BHIBHLYA ISACINJA UMASO WA ANTHU

Cincino Ndisapibva Kuti Ndinakwanisa Kuphedza Anango

Yakulongwa na Julio Corio

CAKA CAKUBALWA: 1981

DZIKO YAKUBALWA: GUATEMALA

MBIRI: UWANA WAKUNENTSA KAKAMWE

MBIRI YANGA: Ndabalwa ku Acul, nzinda wa kumadokero a dzuwa a mapiri a Guatemala. Banja yathu ndi ya Ixil, nsoka wa dzindza ya Maya. Kusiyapo Cixipanyola, ndakula mbandikalonga cilongero ca pa cisa cathu. Nkhondo ya pyaka 36 mu Guatemala yacitika mbandiri na pyaka pyakutoma mu umaso. Nkati mwa nkhondo ineyi anthu azinji a dzindza ya Ixil aphiwa.

Mukhali ine na pyaka pinai, m’bale wanga wamamuna wa pyaka pinomwe akhasendzeka na granada yasweka mwasusudeu. Ndaluza maso anga thangwi yakusweka kwayo; mwakutsukwalisa, m’bale wanga alowa. Natenepa, uwana wanga ndaumalira ku cigawiko cinatsalakana ana akuti ndi aboliboli mu Nzinda wa Guatemala, kudapfundza ine Cibraile. Kweneku na mathangwi akuti nee ndikhaabvesesa, muyang’aniri wa cigawiko ceneci andikhondesa kusendzeka na ana anango, pontho andzanga a paxikola akhandicalira. Ndzidzi onsene ndikhali wakutsoperwa, basi ene kudikhira ndzidzi unabuluka ife ferya ya nthanda ziwiri pa caka toera kuenda kunyumba kakhala na mai wanga, wakuti akhanditsalakana mwaufuni. Mwakutsukwalisa, mama alowa mukhali ine na pyaka khumi pyakubalwa. Ndanentseka kakamwe thangwi yakupibva kuti ndaluza munthu m’bodzi ene basi wakuti akhandifuna pa dziko yonsene.

Mukhali ine na pyaka 11, ndabwerera mu nzinda wathu mbandikhala na m’bale wanga wamamuna wakusiyana naye mama pabodzi na banjace. Iwo anditsalakana mwakumanungo, mbwenye nee m’bodzi akhakwanisa kukhurudza mabvero anga. Midzidzi inango ndikhalira mwakugaluza kuna Mulungu: “Thangwi yanji mama alowa? Thangwi yanji ndine boliboli?” Anthu akhandipanga kuti nyatwa zenezi zikhali cifuniro ca Mulungu. Ndaona Mulungu kukhala wakuuma ntima, pontho wa tsankhulo. Ndikhacimwana kudzipha basi ene thangwi ndikhasowa njira yakucitira pyenepi.

Kukhala boliboli kwandicitisa kukhala wakusowa citsidzikizo cakumanungo na ca m’manyerezero. Ninga m’phale, kazinji kene ndikhapitiswa m’mabonde mwakukakamiza. Cipo ndasuma usumankha unoyu thangwi ndikhanyerezera kuti nee m’bodzi mbadapitsalakana. Anthu nee akhalonga maka na ine, inembo nee ndikhalonga nawo. Ndikhapambulika na kuipirwa, pontho nee ndikhanyindira munthu.

BHIBHLYA YACINJA TANI UMASO WANGA: Kumatomero kwa uphale wanga, banja ibodzi ya Mboni za Yahova yandigumana kuxikola pa ndzidzi wakupuma. Mpfundzisi wankazi wa paxikola, wakuti akhabva ntsisi kakamwe na makhaliro anga, aaphemba toera kudzacedza na ine. Iwo andipanga pya mapikiro a Bhibhlya akuti anyakufa anadzalamuswa, pontho kuti pa ntsiku yace aboliboli anadzaona. (Izaiya 35:5; Jwau 5:28, 29) Ndakomerwa na pidandipanga iwo, mbwenye pikhali pyakunentsa kuna ine kucedza nawo thangwi nee ndikhafuna kulonga. Mbwenye mwakukhonda tsalakana kukhonda kwanga funa longa nawo, mwakupirira na mwacitsalakano iwo apitiriza kubwera toera kundipfundzisa pinalonga Bhibhlya. Banja ineyi ikhafamba nsindzo wa makilometru 10, pontho akhapita na paphiri toera kufika mu nzinda ukhakhala ine.

