NSOLO WA REVISTAKodi | KUCITA PHEMBERO NDI KWAKUPHINDULISA?

Thangwi Yanji Anthu Asacita Phembero?

“Ndikhagwa kakamwe cabutha. Ndikhacita phembero toera kuwina mpfuma. Mbwenye nee pikhacitika.”​—Samuel,a Kenya.

“Kuxikola basi ene tikhacita maphembero akubwereza adatipfundzisa iwo.”​—Teresa, Filipina.

“Ndisacita phembero ndingathimbana na nyatwa. Ndisaicita toera kulekererwa madawo, pontho toera ndikhale Nkristu wadidi.”​—Magdalene, Gana.

Mafala a Samuel, Teresa na Magdalene asapangiza kuti anthu asacita phembero na mathangwi akusiyanasiyana. Anango asacita maphembero akubulukira muntima; anango asaacita mwakusowa mabvero. Natenepa, peno asacita phembero toera kupembera maezame kuxikola, peno kuphembera toera nsoka wawo wa bhola uwine, kuphemba citsogolero ca Mulungu m’banja peno mathangwi anango, mbwenye anthu azinji asakulumizika toera kucita phembero. Mwandimomwene, anyakufufudza asapangiza kuti ngakhale anthu akuti nee asacita khundu yauphemberi asacita maphembero mwakukhonda phonya.

Musacita phembero? Khala ndi tenepo, musaphembanji? Khala musacita peno nkhabe, panango musabvundzika: ‘Kodi kucita phembero ndi kwakuphindulisadi? Alipo anabvesera maphembero?’ Nyakulemba m’bodzi apereka maonero akuti phembero “ndi ntombwe . . . usakhala ninga kufuya ntsomba panyumba.” Akulu anayang’anira pya mitombwe apangiza maonero mabodzi ene mukulonga kuti phembero ndi ntundu “unango wa mitombwe.” Kodi alipo anacita phembero ninga nsambo basi peno anaiona ninga ntombwe wadidi?

Mbwenye, Bhibhlya isapangiza kuti phembero isacita pizinji piringana mitombwe. Iyo isatipangiza kuti alipo anabvesera mwandimomwene maphembero anacitwa mu njira yadidi, pontho anaphemba pinthu pyadidi. Pyenepi mphyandimomwene? Tendeni tione.

[Cidzindikiro capantsi]

NSOLO WA REVISTAKodi | KUCITA PHEMBERO NDI KWAKUPHINDULISA?

Alipo Anabvesera Maphembero?

Anthu anango asaona kucita phembero ninga kubvunga ndzidzi, thangwi asanyerezera kuti nkhabepo anaabvesera. Anango ayesera kucita phembero mbwenye aona kuti nee atawirwa. Nyakukhonda khulupira kukhalapo kwa Mulungu m’bodzi anyerezera pinadziwa iye thangwi ya Mulungu mbaphembera: “Basi ene nditawireni nciwerewere.” Mbwenye iye alonga kuti Mulungu apitiriza “kukhala wakumatama.”

Ngakhale tenepo, Bhibhlya isatipasa cinyindiro cakuti alipo Mulungu wakuti asabvesera maphembero. Bhibhlya iri na mafala awa adalemberwa anthu kale kakamwe: ‘Mulungu ndi wantsisi, mungancemera, anadzakutawirani.’ (Izaiya 30:19) Vesi inango ya Bhibhlya isalonga: “Mulungu . . . asakomerwa na maphembero a anthu a ulinganiri.”​—Misangani 15:8.

Bhibhlya isalongambo pitsandzo pya anthu adabverwa maphembero awo. Vesi inango isalonga kuti Yezu acita ‘maphembero kuna Ule akhakwanisa kumpulumusa’ pontho “iye abverwa.” (Ahebere 5:7) Pitsandzo pinango pisagumanika pa Danyele 9:20, 21 na 2 Pya dziko ya Israele 7:1.

Mphapo, thangwi yanji maphembero a anango nkhabe kutawirwa? Toera phembero ibviwe, tisafunika kuicita basi ene kuna Mulungu analongwa m’Bhibhlya, Yahova,a tayu kuna mulungu unango peno makolo akale. Mulungu asafunambo kuti ‘tiphembe pinthu ninga munafunira iye’​—pinthu pinatawirisa iye. Mulungu asatipasa cinyindiro cakuti tingacita phembero munjira ineyi, iye “anatibvera.” (1 Jwau 5:14) Natenepa, toera maphembero athu abviwe, tisafunika kudziwa Mulungu analongwa m’Bhibhlya, pontho kudziwa cifuniro cace.

