Kumbukani Nkazi wa Loti

Loti akakhala ku Kanani na tiu wace Abhrahamu. Abhrahamu na Loti adzakhala na pinyama pizinji kakamwe, pontho nee mbadakwanisabve kukhala pabodzi. Abhrahamu apanga Loti: ‘Ndisaona kuti nee tinakwanisabve kukhala pabodzi pene. Iwe unakwanisa kusankhula mbuto inafuna iwe kukhala, ine ndinadzaenda kukhundu inango.’ Mwandimomwene Abhrahamu akhali munthu wakukoma ntima.

Loti aona khundu ibodzi yakubalika kakamwe dhuzi na nzinda wa Sodhoma. Mbuto ineyi ikhali na madzi mazinji na tsanga izinji. Natenepa, Loti asankhula mbuto ineyi mbafuluka pabodzi na banja yace.

Anthu a nzinda wa Sodhoma na Gomora akhali akuipa kakamwe. Natenepa, Yahova atonga kufudza mizinda ineyi. Mbwenye Mulungu akhafuna kupulumusa Loti na banja yace. Na thangwi ineyi, Iye atuma aanju awiri toera kuacenjeza: “Cimbizani! Bulukani muno, thangwi Yahova asafuna kufudza nzinda uno.”

Mbwenye Loti nee abuluka mwakucimbiza. Iye akhadembuka pyace. Natenepa, aanju aphata Loti, nkazace na anace awiri, mbaabulusa kunja kwa nzinda. Aanju alonga: ‘Thawani toera mupulumuke. Lekani kuyang’ana nduli, mungayang’ana nduli munafa!’

Pidafika iwo mu nzinda ukhacemerwa Zoari, Yahova aphatisira moto na enxofre toera kufudza nzinda wa Sodhoma na Gomora. Mizinda ineyi miwiri yafudzirwatu. Nkazi wa Loti pidakhonda iye kubvera pitsogolero pya Yahova mbayang’ana nduli, iye asanduka kudza culu ca munyu! Loti na anace awiri apulumuka thangwi iwo abvera Yahova. Iwo atsukwala kakamwe thangwi yakukhonda kubvera kwa nkazi wa Loti. Mbwenye iwo atsandzaya thangwi yakubvera pitsogolero pya Yahova.