Kodi Bhibhlya Inakuphedzani Kupirira Utenda Wakukhonda Kuwanga?

Ntawiro wa m’Bhibhlya

Inde. Mulungu asatsalakana atumiki ace anabva kupha. Bhibhlya isalonga tenepa thangwi ya ntumiki wa Mulungu wakukhulupirika: “Yahova nkhabe kun’duwala angakhala patalimba thangwi yakubva kupha.” (Masalmo 41:3) Khala imwe muli na utenda wakukhonda kuwanga, makhundu matatu anatowera anakuphedzani toera kupirira:

1. Phembani Mulungu toera akupaseni mphambvu kuti mupirire. “Ntendere wa Mulungu wakuti usapiringana kubvesesa konsene,” unakuphedzani toera mupitirize kupirira na kukhonda kudzudzumika kakamwe.—Afilipi 4:6, 7.

2. Khalani na maonero adidi. Bhibhlya isalonga: “Ntima wakutsandzaya ndi ntombwe wadidi, mbwenye kutsukwala kusamalisa mphambvu za munthu.” (Misangani 17:22) Yeserani kuseka, peno kulonga pinthu pyakusekesa pyakuti pinakuphedzani kuduwala nyatwa zanu, pontho pyenepi pinakuphedzani toera mukhonde kunentseka kakamwe na utenda wanu.

3. Khulupirani pidapikira Mulungu. Kudikhira pinthu pyadidi kuwankwanisa kukuphedzani toera kukhala akutsandzaya mwakukhonda tsalakana utenda. (Aroma 12:12) Bhibhlya isatipanga kuti ntsogolo “nee munthu m’bodzi anakhala pa dziko anadzalonga kuti: “Ndiri kubva kupha.’” (Izaiya 33:24) Mu ndzidzi unoyu Mulungu anadzamalisa mautenda onsene kuphatanizambo ale akuti anthu nee asakwanisa kuawangisa. Mwacitsandzo, Bhibhlya isalonga tenepa thangwi ya pinafuna kudzacita Mulungu toera kumalisa kukalamba: “Khanda yace mbikhale itete kupiringana ya mwanang’ono; mbakhale pontho na mphambvu ninga zikhali na iye mu uphale wace.”—Yobe 33:25

Dziwani ipi: Mboni za Yahova zisadziwa kuti Mulungu asaphedza anthu anabva kupha, mbwenye ngakhale tenepo, iwo asasaka ciphedzo ca madotoro angabva kupha. (Marko 2:17) Nee tisakakamiza anthu toera atawire ntundu unango wa ukondzi, thangwi munthu m’bodzi na m’bodzi asafunika asankhule ekhene ntundu wa ukondzi unafuna iye.