NSOLO WA PFUNDZIRO 42
NYIMBO 44 Phembero ya Munthu Wakutsukwala
Tinacita Tani Phembero na Ntima Onsene?
“ Ine ndisacemera na ntima wanga onsene. Nditawireni Yahova.” —MAS. 119:145.
PINAFUNA IFE KUPFUNDZA
Tinaona kuti maphembero a atumiki a Yahova anagumanika m’Bhibhlya anatiphedza tani.
1-2. (a) Thangwi yanji panango pinanentsa kulonga mabvero athu kuna Yahova? (b) Tisadziwa tani kuti Yahova asabvesera maphembero athu?
KODI imwe musanyerezera kuti musacita phembero ibodzi ene mwakubwereza-bwereza, peno nee musakwanisa kulonga piri muntima mwanu kuna Yahova? Khala ndi tenepo, nee ndimwe basi. Thangwi yakukhala na pinthu pizinji pyakucita, panango tinacita phembero mwakuthamanga. Panango tinanyerezera kuti nee tathema kucita phembero kuna Yahova. Na thangwi ineyi, nee tisakwanisa kumpanga manyerezero athu na mabvero athu.
2 Bhibhlya isatipasa cinyindiro cakuti cinthu cakufunika kakamwe kuna Yahova nee ndi mafala adidi anaphatisira ife m’maphembero, mbwenye ndi kucita phembero na ntima onsene. Iye asabva “phembo ya anthu akucepeseka.” (Mas. 10:17) Yahova asabvesesa fala ibodzi na ibodzi inalonga ife m’maphembero athu, thangwi ndife akufunika kakamwe kuna iye.—Mas. 139:1-3.
3. Ndi mibvundzo ipi inafuna ife kutawira mu nsolo uno?
3 Mu nsolo uno, tinatawira mibvundzo iyi: Thangwi yanji tinakwanisa kucita phembero kuna Yahova mwakukhonda gopa? Tinacita tani phembero na ntima onsene? Maphembero anagumanika m’Bhibhlya anatiphedza tani? Tinacitanji khala nee tisakwanisa kupanga Yahova mabvero athu?
CITANI PHEMBERO KUNA YAHOVA MWAKUKHONDA GOPA
4. Ninji pinafuna kutiphedza toera kucita phembero kuna Yahova mwakukhonda gopa? (Masalmo 119:145)
4 Yahova ndi xamwali wandimomwene wakuti asafuna kutiphedza. Tingabvesesa pyenepi, ife tinakhala na cifuno ca kumpanga pinthu pinanyerezera ife na mabvero athu. Nyakulemba bukhu ya Masalmo 119 akhafuna kukhala na maonero anewa thangwi ya Yahova. Iye akhatambambo nyatwa mu umaso. Anthu akuipa akhalonga uthambi thangwi ya iye. (Mas. 119:23, 69, 78) Kusiyapo pyenepi, nyamasalmo unoyu, midzidzi inango akhapasika mulando thangwi ya madodo ace. (Mas. 119:5) Ngakhale tenepo, iye nee akhagopa kupanga Yahova mabvero ace.—Lerini Masalmo 119:145.
5. (a) Thangwi yanji nee tisafunika kutawirisa kuti mabvero athu akuphonyeka aticimwanise kucita phembero? (b) Longani citsandzo cinapangiza kuti nee tisafunika kukhala na manyadzo tingacita phembero.
5 Nee tisafunika kutawirisa kuti maonero athu akuphonyeka thangwi ya ife aticimwanise kucita phembero. Yahova asaphembambo ale adacita madawo makulu toera acite phembero kuna iye. (Iza. 55:6, 7) Nyerezerani basi. Imwe mwaenda ku mbuto yakuti nee musaidziwa mwadidi, pontho mwatayika. Mbwenye kweneko kuli na anthu akuti anakwanisa kukupangizani njira. Kodi imwe munagopa kuphemba munthu toera akuphedzeni thangwi ya manyadzo? Nkhabe. Munjira ibodzi ene, khala tiri na mabvero akupasika mulando peno tacita madawo, nee tisafunika kugopa kulonga mabvero athu kuna Yahova.—Mas. 119:25, 176.
