Mulungu Acita Kudzulu na Dziko Yapantsi

Yahova Mulungu ndi Nciti wathu. Iye acita pinthu pyonsene, pinthu pinakwanisa ife kuona na pinacimwana ife kuona. Mbadzati kucita pinthu pinaona ife, iye acita aanju azinji kakamwe. Mphapo aanju mbani? Aanju ndi akusiyana na ife, pontho ninga Yahova ife nee tisakwanisa kuaona. Anju wakutoma adacita Yahova adzakhala m’phedzi wace. Anju unoyu aphedza Yahova toera kucita nyenyezi, maplaneta na pinthu pinango pyonsene. Ibodzi mwa maplaneta anewa ndi dziko ino yakubalika inakhala ife.

Natenepa, Yahova acita dziko yapantsi toera pinyama na anthu akhalemo. Iye acita dzuwa toera kumwanikira dziko. Iye acitambo mapiri, bara na mikulo.

Buluka penepo, ninji pidacitika? Yahova alonga: ‘Ndinacita tsanga, miti yakubala mbeu na miti yakubala misapo.’ Natenepa, pa dziko yapantsi patoma kuoneka mitundu yakusiyana-siyana ya misapo, masamba na maluwa. Buluka penepo, Yahova acita pinyama pyonsene, pinyama pyakumburuka, pyakusambirira, pyakufamba na miyendo na pyakufamba na mimba. Iye acitambo pinyama ping’ono ninga masulo na pinyama pikulu ninga ndzou. Ndi cinyama cipi cinakomerwa na iwe?

Buluka penepo, Yahova apanga anju wakutoma: “Tendeni ticite munthu.” Anthu mbadakhala akusiyana na pinyama. Iwo mbadakwanisa kukhala na luso yakucita pinthu, yakulonga, yakuseka na yakucita phembero, pontho mbadakwanisa kutsalakana dziko yapantsi na pinyama. Usadziwa dzina ya mamuna wakutoma? Tende tione.