Yahova Atuma Yeremiya Toera Kumwaza Mphangwa

Yahova asankhula Yeremiya toera kukhala mprofeta wa mbumba ya Yuda. Iye ampanga toera aende kamwaza mphangwa kuna mbumba na kuicenjeza toera isiye kucita pinthu pyakuipa. Yeremiya alonga: ‘Yahova, ndine m’phale. Ine nkhabe dziwa kuti ndinalonga tani na mbumba.’ Yahova antawira: ‘Leka kugopa. Ndinakupanga pinafunika iwe kulonga. Ine ndinadzakuphedza.’

Yahova apanga Yeremiya toera acemerese akulu a mbumba na kuswa cikalango ca dongo pamaso pawo mbaapanga: ‘Yerusalemu anadzaswiwa ninga cikalango ici.’ Pidacita Yeremiya pidapangwa iye na Yahova, akulu a mbumba aipirwa kakamwe. Nyantsembe akhacemerwa Pasuri amenya Yeremiya mbam’mangira pa matabwa. Iye aphuphudza nee kwanisa tekenyeka. Mangwana mwace namacibese, Pasuri ansudzula. Yeremiya alonga: ‘Nee ndinamwaza pontho mphangwa.’ Kodi iye asiyadi? Nkhabe. Yeremiya pidanyerezera iye pinthu pidancitikira, iye alonga: ‘Mphangwa za Yahova ndi ninga moto muntima mwanga. Nee ndinasiya kumwaza mphangwa.’ Yeremiya apitiriza kucenjeza mbumba.

Mukupita kwa pyaka, mu nzinda wa Yuda mwadzakhala na mambo mupswa. Anyantsembe na aprofeta authambi akhaipirwa na mphangwa za Yeremiya. Iwo apanga akulu a mbumba: ‘Mamuna uyu athema kuphiwa.’ Yeremiya alonga: ‘Mungandipha, mwapha munthu wakusowa mulando. Mafala analonga ine si anga tayu, mbwenye ndi a Yahova.’ Akulu a mbumba pidabva iwo pyenepi alonga: ‘Mamuna uyu nee athema kuphiwa.’

Yeremiya apitiriza kumwaza mphangwa, pontho akulu a mbumba aipirwa kakamwe. Iwo aphemba mambo toera kupha Yeremiya. Mambo aapanga toera acite pinafuna iwo kuna Yeremiya. Iwo akwata Yeremiya mbaenda kamponya mu ncera wakuzika wakuti ukhali na matope, toera afe. Yeremiya atoma kulirima m’matope.

Buluka penepo, ntumiki wankulu wa panyumba ya mambo akhacemerwa Ebhedhi-Meleki, apanga mambo: ‘Akulu a mbumba aponya Yeremiya mu ncera! Tingansiya mwenemo, iye anafa.’ Mambo atuma Ebhedhi-Meleki pabodzi na amuna 30 toera aende kabulusa Yeremiya mu ncera. Kodi ife tinakwanisambo kutowezera Yeremiya mbatipitiriza kumwaza mphangwa ngakhale mu ndzidzi wakutcingwa?