Abale Awiri Adakhazikiswa Ninga Mathubo Akutonga

NTSIKU 5 ya Outubro ya 2024, pa nsonkhano wa pa caka pacitwa cidziwiso cakupambulika. M’bale Jody Jedele na Jacob Rumph akhazikiswa ninga Mathubo Akutonga a Mboni za Yahova. Iwo asatumikira Yahova mwakukhulupirika mu pyaka pizinji.

M’bale Jedele abalwa ku Missouri, Estados Unidos, pontho akuzwa mu undimomwene. Banja yawo ikhali mu cisa cikhali na amwazi mphangwa akucepa. Natenepa iye akhala na mwai wakudziwa abale na alongo azinji a mbuto zakusiyana-siyana akhaenda kweneko kaphedzera basa yakumwaza mphangwa. Ufuni na kubverana kwa abale na alongo anewa kwamphedza kakamwe. Iye abatizwa pikhali iye m’phale kakamwe ntsiku 15 ya outubro ya 1983. Iye akhakomerwa kakamwe na basa yakumwaza mphangwa, pontho pidamala iye kupfundza xikola sekundarya atoma kutumikira ninga mpainiya wa ndzidzi onsene mwezi wa Setembro wa 1989.

Pikhali m’bale Jedele m’phale, anyakubalace akhakwata iye na m’bale wace wankazi mbaenda kaona Bheteli. Pyenepi pyaaphedza kukhala na cifuno ca kutumikira ku Bheteli, pontho uwiri wawo adzakwanisa kucita pyenepi. M’bale Jedele atoma kutumikira ku Bheteli mwezi wa Setembro wa 1990. Pakutoma iye aphata mu Dhepartamentu ya Limpeza, buluka penepo, aphata mu Dhepartamentu Inatsalakana Pya Ukondzi.

Mu ndzidzi unoyu, mipingo ya cilongero ca Cixipanyola yatoma kukula, pontho pakhafunika abale toera kuphedza. Natenepa, m’bale Jedele aenda kaphedzera ubodzi mwa mipingo ineyi mbatoma kupfundza Cixipanyola. Buluka penepo, iye adziwana na mulongo wakuti akhatumikira ninga mpainiya mu cisa ceneci. Mukupita kwa ndzidzi iwo amanga banja, pontho mulongo Damaris aenda katumikirambo ku Bheteli.

Mu caka ca 2005, iwo abuluka pa Bheteli mbaenda katsalakana anyakubalawo. Mu ndzidzi unoyu, iwo akhatumikira ninga apainiya a ndzidzi onsene. M’bale Jedele akhala mpfundzisi wa Xikola ya Apainiya. Iye atumikirambo mu Komiti Inapita Ncibverano na Nyumba za Ungumi ya cisa ceneci na mu Comissão Regional de Construção.

Mu caka ca 2013, iwo acemerwa pontho ku Bheteli toera kuphata basa yakumanga ku Warwick. Kutomera ndzidzi unoyu, iwo atumikirambo ku Bheteli ya Patterson na Walkill. M’bale Jedele aphatambo basa mu Departamento Local de Desenho e Construção na mu Serviços de Informações Sobre Hospitais. Mwezi wa Março wa 2023, iye akhazikiswa ninga nyakuphedzera wa Komiti ya Basa. Iye alonga tenepa thangwi ya mabasa adaphata iye: “Midzidzi inango munagopa mungapaswa basa ipswa. Mbwenye ndi mu ndzidzi unoyu unafunika imwe kukumbuka kuti musafunika kunyindira Yahova thangwi ndiye anakuphedzani toera kucita pinthu pinafuna iye.”

M’bale Rumph abalwa ku California, E.U.A. Pikhali iye mwana, mai wace akhadasiya kusonkhana na kumwaza mphangwa. Mbwenye akhawangisira toera kumpfundzisa undimomwene wa Bhibhlya. Kusiyapo pyenepi, pyaka pyonsene iye akhaenda kaona yavu wace wakuti akhali Mboni wakukhulupirika. Iye akhamphedza toera kufuna undimomwene, pontho pikhali iye na pyaka 13 aphemba toera kupfundza Bhibhlya. M’bale Rumph abatizwa ntsiku 27 ya Setembro ya 1992 pikhali iye m’phale. Mwakutsandzayisa, mai wace atoma pontho kugumanika pa misonkhano na m’basa yakumwaza mphangwa, pontho acibale ace onsene atoma kuthambaruka mbabatizwa: Pai wace, m’bale wace wankazi na m’bale wace wamamuna.

M’bale Rumph Pikhali iye m’phale, aona kuti apainiya akhali akutsandzaya kakamwe. Pidamala iye kupfundza xikola sekundarya, iye atoma kutumikira ninga mpainiya mwezi wa Setembro wa 1995. Mu caka ca 2000, iye afuluka mbaenda ku Ekwadhori katumikira ku mbuto ikhali na amwazi mphangwa akucepa. Kweneko adziwana na mpainiya anacemerwa Inga wa ku Kanadha, pontho mukupita kwa ndzidzi, amanga banja. Pidamala iwo kumanga banja, iwo aenda katumikira mu nzinda wakuti ukhali na nsoka ung’ono wa amwazi mphangwa. Lero mu nzinda unoyu muli na mpingo ubodzi wakuti uli na amwazi mphangwa azinji.

Mukupita kwa ndzidzi, m’bale Rumph na nkazawo atoma kutumikira ninga apainiya akupambulika, buluka penepo, m’bale Rumph akhazikiswa ninga muyang’aniri wa cisa. Mu caka ca 2011 iwo acemerwa toera kuenda kakurusari turma 132 ya Jiliyadhi. Buluka penepo, iwo atumikira m’mbuto zakusiya-siyana na m’mabasa akusiyana-siyana, ninga ku Bheteli, umisionaryo, pontho m’bale Rumph atumikira pontho ninga muyang’aniri wa cisa. M’bale Rumph atumikirambo ninga mpfundzisi wa Xikola ya Amwazi Mphangwa a Umambo.

Thangwi ya utenda wa COVID-19, m’bale Rumph na nkazawo abwerera ku Estados Unidos. Iwo acemerwa toera katumikira ku Bheteli ya Walkill, pontho kweneko m’bale Rumph apfundziswa toera kuphata basa mu Dhepartamentu ya Basa. Mukupita kwa ndzidzi, iwo aphembwa toera abwerere katumikira ku Bheteli ya Ekwadhori, pontho kweneko m’bale Rumph atumikira mu Komiti ya Filiali. Mu caka ca 2023, iwo acinjwa mbaenda ku Warwick. Mwezi wa Janeiro wa 2024, m’bale Rumph akhazikiswa toera kutumikira ninga nyakuphedza wa Komiti Yakuyang’anira Basa. Iye alonga: “Pinacitisa basa kukhala yakupambulika nee ndi mbuto inatumikira iwe, mbwenye ndi anthu anatumikira na iwe.”

Ife tisapereka takhuta kakamwe na basa idacita iwo, pontho tiri kupitiriza ‘kulemedza amuna ninga anewa.’—Afil. 2:29.