Tiri Na Mpfuma Zakufunika Kakamwe Towera Kugawana Na Anango
1 Mafala a Mulungu adzala na mpfuma zauzimu zakuti tisazifuna kakamwe. (Sal. 12:6; 119:11, 14) Mu n’dzidzi unango, Yezu aphatisira pitsanzo towera kupangiza makhundu akusiyana-siyana a Umambo, na buluka penepo abvunza anyakupfunzace: “Ipyo pyonsene, mwapibvesa?” Mudatawira iwo kuti apibvesesa pyonsene, iye alonga kuna iwo: “Mphapo, nyakudziwisa wonsene wa mwambo adafundza pya dziko [peno umambo] ya kudzulu, analandana na mbuya wa dzindza, anabulusa m’mpfuma mwache pinthu pipswa na pya kalembo.”—Mat. 13:1-52.
2 Pipfunziso pya Bhibhlya pidapfunza ife pakutoma pinakwanisa kuoniwa ninga mpfuma zakale. Mu kuthimizira n’dzidzi onsene cidziwiso cathu m’pfunziro yathu tekha ya pinthu pyakubisika pya Mafala a Mulungu, ife tisagumana pipfunziso pinango pya Bhibhlya, pyakuti kwa ife ndi mpfuma zipswa. (1 Akor. 2:7) Pontho, na ciphedzo ca “mbandazi wakukhulupirika na wanzeru,” ife tisabvesesa mpfuma zipswa.—Mat. 24:45, Mphangwa Zadidi.
3 Ife tisalemedza kakamwe mpfuma zenezi zauzimu, zakale na zipswa. Pyenepi pisaticitisa kutawira kupfunziswa na kukhala na luso ninga apfunzisi a Mafala a Mulungu, mbatigawana na anango mwakukoma ntima pipfunziso pyakufunika pinapfunza ife.
4 Pfunzani Kubulukira Ku Citsanzo Ca Yezu: Towera kupangiza kuti iye akhapibva tani thangwi ya mpfuma zenezi, Yezu akhawangisira kakamwe kugawana mpfuma zenezi na anango. Ngakhale mu n’dzidzi ukhali iye wakuneta, hadasiya tayu kuikha mpfuma ‘n’chikwa mwace.’—Jwau 4:6-14.
5 Ufuni wa Yezu kwa ale akhali akucerenga mwauzimu wankulumiza towera kugawana nawo mpfuma zakupasa umaso za pipfunziso pya Mulungu. (Sal. 72:13) Iye abvera ntsisi ale akhali na njala yauzimu na akulumizika towera “kuapfundisa pinthu pizinji.”—Mko. 6:34.
6 Sangizirani Yezu: Tingalemedza kakamwe mpfuma ziri na ife, ninga pidacita Yezu, tinadzakhala akufunisisa kupangiza anthu mpfuma zenezi zauzimu m’Bhibhlya. (Mis. 2:1-5) Ngakhale m’midzidzi inango tinakwanisa kukhala akuneta, tinadzalonga pya pipfunziso pya Malemba kubulukira mu ntima. (Mko. 6:34) Kukomerwa kwathu na mpfuma ziri na ife kunadzaticitisa kucita pyonsene pinakwanisa ife mu utumiki, n’dzidzi onsene mbitisaka kugawana na anango mwakukwana.