NSOLO 8
Abhrahamu na Sara Abvera Mulungu
Dhuzi na ku Bhabheli, kukhali na nzinda unango ukhacemerwa Uri. Anthu a mu nzinda unoyu akhalambira alungu azinji m’mbuto mwakulambira Yahova. Mbwenye mu nzinda unoyu wa Uri mukhali na mamuna unango wakuti akhalambira basi ene Yahova. Mamuna unoyu dzinace ndi Abhrahamu.
Yahova apanga Abhrahamu: ‘Siya nyumba yako na abale ako mbuenda ku dziko inafuna kukupangiza ine.’ Buluka penepo, Mulungu apikira: ‘Ndinakucitisa kukhala dzindza ikulu, pontho mbumba zonsene pa dziko yapantsi zinadzapaswa nkhombo kubulukira mwa iwe.’
Abhrahamu nee akhadziwa mbuto idapangwa iye na Yahova toera aende. Ngakhale tenepo, iye anyindira Yahova. Natenepa, Abhrahamu na nkazace, Sara pabodzi na pai wace, Tera na mwana wa m’bale wace akhacemerwa Loti, apaka mitolo yawo mbaenda.
Abhrahamu akhali na pyaka 75 pidafika iye na banja yace ku dziko idapangwa iwo na Yahova. Dziko ineyi ikhacemerwa Kanani. Mulungu alonga na Abhrahamu mbacita pikiro iyi: ‘Ndinadzapereka dziko iyi yonsene kuna anako.’ Mbwenye Abhrahamu na Sara akhadakalamba, pontho nee akhali na mwana. Mphapo Yahova mbadakwanirisa tani pikiro ineyi?
“Thangwi ya cikhulupiro, Abhrahamu . . . abvera, mbaenda ku mbuto ikhafuna iye kutambira ninga unthaka; iye abuluka mbaenda, maseze nee akhadziwako kukhaenda iye.”—Ahebheri 11:8