NSOLO WA PFUNDZIRO 30
NYIMBO 97 Umaso Wathu Usanyindira Mafala a Mulungu
Tinakwanisa Kupitiriza Kupfundza na Pipfundziso Pyakutoma Pya m’Bhibhlya!
“Ndzidzi onsene ndisafuna kukukumbusani pinthu pyenepi, maseze imwe musapidziwa kale, pontho mwakhazikika mwadidi mu undimomwene.” — 2 PED. 1:12.
PINAFUNA IFE KUPFUNDZA
Tinaona kuti pipfundziso pyakutoma pya m’Bhibhlya pinapitiriza kutiphedza mpaka lero.
1. Pipfundziso pyakutoma pya m’Bhibhlya pyacinja tani umaso wanu?
PIPFUNDZISO pyakutoma pya m’Bhibhlya pyacinja umaso wathu. Mwacitsandzo, pidapfundza imwe kuti dzina ya Mulungu ndi Yahova, imwe mwatoma kucita uxamwali na iye. (Iza. 42:8) Pidapfundza imwe kuti ninji pinacitika munthu angafa, imwe nee mukhabvundzikabve khala acibale anu adafa ali kuthabuka peno nkhabe. (Ekle. 9:10) Pontho pidapfundza imwe kuti dziko inadzakhala paraizu, imwe nee mwadzudzumikabve thangwi ya pinthu pinafuna kukucitikirani kutsogolo. Imwe mwakhala na cinyindiro cakuti munakwanisa kukhala m’maso kwenda na kwenda, tayu basi pyaka 70 peno 80.—Mas. 37:29; 90:10.
2. Thangwi yanji tinakwanisa kulonga kuti ngakhale Akristu anatumikira Yahova mu pyaka pizinji anakwanisa kuphedzeka na pipfundziso pyakutoma pya m’Bhibhlya? (2 Pedhru 1:12, 13)
2 Ife tinakwanisa kupitiriza kuphedzeka na pipfundziso pyakutoma pya m’Bhibhlya. Nyerezerani Akristu adalemberwa na Pedhru mu tsamba yace yaciwiri. Iwo ‘akhadakhazikika mwadidi mu undimomwene.’ (Lerini 2 Pedhru 1:12, 13.) Mbwenye mu ndzidzi unoyu, apfundzisi authambi na anthu akuipa akhayesera kuacitisa kusiya ulambiri wandimomwene. (2 Ped. 2:1-3) Pedhru akhafuna kuphedza abale na alongo toera akwanise kupirira mayesero anewa. Natenepa, Pedhru aakumbusa pinthu pidapfundza iwo kale. Pinthu pyenepi mbapidaaphedza kukhala akukhulupirika kuna Yahova mpaka kunkhomo.
3. Thangwi yanji pipfundziso pyakutoma ndi pyakufunikambo kuna Akristu akuti ali kutumikira Yahova mu pyaka pizinji? Perekani citsandzo.
3 Maseze tiri kutumikira Yahova mu pyaka pizinji, ife tinakwanisa kupfundza pinthu na pipfundziso pyakutoma pya m’Bhibhlya. Mwacitsandzo, munthu wakuti asadziwa kuphika mwadidi na munthu wakuti ali kupfundza anakwanisa kuphatisira pinthu pibodzi pyene pakuphika. Mbwenye munthu wakuti asadziwa mwadidi kuphika anakwanisa kuphatisira pyenepi munjira yakusiyana na ule wakuti ali kupfundza. Munjira ibodzi ene, ale akuti ali kutumikira Yahova mu pyaka pizinji na anyakupfundza Bhibhlya, asadziwa mwadidi pipfundziso pyakutoma pya m’Bhibhlya. Mbwenye iwo anakwanisa kuona pipfundziso pyenepi munjira yakusiyana. Kutomera ntsiku idabatizwa ife, panango umaso wathu na miyai yathu yakutumikira yacinja. Mbwenye kunyerezera undimomwene wa pipfundziso pyakutoma pya m’Bhibhlya pidapfundza ife kale pinatiphedza kugumana njira yadidi yakupiphatisira mwakubverana na makhaliro athu a cincino. Cincino tendeni tione kuti ale akuti ali kutumikira Yahova mu pyaka pizinji anapfundzanji na pipfundziso pyakutoma pya m’Bhibhlya pitatu pinatowera.