NINJI PINAFUNA KUTIPHEDZA TOERA KULONGA MABVERO ATHU KUNA YAHOVA?
6-7. Ninji pinafuna kutiphedza toera kucita phembero na ntima onsene? Perekani citsandzo. (Onanimbo cidzindikiro capantsi.)
6 Tingapanga Yahova pyonsene pinanyerezera ife, tisakhala na uxamwali wakuwanga na iye. Ninji pinafuna kutiphedza toera kucita pyenepi?
7 Nyerezerani mwadidi makhaliro a Yahova.a Tingadziwa mwadidi makhaliro a Yahova, pinakhala pyakukhonda nentsa kumpanga pinanyerezera ife. (Mas. 145:8, 9, 18) Onani pidacitikira mulongo Kristine, wakuti pai wace akhali wausumankha. Iye alonga: “Kuna ine, pikhali pyakunentsa kuona Yahova ninga Baba wakuti ndinakwanisa kumpanga mabvero anga. Ine ndikhanyerezera kuti nee ndikhali wadidi, pontho Yahova mbadandisiya thangwi ya madodo anga.” Ndi n’khaliro upi wa Yahova udaphedza Kristine? Iye alonga: “Ufuni wandimomwene wa Yahova, wandipasa cinyindiro cakuti iye asandifuna. Ine ndisadziwa kuti iye nee anandithawa. Ngakhale ndigwe, iye ananditsalakana mwaufuni, pontho anandiphedza toera ndilamuke. Kudziwa pyenepi kwandiphedza toera kupanga Yahova pinthu pinanditsandzayisa kakamwe na pinthu pinanditsukwalisa kakamwe.”
8-9. Ninga pidalonga Aliska, thangwi yanji ndi pyakufunika kunyerezera mbatidzati kucita phembero?
8 Nyerezerani pinthu pinafuna imwe kulonga. Mbamudzati kucita phembero, imwe munakwanisa kubvundzika tenepa: ‘Ndi nyatwa zipi zinatamba ine cincino? Kodi pana munthu anafunika ine kulekerera? Ndiri kutamba nyatwa zipswa, pontho ndisafuna kuti Yahova andiphedze toera kupirira nyatwa zenezi?’ (2 Ama. 19:15-19) Ife tinakwanisambo kuphatisira pidalonga Yezu mbatiphataniza m’maphembero athu dzina ya Yahova, Umambo Wace na cifuno Cace.—Mat. 6:9, 10.
9 Mulongo unango anacemerwa Aliska adzindikira kuti mamunace akhali na utenda wa kankro. Pakutoma, pikhali pyakunentsa kuna iye kucita phembero. Iye alonga: “Ine ndikhadzudzumika kakamwe, pontho ndikhaona kuti pikhali pyakunentsa kudziwa pikhafunika ine kulonga.” Ninji pinamphedza? Iye alonga: “Mbandidzati kucita phembero, ndisatoma kunyerezera pinafuna ine kulonga, pontho pyenepi pisandiphedza toera ndikhonde kulonga basi ene pya ine na utenda wa mamunanga. Pyenepi pisandiphedzambo kukhala na manyerezero adidi mbandikhurudzika mu ndzidzi unacita ine phembero.”
10. Thangwi yanji ndi pyadidi kucita phembero mwakukhonda thamanga? (Onanimbo mafoto.)
10 Citani phembero mwakukhonda thamanga. Ndimomwene kuti tingacita phembero yakubvira tinakwanisa kulonga pinthu na ntima onsene. Mbwenye tingacita phembero mwakukhonda thamanga, ife tinakwanisa kulonga pyonsene pinanyerezera ife na mabvero athu.b Elijah, mamunace Aliska alonga: “Ndisayesera kucita phembero kazinji kene pa ntsiku, mbwenye ndingacita maphembero akulapha kakamwe, ndisapibva kuti uxamwali wanga na Yahova usakhala wakuwanga kakamwe. Yahova ndzidzi onsene ndi wakupirira, pontho asabvesera maphembero anga. Natenepa, ine ndisadziwa kuti ndinakwanisa kucita phembero ndzidzi unafuna ine.” Sakani ndzidzi wakuthema na mbuto yadidi toera kucita maphembero mwakukhonda kudzudzumiswa na cinthu, ngakhale mwakugaluza. Pontho dzolowerani kucita maphembero mwakukhonda thamanga.
