahova akhaphatisira gulu yace na abale na alongo toera kupangiza ufuni wakukhonda mala kuna ife. (Mas. 144:2) Tiri na cinyindiro cakuti pinthu pidapfundza ife m’basa ya ndzidzi onsene pyaticitisa kukhala atumiki adidi a Yahova.

Ndisapereka takhuta kuna anyakubalanga thangwi yakundipfundzisa, kuna nkazanga Debbie thangwi ya ciphedzo cace na kuna abale na alongo a dziko yonsene thangwi yakukhala citsandzo cadidi kuna ine. Natenepa, ife tiri dzololo toera kupitiriza kupfundziswa na mpfundzisi wathu wankulu.