Azinji asakhulupira kuti phembero si nsambo wauphemberi basi tayu, mbwenye Mulungu asaabvesera mbaatawira. Isaac, wa ku Kenya, alonga: “Ndacita phembero toera kuphemba ciphedzo cakubvesesa Bhibhlya. Mwakukhonda dembuka, munthu unango abwera mbandiphedza.” Hilda wa ku Filipina, akhafuna kusiya kufumali. Mukhayesera iye mbacimwana, mamunace ampanga, “Ndiye tani ucite phembero toera Mulungu akuphedze?” Iye aphatisira uphungu unoyu mbalonga: “Ndadzumatirwa na njira idandiphedzera Iye. Ndatoma kumalisa cifuno ca kufumali. Buluka penepo ndasiya.”

Kodi mphyakukwanisika Mulungu kutsalakana pinakudzudzumisani pyakuti pisabverana na cifuniro cace?

[Cidzindikiro capantsi]

[Ntsonga ikulu pa tsamba 4]

Yezu acita phembero kuna Babace, ‘mbabverwa.’​—Ahebere 5:7

NSOLO WA REVISTAKodi | KUCITA PHEMBERO NDI KWAKUPHINDULISA?

Thangwi Yanji Mulungu Asatiphemba Kucita Phembero?

Mulungu asafuna kuti tikhale axamwali ace.

Axamwali asacedza kazinji kene toera kuwangisa uxamwali wawo. Munjira ibodzi ene, Mulungu asatiphemba kulonga na iye toera kutomesa uxamwali wa ponda ndipondembo. Iye alonga: ‘Imwe munadzandicemera na kudembetera, Inembo ndinadzakutawirani.’ (Yeremiya 29:12) Munalonga imwe na Mulungu m’phembero ‘munadzanfendedzera na iye anadzakufendedzeranimbo.’ (Tyago 4:8) Bhibhlya isatipasa cinyindiro cakuti ‘Yahova ali dhuzi na onsene anancemera.’ (Masalmo 145:18) Munathimiza ife kucita phembero kuna Mulungu, uxamwali wathu na iye unadzakhalambo wakuwanga.

Mulungu asafuna kukuphedzani.

Yezu alonga: ‘Mbani mwa imwe, mwanace angam’phemba nkate, anadzampasa mwala? Peno, angaphemba ntsomba mbampasa nyoka? Ngakhale ndimwe anthu akuipa, musadziwa kupasa ananu pinthu pyadidi, Babanumbo wakudzulu anadzapasa pinthu pyadidi ale anam’phemba.’ (Mateo 7:9-11) Inde, Mulungu asakuphembani kucita phembero thangwi ‘iye asakutsalakanani,’ pontho asafuna kukuphedzani. (1 Pedro 5:7) Iye asakuphembani toera mundziwise nyatwa zanu. Bhibhlya isatipanga: ‘Lekani kutsamali nee na cinthu cibodzi tayu, mbwenye pakulonga maphembero, pakudembetera, pakucitambo takhuta mudziwise Mulungu pinthu pyanu pyonsene.’​—Afilipi 4:6.

Anthu ali na pifuno pyauzimu.

Anyakupfundza pya kucitwa kwa anthu apangiza kuti anthu azinji ali na cifuno cakucita phembero. Ngakhale anyakukhonda khulupira na anyakupenula kukhalapo kwa Mulungu, ali nacombo cifuno ceneci.a Pisapangiziratu kuti anthu acitwa na pifuno pyauzimu. Yezu alonga: “Anyakutsandzaya ndi ale anadzindikira pifuno pyawo pyauzimu.” (Mateo 5:3, Tradução do Novo Mundo) Njira ibodzi toera kukwanirisa pifuno pyenepi ndi kucita phembero kuna Mulungu mwakukhonda phonya.

Ndi maphindu api anafuna ife kudikhira tingatawira phembo ya Mulungu yakucita phembero kuna iye?

[Cidzindikiro capantsi]

[Ntsonga ikulu pa tsamba 5]

‘Yahova ali dhuzi na onsene anancemera.’​—Masalmo 145:18

[Bokosi pa tsamba 5]

Kodi Phembero Isaphatanizanji?

