Toera Kutowezera Yezu, Musafunika Kukhala. . .

WANTSISI

Ninga munthu waungwiro, Yezu nee athimbana na nyatwa zinatamba anthu kazinji kene. Ngakhale tenepo, iye akhabvera ntsisi anthu. Iye akhafuna kakamwe kuaphedza, pontho m’midzidzi inango akhacita pinthu kupiringana pire pikhadikhirwa iye kucita. Mwandimomwene, iye akhacita pyenepi thangwi akhabvera anthu ntsisi. Onani pitsandzo pinagumanika mu Nsolo 32, 37, 57, 99.

WAKUDZOLOWEREKA

Anthu a mathunga onsene—anapiana na akulu—akhali akusudzuka toera kucedza na Yezu thangwi iye nee akhapangiza ninga wakuphatika kakamwe peno wakudzikuza. Nakuti anthu akhaona citsalakano ceneci, iwo akhakomerwa kukhala dhuzi na iye. Toera kuona njira ikhatsalakanira iye anthu, onani Nsolo 25, 27, 95.

NA NSAMBO WAKUCITA PHEMBERO

Kazinji kene Yezu akhaphembera kwa Babace kubulukira muntima, mu ndzidzi ukhali iye ekha, pontho na alambiri andimomwene. Iye akhacita pyenepi, tayu basi m’midzidzi yakudya. Iye akhaphembera toera kupereka takhuta kuna Babace, kunsimba, pontho toera kusaka ciphedzo cace mbadzati kucita pisankhulo pyakufunika. Onani pitsandzo pinagumanika mu Nsolo 24, 34, 91, 122, 123.

WAKUKOMA NTIMA

Midzidzi inango Yezu akhacimwana kupuma thangwi akhafuna kuphedza anango. Iye nee akhaikha pifuno pyace pa mbuto yakutoma. Natenepa iye apangiza citsandzo cakuti tinakwanisa kucitowezera. Pfundzani citsandzo cidapangiza Yezu mu Nsolo 19, 41, 52.

WAKULEKERERA

Yezu nee akhapfundzisa basi ene kufunika kwa kulekerera, mbwenye iye akhapangizambo n’khaliro unoyu munjira ikhatsalakanira iye anyakupfundzace na anthu anango. Nyerezerani mwacidikhodikho pitsandzo pinagumanika mu Nsolo 26, 40, 64, 85, 131.

WAPHINGA

Bhibhlya ikhadalonga mwanyapantsi kuti Ayuda azinji mbadakhonda Mesiya, pontho anyamalwa ace mbadamupha. Pyenepi mbipidacitisa Yezu kufewa manungo mbakhonda kuphedza anthu azinji. Mbwenye iye aphedzera mwaphinga ulambiri wandimomwene. Phinga idapangiza iye ndi citsandzo cadidi kwa atowereri ace onsene akuti asathimbana na nyatwa na kutcingwa. Onani Nsolo 16, 72, 103.

WAKUCEPESEKA

Ndzeru na udziwisi wa Yezu ukhali wakusiyana kakamwe na anthu akusowa ungwiro. Umaso wace waungwiro ukhancitisa kukhala na maluso na manyerezero akusiyana kakamwe na anthu anango. Ngakhale tenepo, iye akhatumikira anango mwakucepeseka. Munagumana pyenepi mu Nsolo 10, 62, 66, 94, 116.

WAKUPIRIRA

Ndzidzi onsene ukhacimwana apostolo ace na anthu anango kutowezera citsandzo cace na kuphatisira pikhapfundzisa iye, Yezu akhapirira. Mwakupirira, iye akhabwerezera pipfundziso pyakuti anacitanji toera akhale na uxamwali na Yahova. Nyerezerani pitsandzo pyakupirira kwa Yezu mu Nsolo 74, 98, 118, 135.