YAHOVA NDI NCITI
4. Kudziwa kuti Yahova ndi Nciti, kwacinja tani umaso wathu?
4 Ife tisadziwa kuti dziko na pinthu pyonsene piri mu dziko, pyacitwa na Nciti waudziwisi na wamphambvu zonsene. Bhibhlya isalonga: “Adacita pinthu pyonsene ndi Mulungu.” (Aheb. 3:4) Ife tinakwanisa kupfundza pizinji na cipfundziso ceneci. Nakuti ndi Yahova adaticita, iye asadziwa pyonsene thangwi ya ife. Iye asatitsalakana, pontho asadziwa mwadidi pinthu pyakufunika kuna ife. Natenepa, kudziwa kuti Yahova ndi Nciti, pyacinja umaso wathu.
5. Ndi undimomwene upi wa m’Bhibhlya unatiphedza toera kukhala wakucepeseka? (Izaiya 45:9-12)
5 Kudziwa kuti Yahova ndiye adaticita kusatiphedzambo toera kukhala akucepeseka. Mwacitsandzo, ndzidzi unango, Yobe akhanyerezera kakamwe basi ene thangwi ya iye na anthu anango. Yahova akumbusa Yobe kuti iye ndi Nciti wamphambvu zonsene. (Yobe 38:1-4) Pyenepi pyaphedza Yobe toera kubvesesa kuti pyonsene pinacita Yahova ndi pyadidi. Yahova aphatisira Izaiya toera kufokotoza kuti munthu nee asafunika kunyerezera kuti ndi wakufunika kakamwe kupiringana ule adancita. Izaiya alemba: “Kodi dongo inakwanisa kupanga ule anaiumba kuti: ‘Ninji pinacita iwe?’”—Lerini Izaiya 45:9-12.
6. Ndi mu ndzidzi upi unafunika ife kunyerezera thangwi ya udziwisi na mphambvu za Nciti wathu? (Onanimbo mafoto.)
6 Mu ndzidzi wakuti Nkristu ali kudziwa pizinji, panango iye anatoma kunyindira kakamwe maonero ace, m’mbuto mwakusaka pitsogolero pya Yahova. (Yobe 37:23, 24) Pyenepi pingacitika, Nkristu asafunika kukumbuka kuti Yahova ali na udziwisi na mphambvu kupiringana anthu onsene. (Iza. 40:22; 55:8, 9) Natenepa cipfundziso ceneci cakutoma cinamphedza toera kukhala wakucepeseka mbabvesesa kuti pinanyerezera Yahova ndi pyakufunika kakamwe kupiringana pinanyerezera iye.
Ninji pinafuna kutiphedza toera kukhala na maonero adidi thangwi ya pinthu pinanyerezera ife? (Onani ndima 6)
7. Mulongo Raela acitanji toera kutawira macinjo?
7 Kukumbuka kuti Yahova ndi Nciti kwaphedza mulongo Raela anakhala ku Eslovénia toera kutawira macinjo. Iye alonga: “Midzidzi inango pisandinentsa kutawira pisankhulo pinacita ale anatsogolera. Mwacitsandzo, ine ndaona Mphangwa za Mathubo Akutonga za 2023 N.º 8. Ngakhale tenepo, ulendo wakutoma udaona ine m’bale na ndebvu mbacita nkhani ndanentseka kakamwe. Natenepa, ine ndacita phembero kuna Yahova toera andiphedze kutawira macinjo anewa.” Mulongo Raela abvesesa kuti Yahova, Nciti wakudzulu na dziko yapantsi, anakwanisa kutsogolera mwadidi kakamwe gulu yace. Kodi midzidzi inango imwe musanentsekambo toera kutawira kubvesesa kupswa peno pitsogolero pipswa? Khala ndi tenepo, ndi pyakufunika kukhala wakucepeseka na kunyerezera mwadidi thangwi ya udziwisi na mphambvu za Nciti wathu.—Aroma 11:33-36.