Bhibhlya isapangiza kuti phembero isakhuya makhundu onsene a umaso wathu. Iyo isaphataniza:

Kubweka madawo “Ndabweka madawo anga kuli Imwe, mbandikhonda kubisa pontho pyakuipa pyanga.”​—Masalmo 32:5.

Kupereka takhuta ‘Mphyadidi kupereka takhuta kuna Yahova.’​—Masalmo 92:1.

Kusimba ‘Ndinadzasimba Yahova ndzidzi onsene; mbiri yace ndinadzaikuza kwenda na kwenda.’​—Masalmo 34:1.

Kuphemba citsogolero ‘Nditsogolereni pa njira ya matongero anu, thangwi ndisakomerwa nawo pikulu pyene.’​—Masalmo 119:35.

Kuphemba mphambvu ‘Mundiyang’ane mbamundibvera ntsisi. Wangisani ntumiki wanu na mphambvu zanu.’​—Masalmo 86:16.

NSOLO WA REVISTAKodi | KUCITA PHEMBERO NDI KWAKUPHINDULISA?

Phembero Pinakwanisa Iyo Kukucitirani

Mwacibaliro, mbamudzati cita cinthu musatoma bvundzika khala cinakuphindulisani. Kodi nkhucenama kubvundzika munjira ineyi thangwi ya phembero? Nkhabe. Mwacibaliro tisafuna kudziwa khala phembero isaphindulisa. Ngakhale mamuna wakulungama Yobe abvundzika: “Kodi ndingancemera, anadzanditawira?”​—Yobe 9:16, NM.

M’misolo idamala, tadinga maumboni anapangiza kuti phembero isabveka pizinji piringana nsambo wauphemberi peno mitombwe ya m’manyerezero. Mulungu wandimomwene asabvesera maphembero. Tingacita phembero munjira yadidi mbatiphemba pinthu pyakuthema, iye anadzabvesera. Inde, iye asatidembetera toera kunfendedzera. (Tyago 4:8) Mphapo, tinadzaphindulanji tingakhala na nsambo wakucita phembero? Tendeni tidinge maphindu mangasi basi.

Ntendere wa m’manyerezero.

Pakuthimbana na nyatwa mu umaso wanu, musapswipa ntima kakamwe? M’midzidzi ineyi, Bhibhlya isatiwangisa toera ‘kuphembera ndzidzi onsene’ na ‘kudziwisa Mulungu pinthu pyathu pyonsene.’ (1 Atesalonika 5:17; Afilipi 4:6) Bhibhlya isatipasa cinyindiro cakuti tingacita phembero kuna Mulungu, ‘ntendere wa Mulungu wakupiringana ndzeru zonsene unadzakoya mitima yathu na ndzeru zathu.’ (Afilipi 4:7) Tinakwanisa kugumana ntendere wa m’manyerezero mukulonga pinatidzudzumisa kuna Babathu wakudzulu. Inde, iye asatiwangisa toera kucita pyenepi. Masalmo 55:22, isalonga: “Siyira [Yahova] pinadzudzumika na iwe, thangwi ndiyene anakuonera.”

Anthu azinji pa dziko yonsene agumana ntendere unoyu. Hee Ran, wa ku Koreya Wakubangwe, alonga: “Ngakhale ndisathimbana na nyatwa zizinji, ndingacita phembero ndisasudzuka na ndisagumana mphambvu toera kupirira.” Cecilia, wa ku Filipina, alonga: “Nakuti ndine mama, ndisadzudzumika kakamwe thangwi ya ananga acikazi na mai wanga, wakuti nee asakwanisabve kundidzindikira. Phembero isandiphedza kuthimbana na pinentso mu umaso wanga ntsiku na ntsiku mwakukhonda dzudzumika kakamwe. Ndisadziwa kuti Yahova anadzandiphedza kuatsalakana.”

Cibalangazo na ciwangiso pakuthimbana na mayesero.