M’bale wanga andipanga kuti iwo abvala mwadidi mbwenye nee mbakupfuma. Ngakhale tenepa, ndzidzi onsene akhanditsalakana mu kundibweresera miyoni. Ndadzindikira kuti kudzimana kweneku mbakudapangizwa basi ene na Akristu andimomwene.

Ndapfundza Bhibhlya mukuphatisira mabukhu a Cibraile. Maseze ndikhabvesesa pikhapfundza ine, pinango pikhandinentsa kupitawira. Mwacitsandzo, ndanentseka kukhulupira khala Mulungu asanditsalakanadi ninga munthu, pontho kuti anango anakwanisa kupangiza mabvero a Mulungu kuna ine. Ndabvesesa thangwi yanji Yahova asatawirisa pyakuipa mu ndzidzi wakucepa, mbwenye pyandinentsa kakamwe toera kumuona ninga Baba waufuni wandimomwene.a

Mwapang’ono pang’ono, pidapfundza ine m’Malemba pyandiphedza kucinja maonero anga. Mwacitsandzo, ndapfundza kuti Mulungu asabva ntsisi kakamwe na anthu anathabuka. Thangwi ya alambiri ace adatsalakanwa mwakuipa, Mulungu alonga: “Ine ndaona kusanyika kwa mbumba yanga . . . Ndaona kubva kwawo kupha.” (Eksodo 3:7) Mudatoma ine kupasa ntengo kukoma ntima kwa Yahova, ndakulumizika toera kuperekeka kuna iye. Mu caka 1998, ndabatizwa ninga m’bodzi wa Mboni za Yahova.

Caka cibodzi bulukira padabatizwa ine, ndacita kursu ya aboliboli cifupi na nzinda wa Escuintla. Nkulu wa mpingo wa cisa ceneci aona nyatwa ikhali na ine toera kugumanika pa misonkhano mukakhala ine ku nzinda wathu. Mpingo ukhali cifupi na phiri ibodzi ene ikhapita na banja ire ya Mboni za Yahova toera kudzandipfundzisa, pyakuti pikhali pyakunentsa kwa ine kufamba nsindzo unoyu. Toera kundiphedza, nkulu wa mpingo agumana banja yakuti mwakufuna kwayo yandikwata toera kakhala panyumba yawo mbandiphedza toera kuenda kumisonkhano ya mpingo. Mpaka lero, iwo asanditsalakana ninga ciwalo ca banja yawo.

Mbandidakwanisa kulonga pitsandzo pizinji pya ufuni wandimomwene udandipangiza abale na alongo m’mpingo. Mwa pyonsene, pyakugumana napyo pyenepi pisandipasa cinyindiro cakuti ninga m’bodzi wa Mboni za Yahova, ndiri pakati pa Akristu andimomwene.​—Jwau 13:34, 35.

NDAPHINDULA TANI: Ine nkhabe kuonekabve ninga wakukhonda thema na wakusowa cidikhiro. Cincino umaso wanga uli na pifuniro pizinji. Ninga ntumiki wa ndzidzi onsene m’basa yakupfundzisa ya Mboni za Yahova, ndisaikha manyerezero mukupfundzisa undimomwene wakufunika kakamwe wa Bhibhlya m’mbuto mwakunyerezera utenda wanga basi. Pontho, ndiri na mwai wakutumikira ninga nkulu wa mpingo na wakucita nkhani zapakweca zakubuluswa m’Bhibhlya m’mipingo yapacisa. Ndiri na mwai wakucita nkhani zakubuluswa m’Bhibhlya m’misonkhano ya gawo yakuti pasagumanika anyakubvesera azinji.

Mu caka 2010, ndamalisa Xikola Yakupfundzisa Basa Ya Utumiki (cincino isacemerwa Xikola Ya Amwazi Mphangwa a Umambo) idacitika ku El Salvador. Xikola ineyi yandikhunganya toera kukwanirisa mwadidi mabasa anga. Mapfundziro anewa andicitisa kupibva kuti Yahova Mulungu, anakhunganya munthu onsene toera kucita basa yace, asandipasa ntengo na kundifuna.

Yezu alonga: ‘Kupasa kusakomeresa kupita kutambira.’ (Machitiro 20:35) Lero, ndine wakutsandzaya kakamwe, pontho maseze pakutoma nee ndikhanyerezera kuti mphyakukwanisika, cincino ndisapibva kuti ndinakwanisa kuphedza anango.

[Cidzindikiro capantsi]