NEE NDI MULUNGU ANACITISA NYATWA
8. Kudziwa kuti nee ndi Mulungu anacitisa nyatwa kwakuphedzani tani?
8 Thangwi yanji Mulungu asatawirisa nyatwa? Nakuti azinji nee asadziwa ntawiro wa mbvundzo unoyu, iwo asaipirwa kakamwe na Mulungu, pontho anango nee asakhulupira kuti iye alipo. (Mis. 19:3) Mbwenye imwe mwapfundza kuti nyatwa zisaoneka thangwi ya madawo na kusowa ungwiro, tayu thangwi ya Yahova. Imwe mwapfundzambo kuti kupirira kwa Yahova kusaphedza anthu azinji kakamwe kundziwa na kupfundza kuti iye anadzamalisa nyatwa zonsene. (2 Ped. 3:9, 15) Undimomwene unoyu wakubalangazani, pontho wawangisa uxamwali wanu na Yahova.
9. Ndi mu ndzidzi upi unafunika ife kunyerezera mathangwi anacitisa Yahova kutawirisa nyatwa?
9 Ife tisadziwa kuti tisafunika kukhala akupirira mu ndzidzi unadikhira ife kuti Yahova amalise nyatwa. Mbwenye ife peno munthu anafuna ife angatamba nyatwa, angatsalakanwa mwakusowa ulungami peno angaferwa panango tinanyerezera kuti Yahova ali kudembuka toera kumalisa nyatwa. (Abha. 1:2, 3) Mu ndzidzi unoyu tisafunika kukumbuka mathangwi anacitisa Yahova kutawirisa kuti anthu adidi atambe nyatwa.a (Mas. 34:19) Pontho tinakwanisambo kunyerezera thangwi ya cifuniro ca Yahova cakumalisa nyatwa kwenda na kwenda.
10. Ninji pinaphedza Anne kupirira nyatwa yakuferwa na mai wace?
10 Kudziwa undimomwene thangwi ya nyatwa kunakwanisa kutiphedza toera kupirira. Anne anakhala ku ntsuwa ya Mayotte, ku Bara ya Indiko, alonga: “Pyaka pingasi nduli, ndaferwa na mai wanga, pontho pyenepi pyanditsukwalisa kakamwe. Ngakhale tenepo, ndisawangisira toera kukumbuka kuti nee ndi Yahova anacitisa nyatwa. Mbwenye iye asadikhira ndzidzi toera kumalisa nyatwa zonsene na kulamusa muli akufa anthu anafuna ife. Kunyerezera pinthu pyenepi kusandiphedza toera kukhala wakukhurudzika.”
11. Kudziwa mathangwi anacitisa Yahova kutawirisa nyatwa kunatiphedza tani?
11 Kudziwa mathangwi anacitisa Mulungu kupirira na kutawirisa nyatwa kunatiphedza toera kupitiriza kumwaza mphangwa. Mpostolo Pedhru afokotoza kuti kupirira kwa Yahova kusapasa anthu azinji mwai wakutcunyuka toera kupulumuswa. Buluka penepo iye alemba: “Nyerezerani kuti musafunika kukhala anthu a ntundu wanji. Musafunika kukhala anthu a makhaliro akucena, mbamucita pinthu pinapangiza kuti ndimwe anthu adaperekeka kuna Mulungu.” (2 Ped. 3:11) Cibodzi mwa pinthu pinapangiza kuti ndife “anthu adaperekeka kuna Mulungu” ndi basa yathu yakumwaza mphangwa. Natenepa, ninga Babathu ife tisafuna anthu, pontho tisafuna kuti iwo adzakhale na umaso wakwenda na kwenda mu dziko ipswa. Yahova asapitiriza kupasa anthu a mucisa canu mwai wa kumulambira. Pontho imwe muli na mwai wakuphata basa pabodzi na Mulungu na kuphedza anthu azinji kakamwe toera kupfundza thangwi ya iye, kumala mbakudzati kufika.—1 Akor. 3:9.
TIRI KUKHALA “MU NTSIKU ZAKUMALISA”
12. Kubvesesa kuti tiri kukhala mu ntsiku zakumalisa kusatiphedza tani?
12 Bhibhlya yalonga kale kuti anthu mbadakhala tani “mu ntsiku zakumalisa.” (2 Tim. 3:1-5) Kuona kuti makhaliro akuipa a anthu lero ali kutekera kakamwe, kusapangiza kuti profesiya ineyi iri kukwanirisika. Kubvesesa undimomwene unoyu kusatiphedza toera kunyindira na ntima onsene Mafala a Mulungu.—2 Tim. 3:13-15.
