Kodi Imwe Mukhapidziwa?

Thangwi yanji Yezu acemera anyakugulisa pinyama mu templo ya ku Yerusalemu kuti ‘mambava’?

MU EVANJELYU ya Mateo tisaleri: ‘Yezu apita mu templo, mbathamangisa onsene akhagulisa na akhagula pinthu mwenemu, abhoma meza za anthu akhacinja kobiri na mipando ya anyakugulisa nkhangaiwa. Buluka penepo aapanga: Pyalembwa, nyumba yanga inadzacemerwa nyumba yakucitira maphembero, mbwenye imwe mwaisanduza kudza mphako ya mambava.’—Mateo 21:12, 13.

Cakucitika ceneci cisapangiza kuti anyakugulisa mu templo akhacita pinthu mwakukhonda khulupirika kuna anyakugula, thangwi akhagulisa pinthu mwakudhula kakamwe. Mwacitsandzo, nkhangaiwa zikhaguliswa na ntengo wakucepa kakamwe toera anthu akutcerenga akwanise kuzigula mbapereka ntsembe. Mbwenye, mipukutu Yaciyuda yakale isalonga kuti mu ndzidzi wa apostolo, munthu akhagulisa denário ya ouro toera kugula nkhangaiwa ziwiri. Pyenepi pikhaphemba kuphata basa mwaphinga cifupi na ntsiku 25 toera kukugumana kobiri ineyi. Anyakutcerenga nee mbadakwanisabve kugula nkhangaiwa thangwi zikhadhula kakamwe. (Levitiko 1:14; 5:7; 12:6-8) Rabbi Simeon ben Gamaliel aipirwa kakamwe na pyenepi mbapungula numero ya pinthu pikhafuna kuperekwa ntsembe na Ayuda. Mwakukhonda dembuka, ntengo wa nkhangaiwa ziwiri wabwezwa mbukhala dzana ya denário ya ouro.

Ninga pidadinga ife, anyakugulisa malonda mu templo akhali anthu aumbirimi mbadyera nkopekope anyakugula awo. Ndi thangwi yace Yezu aacemera ‘mambava.’