Sakani ndzidzi na mbuto yadidi toera kucita phembero mwakukhonda thamanga (Onani ndima 10)
NYEREZERANI MAPHEMBERO ADACITWA NA NTIMA ONSENE ANAGUMANIKA M’BHIBHLYA
11. Thangwi yanji ndi pyakufunika kunyerezera pinthu pyakuti atumiki a Yahova a nduli apilonga m’maphembero awo? (Onanimbo bokosi yakuti “Kodi Imwe Musapibva Ninga Iwo?”)
11 Kunyerezera pidalonga atumiki a Yahova a nduli m’maphembero awo na n’nyimbo zakusimba Yahova kunakuphedzani kakamwe. Pontho kunyerezera kuti iwo alonga tani mabvero awo kunakuphedzani toera kulongambo mabvero anu kuna Yahova. Kuona mafala adaphatisira iwo toera kusimba Yahova kunakuphedzani kugumana mafala adidi toera kuaphatisira m’maphembero anu. Panango munagumana maphembero a atumiki a Yahova akuti atambambo nyatwa ninga zanu.
12. Tisafunika kubvundzikanji mu ndzidzi unaleri ife phembero m’Bhibhlya?
12 Mu ndzidzi unaleri imwe phembero m’Bhibhlya, bvundzikani: ‘Mbani adacita phembero ineyi, pontho ninji pikhancitikira mu umaso wace ndzidzi unoyu? Mafala anewa asabverana tani na pinthu pinandicitikira? Ndinapfundzanji na phembero ineyi?’ Panango munafunika kufufudza pang’ono toera kugumana mitawiro ya mibvundzo ineyi. Mbwenye kuwangisira kweneku kunaphedza kakamwe. Tendeni tione maphembero a anthu anai.
13. Tisapfundzanji na phembero idacita Yana? (1 Samweli 1:10, 11) (Onanimbo foto .)
13 Lerini 1 Samweli 1:10, 11. Mu ndzidzi udacita Yana phembero ineyi, iye akhathimbana na pinentso pikulu. Iye nee akhali na ana, pontho n’khazibace akhansingirira. (1 Sam. 1:4-7) Mbwenye Yana apanga Yahova pyonsene pikhali muntima mwace. Pidamala iye kucita pyenepi, akhala wakukhurudzika. (1 Sam. 1:12, 18) Khala muli kuthimbana na pinentso pyakuti pisakutsukwalisani, munapfundzanji na phembero ya Yana? ‘Tingasiyira Yahova nyatwa zathu zonsene,’ peno tinganfokotozera pinthu pinatinentsa, ife tinakhalambo akukhurudzika.—Mas. 55:22.
Yana nee akhabala, pontho n’khazibace akhansingirira. Natenepa iye acita phembero na ntima onsene kuna Yahova (Onani ndima 13)
14. (a) Tisapfundzanji pontho na pinthu pidacitikira Yana? (b) Ninji pinapangiza kuti kunyerezera maphembero a m’Bhibhlya kunatiphedza kucita maphembero na ntima onsene? (Onani cidzindikiro capantsi.)
14 Yana akhali na mwana m’bodzi anacemerwa Samweli. Pidapita pyaka pingasi, mudamala iye kubala mwana unoyu, iye ankwata mbaenda kampereka kuna nyantsembe Eli. Iye apereka takhuta kuna Yahova na ntima onsene, thangwi yakutsidzikiza atumiki ace akukhulupirika na kuatsalakana. (1 Sam. 1:24-28) Pinentso pya Yana nee pyamala, mbwenye iye akhanyerezera kakamwe nkhombo zidampasa Yahova. Tisapfundzanji?c (1 Sam. 2:1, 8, 9) Ife tinakwanisa kupirira pinentso tinganyerezera pinthu pidaticitira Yahova na pinapitiriza iye kucita toera kutiphedza.