13. Mwakubverana na nsangani udalonga Yezu pa Luka 12:15-21, tisafunika kubvundzikanji?
13 Kudziwa kuti tiri kukhala mu ntsiku zakumalisa kusatiphedza toera kuphatisira mwadidi kakamwe ndzidzi wathu. Pa lemba ya Luka 12:15-21 Yezu alonga nsangani unapangiza kuti tisafunika kuikha pa mbuto yakutoma pinthu pyakufunika. (Lerini.) Thangwi yanji mamuna wakupfuma alongwa kuti ndi “munthu wakusowa ndzeru”? Nee ndi thangwi iye akhali na pinthu pizinji, mbwenye ndi thangwi akhaikha pa mbuto yakutoma pinthu pyakukhonda kufunika. Iye ‘akhagumanya mpfuma toera kuphedzeka ekhene, mbwenye nee akhali wakupfuma kuna Mulungu.’ Thangwi yanji kucita pyenepi kukhali kwakuipa? Thangwi Mulungu apanga mamuna unoyu: “Masiku ano iwe unadzafa.” Nsangani unoyu usatipfundzisanji? Ndzidzi udasala toera dziko ino ifudzwe ndi wakucepa kakamwe. Natenepa tisafunika kubvundzika: ‘Kodi pifuno pyanga pisapangiza kuti ine ndisaphatisira mwadidi ndzidzi wanga? Ndisaphedza ananga toera kukhala na pifuno pipi? Kodi ine ndisaphatisira ndzidzi wanga, mphambvu zanga na pinthu piri na ine toera kuphedzeka ndekhene peno toera kukoya mpfuma kudzulu?’
14. Thangwi yanji ndi pyakufunika kunyerezera pinthu pinapangiza kuti tiri mu ntsiku zakumalisa, pontho pidacitikira mulongo Miki pisapangiza tani pyenepi?
14 Kunyerezera pinthu pinapangiza kuti tiri kukhala mu ntsiku zakumalisa kunatiphedza toera kuphatisira mwadidi umaso wathu. Ndi pyenepi pidacitikira mulongo Miki. Iye alonga: “Pidamalisa ine xikola, ine ndikhafuna kakamwe kuti basa yanga ikhale yakupfundza thangwi ya pinyama. Kusiyapo pyenepi, ndikhafuna kukhala mpainiya wa ndzidzi onsene na kutumikira kumbuto iri na amwazi mphangwa akucepa. Mbwenye axamwali anga andipanga toera ndione khala mbandidakwanisa kucita basa ikhafuna ine mu ndzidzi ubodzi ene mbandikhala mpainiya wa ndzidzi onsene na kuenda katumikira kumbuto iri na amwazi mphangwa akucepa. Iwo andikumbusa kuti dziko ino iri dhuzi na kumala, pontho mu dziko ipswa ndinadzakhala na ndzidzi uzinji kakamwe toera kupfundza thangwi ya pinyama pyonsene pinafuna ine. Natenepa ndacita makursu akuti mbadandiphedza kugumana basa na akuti nee mbadandibvungira ndzidzi uzinji kakamwe. Munjira ineyi, ndakwanisa kupitiriza kutumikira ninga mpainiya wa ndzidzi onsene, pontho mukupita kwa ndzidzi, ndaenda katumikira kucisa ciri na amwazi mphangwa akucepa.” Lero, mamunace Miki asatumikira ninga muyang’aniri wa cisa ku Ekwadhori.
15. Pidacitikira Tiyago pisapangiza tani kuti nee tisafunika kusiya kuphedza anthu akuti nee apangiza cifuno cakupfundza undimomwene? (Onanimbo mafoto.)
