Kufudzwa Kwa Yerusalemu

Kazinji kene Ayuda akhasiya Yahova mbalambira alungu authambi. Mu pyaka pizinji, Yahova akhapitiriza kuaphedza. Iye atuma aprofeta azinji toera kuacenjeza, mbwenye iwo nee akhaabvera. M’mbuto mwace, iwo akhapwaza aprofeta. Mphapo Yahova acitanji toera kumalisa kulambira madzimunthu kukhacita iwo?

Mambo wa ku Bhabhilonya, Nabhukodhonozore, akhakunda mizinda mizinji. Paulendo wakutoma udakunda iye Yerusalemu, iye akwata Mambo Yeowakini, ana a mambo, anyankhondo na amuna a maluso mbaaendesa ku Bhabhilonya. Iye akwatambo pinthu pyonsene pikhali mu templo ya Yahova. Buluka penepo, Nabhukodhonozore akhazikisa Zedhekiya ninga mambo wa Yuda.

Pakutoma, Zedhekiya akhabvera Nabhukodhonozore. Mbwenye madzindza akhali cifupi na Yerusalemu na aprofeta authambi apanga Zedhekiya toera akhonde kubvera Nabhukodhonozore. Yeremiya ancenjeza: ‘Ungakhonda kubvera, anthu a mu Yuda anadzaphiwa, anadzasowa pyakudya, pontho anathabuka na utenda.’

Pidapita pyaka pisere, Zedhekiya asiya kubvera mambo wa ku Bhabhilonya. Iye aphemba anyankhondo a ku Ejitu toera kumphedza. Nabhukodhonozore atuma anyankhondo ace toera kufudza Yerusalemu. Iwo amanga misasa yawo n’khundu mwa nzinda. Yeremiya apanga Zedhekiya: ‘Yahova alonga kuti ungaperekeka, unadzapulumusa umaso wako na nzinda. Mbwenye ungakhonda, Abhabhilonya anadzapisa Yerusalemu, pontho anakukwata mbakufungira nkaidi.’ Zedhekiya alonga: ‘Nee ndinaperekeka!’

Pidapita caka na hafu, anyankhondo a ku Bhabhilonya aswa mipanda ya Yerusalemu mbapisa nzinda. Iwo apisa templo, apha anthu azinji, pontho akwata anthu anango ninga mabitcu mbaenda nawo ku Bhabhilonya.

Zedhekiya abuluka mu Yerusalemu mbathawa, mbwenye Abhabhilonya antowera. Iwo am’phata cifupi na nzinda wa Yeriko, mbaenda naye kuna Nabhukodhonozore. Mambo Nabhukodhonozore acitisa Zedhekiya kuona mu ndzidzi ukhaphiwa anace. Nabhukodhonozore aswa maso a Zedhekiya mbanfungira nkaidi. Iye akhala mwenemo mpaka kufa kwace. Mbwenye Yahova acita pikiro thangwi ya Ayuda: ‘Pangapita pyaka 70, ndinakucitisani kubwerera ku Yerusalemu.’

Ninji pidacitika kuna aphale adakwatwa ninga mabitcu kuenda ku Bhabhilonya? Kodi iwo mbadapitiriza kukhala akukhulupirika kuna Yahova?