15. Tisapfundzanji na phembero ya mprofeta Yeremiya? (Yeremiya 12:1)
15 Lerini Yeremiya 12:1. Yeremiya atsukwala kakamwe pidaona iye anthu akuipa mbakhala na umaso wadidi, pontho akutsandzaya. Iye atsukwalambo thangwi yakutsalakanwa mwakuipa na Aizraeli anango. (Yer. 20:7, 8) M’mbuto mwakupasa mulando Yahova, Yeremiya ampanga pyonsene pikhantsukwalisa. Mukupita kwa ndzidzi, Yeremiya aona Yahova mbakalanga Aizraeli akukhonda bvera. Pyenepi pyamphedza toera kunyindira kuti Yahova ndi Mulungu waulungami. (Yer. 32:19) Ife tingaonambo anthu akuipa mbakhala na umaso wadidi na akutsandzaya peno angatinyoza, panango tinakhala na mabvero ninga a Yeremiya. Ife tinakwanisambo kupanga Yahova pyonsene pinatitsukwalisa, mbatinyindira kuti pa ndzidzi wakuthema, iye anamalisa kusowa ulungami konsene.
16. Tisapfundzanji na phembero ya Mulevi wakuti nee akhakwanisa kulambira pabodzi na anango mu templo? (Masalmo 42:1-4) (Onanimbo mafoto.)
16 Lerini Masalmo 42:1-4. Mafala anewa alembwa na Mulevi wakuti nee akhakwanisa kulambira pabodzi na Aizraeli anango mu templo. Mafalace asapangiza mwadidi mabvero akhali na iye. Tingaikhwa nkaidi thangwi ya cikhulupiro cathu peno tingakhala na utenda unaticimwanisa kubuluka panyumba, panango tinakhalambo na mabvero ninga a Mulevi unoyu. Maseze tikhonde kubvesesa mwadidi mabvero athu, ndi pyadidi kupanga Yahova mabvero athu onsene. Pyenepi pinatiphedza kubvesesa mwadidi mabvero athu mbationa pinthu munjira yakusiyana. Mwacitsandzo, Mulevi unoyu adzindikira kuti mbadakhala na miyai inango yakusimba Yahova. (Mas. 42:5) Iye anyerezerambo kuti Yahova akhantsalakana tani. (Mas. 42:8) Kucita phembero kuna Yahova kunatiphedza toera kubvesesa mwadidi mabvero athu, mbationa pinthu munjira yakusiyana na kukhala na mphambvu toera kupirira.
Mulevi adalemba bukhu ya Masalmo 42 apanga Yahova pyonsene pikhali muntima mwace. Tingapanga Yahova pyonsene pinatidzudzumisa, tinaona pinthu munjira yakusiyana (Onani ndima 16)
17. (a) Tisapfundzanji na phembero ya mprofeta Yona? (Yona 2:1, 2) (b) Thangwi yanji ndi pyadidi kukoya mu nsolo malemba a m’Bhibhlya? (Onani cidzindikiro capantsi.)
17 Lerini Yona 2:1, 2. Mprofeta Yona acita phembero ineyi mu ndzidzi ukhali iye m’mimba mwa ntsomba ikulu. Iye nee akhadabvera Yahova. Ngakhale tenepo, akhali na cinyindiro cakuti Mulungu mbadambvesera. Mu phembero yace, Yona aphatisira mafala mazinji anagumanika m’bukhu ya Masalmo.d Pyenepi pisapangiza kuti iye akhadziwa mwadidi malemba anewa. Kunyerezera malemba anewa kwampasa cinyindiro cakuti Yahova mbadamphedza. Munjira ibodzi ene, mphyadidi kukoya mu nsolo malemba a m’Bhibhlya. Natenepa, tingacita phembero m’midzidzi yakunentsa, tinakwanisa kukumbuka malemba anewa, pontho iwo anatibalangaza.
PITIRIZANI KUCITA MAPHEMBERO NA NTIMA ONSENE
18-19. Lemba ya Aroma 8:26, 27 isatipasa cinyindiro cipi? Perekani citsandzo.