15 Kukumbuka kuti tiri kukhala mu ntsiku zakumalisa, kusatiphedza toera kudziwa kuti basa yakumwaza mphangwa isafunika kucitwa mwakucimbiza kakamwe, ngakhale kuti anthu anango akhonde kutawira mphangwa zadidi. Undimomwene ndi wakuti anthu anakwanisa kucinja. Onani pidacitikira Tiyago, m’bale wace Yezu. Iye aona Yezu mbakakwanirisa maprofesiya analonga thangwi ya Mesiya, pontho adzindikira kuti Yezu akhali Mesiya na mpfundzisi wadidi kakamwe. Ngakhale tenepo, papita pyaka pizinji toera Tiyago akhale nyakupfundza wa Yezu. Iye acita pyenepi pidamala Yezu kulamuswa muli akufa, pontho akhala waphinga kakamwe.b (Juw. 7:5; Agal. 2:9) Natenepa, lekani kusiya kuphedza acibale anu na anthu a mucisa canu akuti adzati kupangiza cifuno cakupfundza undimomwene. Pinaapanga imwe cincino panango pinaaphedza kutsogolo, ngakhale mu ndzidzi wa nyatwa ikulu.c
Ninji pinafuna kutiphedza toera kupitiriza kuphedza acibale athu akuti nee asatumikira Yahova? (Onani ndima 15)e
PITIRIZANI KUPEREKA TAKHUTA THANGWI YA PIPFUNDZISO PYA YAHOVA
16. Pipfundziso pya Yahova pyakuphedzani tani? (Onanimbo bokosi ya nsolo wakuti “Phatisirani Undimomwene wa m’Bhibhlya Toera Kuphedza Anango.”)
16 Mphangwa zinango za m’Bhibhlya zinapereka gulu ya Yahova, ndi toera kuphedza anthu akuti nee asadziwa pizinji thangwi ya Bhibhlya. Mwacitsandzo, nkhani yapakweca ya misonkhano yakumala kwa sumana, marevista a anthu onsene na misolo inango na mavidhyu a mu saiti jw.org pisacitwa toera kuphedza makamaka anthu akuti nee ndi Mboni za Yahova. Ngakhale tenepo, pipfundziso pyenepi pya Yahova pinakwanisa kutiphedzambo. Ipyo pisatiphedza toera kufuna kakamwe Mulungu, kunyindira kakamwe pinalonga Bhibhlya na kukhala apfundzisi adidi.—Mas. 19:7.
17. Ndi mu ndzidzi upi unafunika ife kunyerezera pipfundziso pyakutoma pya m’Bhibhlya?
17 Ife, Mboni za Yahova, tisatsandzaya kakamwe tingatambira kubvesesa kupswa kwa undimomwene wa Bhibhlya. Mbwenye tisaperekambo takhuta kakamwe thangwi ya pipfundziso pyakutoma pya m’Bhibhlya pyakuti pyatiphedza toera kutoma kulambira Yahova. Tinganyerezera kuti maonero athu ndi adidi kakamwe kupiringana kubvera pitsogolero pya gulu ya Yahova, tisafunika kukhala akucepeseka mbatikumbuka kuti Nciti wathu ndi waudziwisi na wamphambvu zonsene, pontho iye ali kutsogolera gulu. Khala ife peno munthu anafuna ife ali kutamba nyatwa, tisafunika kupirira mbatinyerezera mathangwi anacitisa Yahova kutawirisa nyatwa. Ife tisafunika kuphatisira mwadidi kakamwe ndzidzi wathu na pinthu piri na ife mbatikumbuka kuti tiri kukhala mu ntsiku zakumalisa. Tingacita pyenepi, pipfundziso pya Yahova pinapitiriza kutiwangisa na kutiphedza toera kukhala audziwisi kakamwe.
NYIMBO 95 Ceza Cikuthimizirika
a Onani nsolo wakuti “Por que todo o sofrimento acabará em breve?” mu Sentinela ya 15 de Maio de 2007 tsa. 21-25.
c Onani nsolo wakuti “Tisadziwanji Thangwi Yakutonga Kunafuna Kudzacita Yahova?” mu Ncenjezi wa Maio 2024 tsa. 8-13.
d MAFALA ANAFOKOTOZA FOTO: Nkulu wa mpingo m’bodzi ali kupereka maonero, mbwenye akulu a mpingo anango nee ali kuphedzera. Mukupita kwa ndzidzi, iye ali kuyang’ana nyenyezi kudzulu, pontho ali kunyerezera mphambvu na udziwisi wa Nciti. Iye abvesesa kuti manyerezero a Yahova ndi akufunika kakamwe kupiringana ace.
e MAFALA ANAFOKOTOZA FOTO: Pa pfundziro yace ya munthu paekha, mulongo apfundza pinthu pinapangiza kuti tiri kukhala mu ntsiku zakumalisa. Pyenepi pyamphedza toera kuligariri m’bale wace wankazi mbam’mwazira mphangwa.