Ezekiyeli
30 Yahova alonga pontho na ine, mbandipanga: 2 “Iwe mwana wa munthu, longa profesiya iyi: ‘Ipi ndi pidalonga Yahova, Mbuya Wankulu Kakamwe:
“Khuwani, mbamulonga: ‘Mama ine pano, ntsiku iri kufika!’
3 Thangwi ntsiku iri dhuzi, inde, ntsiku ya Yahova iri dhuzi.+
Inadzakhala ntsiku ya makole akupswipa,+ ntsiku idakhazikiswa toera kutonga madzindza a anthu.+
4 Supada inafika ku Ejitu, pontho anthu a ku Etiopya anadzagopa kakamwe. Pyenepi pinadzacitika anthu angaphiwa ku Ejitu;
Mpfuma zawo zingadzakwatwa, pinaatsidzikiza mbapigwiswa.+
5 Etiopya,+ Puti,+ Ludhi na anthu onsene a mbumba zinango anakhala pakati pawo,
Kuphatanizambo Kubhi na anthu a mu dziko ya cibverano,*
Onsene anadzaphiwa na supada.”’
6 Ipi ndi pidalonga Yahova:
‘Ale anaphedzera Ejitu anadzaphiwambo,
Pontho mphambvu zinanyindira iwo zinadzamala.’+
“‘Anthu anadzaphiwa na supada mu dziko ineyi, kutomera ku Migidholi+ mpaka ku Siyeni,’+ alonga Yahova, Mbuya Wankulu Kakamwe. 7 ‘Dziko yawo inadzakhala yakusowa anthu kupiringana madziko anango, pontho mizinda yawo inadzafudzwa kakamwe kupiringana mizinda inango.+ 8 Ine ndingapisa na moto dziko ya Ejitu, mbandifudza onsene anaaphedzera, iwo anadzadziwa kuti ine ndine Yahova. 9 Pa ntsiku ineyi, ine ndinadzatuma anthu mʼmabote toera agopese dziko ya Etiopya yakuti isanyindira mphambvu zace. Natenepa, Etiopya anadzagopa kakamwe pa ntsiku inafuna kufudzwa Ejitu, thangwi mwakukhonda penula ntsiku ineyi inafika.’
10 “Ipi ndi pidalonga Yahova, Mbuya Wankulu Kakamwe: ‘Ine ndinadzaphatisira Nabhukodhonozore mambo wa ku Bhabhilonya+ toera kupha misoka ya anthu a ku Ejitu. 11 Iye pabodzi na anyankhondo ace akuti ndi akuipa mitima kakamwe kupiringana mbumba zonsene,+ anadzabwereswa toera kufudza dziko ineyi. Iwo anadzabulusa masupada awo, mbamenyana na dziko ya Ejitu, pontho iwo anadzadza dziko ineyi na anthu akufa.+ 12 Ndinadzaumisa madjenje anapita na madzi anabuluka mu Nkulo wa Nilo,+ pontho ndinadzapereka dziko ineyi mʼmanja mwa anthu akuipa. Ndinacitisa kuti dziko ineyi, pabodzi na pinthu pyonsene piri mwenemu pifudzwe na anthu a dziko inango.+ Ine Yahova, ndine adapilonga.’
13 “Ipi ndi pidalonga Yahova, Mbuya Wankulu Kakamwe: ‘Ine ndinadzafudzambo madzimunthu akunyanyasa,* pontho ndinadzafudza alungu akusowa basa a ku Nofi.*+ Nee anadzaonekabve ntsogoleri wa dziko ya Ejitu, pontho ndinadzacitisa kuti anthu a dziko ya Ejitu+ agope. 14 Ndinadzafudza nzinda wa Patrosi,+ ndinadzapisa na moto nzinda wa Zoani, pontho ndinadzatcunyusa nzinda wa No.*+ 15 Ndinadzapangiza kuipirwa kwanga kuna nzinda wa Sini wakuti ndi citsidzikizo ca Ejitu; pontho ndinadzafudza anthu a mu nzinda wa No. 16 Dziko ya Ejitu ndinadzaipisa na moto, anthu a mu nzinda wa Sini anadzakundwa na kugopa, anyamalwa anadzafungula mabenga pa mpanda wa No, pontho anyamalwa anadzapita namasikati mu nzinda wa Nofi!* 17 Aphale a ku Oni* na a ku Pibheseti anadzaphiwa na supada, pontho anthu a mʼmizinda ineyi anadzaendeswa ku ubitcu. 18 Ku Tafanesi, masikati anadzakhala cidima ndingadzagwanda kweneko goli ya Ejitu.+ Mphambvu zinanyindira iwo zinadzamala,+ iye anadzaphimbirwa na makole, pontho anthu a mʼmizinda yace anadzaendeswa ku ubitcu.+ 19 Ine ndinadzatcunyusa dziko ya Ejitu, pontho iwo anadzadziwa kuti ine ndine Yahova.’”
20 Pa ntsiku yacinomwe ya mwezi wakutoma wa caka 11, ndatambira mafala awa a Yahova: 21 “Iwe mwana wa munthu, ine ndakhumula nkono wa Farau mambo wa ku Ejitu; iye nee anadzakondzwa toera awange, pontho nee anadzapyangirirwa na nguwo zakumanga nazo pironda toera akhale na mphambvu zakukwana toera kuphata supada.”
22 “Natenepa, ipi ndi pidalonga Yahova, Mbuya Wankulu Kakamwe: ‘Ine ndine nyamalwa wa Farau mambo wa ku Ejitu,+ ndinadzakhumula mikono yace, nkono wace wadidi na ule udakhumulwa kale,+ pontho ndinadzacitisa kuti supada igwe buluka mʼmanja mwace.+ 23 Buluka penepo, ine ndinadzamwaza Aejitu mʼmadzindza anango, mbandiabalalisa mʼmadziko anango.+ 24 Ine ndinadzawangisa mikono ya* mambo wa ku Bhabhilonya,+ mbandiikha supada yanga mʼmanja mwace.+ Ine ndinadzakhumula mikono ya Farau, pontho iye anadzakhuwa mwakugaluza patsogolo pace* ninga pinacita munthu wakuti ali kufa. 25 Ine ndinadzawangisa mikono ya mambo wa ku Bhabhilonya, mbwenye mikono ya Farau inadzakhala yakusowa mphambvu; pontho iwo anadzadziwa kuti ine ndine Yahova ndingaikha supada yanga mʼmanja mwa mambo wa ku Bhabhilonya, iye mbaiphatisira toera kumenyana na dziko ya Ejitu.+ 26 Ine ndinadzamwaza Aejitu mʼmadzindza anango, mbandiabalalisa mʼmadziko anango,+ pontho iwo anadzadziwa kuti ine ndine Yahova.’”