18 Lerini Aroma 8:26, 27. Midzidzi inango, tisakhala akudzudzumika kakamwe mbaticimwana kupanga Yahova mabvero athu. Mbwenye ife tiri na m’phedzi. Midzidzi ineyi yakunentsa, nzimu wakucena wa Mulungu “usadembetera” thangwi ya ife. Pyenepi pisacitika tani? Yahova aphatisira nzimu wace wakucena toera kutsogolera anyakulemba Bhibhlya mbalemba maphembero mazinji. Tingacimwana kulonga mabvero athu m’phembero kuna Yahova, iye anakwanisa kuona makhundu anango a maphembero anagumanika m’Bhibhlya ninga ndife anaacita. Iye anakwanisa kutawira maphembero anewa ninga athu.
19 Kudziwa pyenepi kwaphedza mulongo Yelena wa ku Rusya. Iye aikhwa nkaidi thangwi yakucita phembero na kuleri Bhibhlya. Yelena akhali wakutsukwala kakamwe, pontho nee mbadakwanisa kucita phembero. Iye alonga: “Ine ndakumbuka kuti ndingakhala wakudzudzumika mbandicimwana kucita phembero, Yahova anakwanisa kutawira maphembero . . . a atumiki ace akale mbakhala ninga anga. Pyenepi pyandibalangaza kakamwe mu ndzidzi unoyu wakunentsa.”
20. Tingakhala akudzudzumika tinakhunganya tani manyerezero athu toera kucita phembero?
20 Tingakhala akudzudzumika mbatifuna kucita phembero, panango nee tinakwanisa kulonga pyonsene pinafuna ife. Kubvesera mavesi anango akugravarwi a bukhu ya Masalmo kunatiphedza toera kukhunganya manyerezero athu. Tinakwanisambo kulemba mabvero athu ninga pidacita Dhavidhi. (Mas. 18, 34, 142; mafala akutoma.) Mwandimomwene nkhabepo ndandanda ya pinthu pinafunika ife kucita toera kukhunganya manyerezero athu. (Mas. 141:2) Natenepa, nyerezerani pinthu pyakuti pinakuphedzani.
21. Thangwi yanji tisafunika kucita phembero kuna Yahova na ntima onsene?
21 Kudziwa kuti Yahova asabvesesa mabvero athu ngakhale mbatidzati kumpanga, kusabalangaza kakamwe. (Mas. 139:4) Ngakhale tenepo, iye asatsandzaya kakamwe angabvesera maphembero anacita ife na cinyindiro consene. Natenepa, lekani kugopa kucita phembero kuna Yahova. Phatisirani maphembero anagumanika m’Bhibhlya toera akuphedzeni. Citani phembero na ntima onsene. Pangani Yahova pinthu pinakutsandzayisani na pinakutsukwalisani. Yahova ndi xamwali wanu wapantima, pontho ndzidzi onsene iye ali dhuzi na imwe.
NYIMBO 45 Ndinanyerezera Mwacidikhodikho
a Onani “Makhaliro anango akufunika kakamwe a Yahova” m’bukhu yakuti Malemba Toera Kuaphatisira mu Umaso Wathu Wacikristu pa nsolo wakuti “Yahova.”
b Kazinji kene, maphembero anacitwa pamwinji mu mpingo ndi akubvira.
c Yana alonga mafala ninga adalonga Mose mu phembero yace. Mwakukhonda penula, iye anyerezera mwadidi malemba. (Dheu. 4:35; 8:18; 32:4, 39; 1 Sam. 2:2, 6, 7) Pidapita pyaka pizinji, Mariya mai wace Yezu, aphatisira mafala ninga adaphatisira Yana mu phembero yace.—Luka 1:46-55.
d Mu phembero inagumanika pa Yona 2:3-9, onani kuti Yona aphatisira tani mafala anagumanika m’mavesi anango a bukhu ya Masalmo: Masalmo 69:1; 16:10; 30:3; 142:2, 3; 143:4, 5; 18:6; na 3:8.