Musathimbana na kupswipa ntima kukulu, peno makhaliro akugopswa kakamwe mu umaso? Kucita phembero kuna ‘Mulungu wa cibalangazo consene’ kunakwanisa kubweresa cisudzulo cikulu kakamwe. Bhibhlya isalonga kuti iye ‘asatibalangaza mu nyatwa zathu zonsene.’ (2 Akorinto 1:3, 4) Mwacitsandzo, Yezu mukhanentseka iye m’manyerezero, ‘agodama pantsi mbatoma kucita phembero.’ Ninji pidatowerera? ‘Anju abuluka kudzulu mbamuwangisa.’ (Luka 22:41, 43) Nehemiya, mamuna unango wakukhulupirika, agopeswa kakamwe na anthu akuipa akuti akhafuna kuncimwanisa kucita basa ya Mulungu. Iye aphembera: “Wangisani manja anga.” Pidatowerera pisapangiza kuti Mulungu aphedza Nehemiya kukunda kugopa mbamalisa basa idapaswa iye. (Nehemiya 6:9-16, NM) Reginald, wa ku Gana, alonga: “Ndingacita phembero makamaka mu pinentso pikulu, ndisapibva kuti ndalonga pinentso pyanga kuna munthu wakuti anakwanisa kundiphedza, pontho wakuti asandipasa cinyindiro cakuti ndileke kugopa.” Inde, Mulungu anakwanisa kutibalangaza tingacita phembero kuna iye.

Udziwisi wa Mulungu.

Pisankhulo pyathu pinakwanisa kukhuya ife na anyakufunika athu kwenda na kwenda. Tinacita tani pisankhulo mwandzeru? Bhibhlya isalonga: ‘Munthu angasowa ndzeru [pakuthimbana na nyatwa], aphembe Mulungu, thangwi Mulungu asapasa anthu onsene mwakudzala manja.’ (Tyago 1:5) Tingaphemba udziwisi, Mulungu anakwanisa kuphatisira nzimu wace wakucena toera kutitsogolera kuti ticite pisankhulo pyadidi. Ife tinakwanisa kuphemba nzimu wakucena thangwi Yezu asatipasa cinyindiro cakuti ‘Baba wakudzulu anadzapasa nzimu wakucena ale anauphemba.’​—Luka 11:13.

Ngakhale Yezu abvambo kufunika kwa kuphemba Babace pakufuna kucita pisankhulo pyakufunika. Bhibhlya isatipanga kuti mukhafuna iye kusankhula amuna 12 toera kukhala apostolo ace, ‘iye amala masiku amumphu mbakaphembera kuna Mulungu.’​—Luka 6:12.

Ninga Yezu, azinji lero akhulupira mafala anewa mudaona iwo kuti Mulungu atawira maphembero awo a kucita pisankhulo mwandzeru. Regina, wa ku Filipina, alonga nyatwa zakusiyanasiyana zinathimbana na iye, ninga kutsalakana ekha banja mudalowa mamunace, kuluza basa, pontho kuthimbana na nyatwa ya kukuza ana. Ninji cinam’phedza toera kucita pisankhulo mwandzeru? Iye alonga: “Ndisanyindira ciphedzo ca Yahova kubulukira m’phembero.” Kwabena, wa ku Gana, alonga thangwi idancitisa kuphemba ciphedzo ca Mulungu: “Ndaluza basa yakumanga yakuti ikhandilipa mwadidi kakamwe.” Anganyerezera pisankhulo pyace, asalonga: “Ndzidzi onsene ndikhacita phembero kuna Yahova toera kunditsogolera kucita cisankhulo cadidi.” Iye athimiza: “Ndisaona kuti Yahova andiphedza kusankhula basa yakuti isanditawirisa kutsalakana pyakufuna pyanga pyauzimu na pyakumanungo.” Mulungu anakwanisambo kukutsogolerani mungacita phembero thangwi ya nyatwa zakuti mbizidakhuya uxamwali wanu na iye.

Tadinga basi ene pinthu pyakucepa pyakuti phembero inakwanisa kukucitirani. (Onani pitsandzo pinango m’bokosi, “Maphindu a Phembero.”) Mbwenye, toera mugumane maphindu anewa, pakutoma musafunika kudziwa Mulungu na cifuniro cace. Khala musafuna kudziwa pyenepi, tisakuwangisani toera kuphemba Mboni za Yahova toera kukuphedzani kupfundza Bhibhlya.a Ineyi ndi thanyo yakutoma toera kufendedzera cifupi ‘Nyakubvesera maphembero.’​—Masalmo 65:2.

[Cidzindikiro capantsi]

[Ntsonga ikulu pa tsamba 7]

“Siyira [Yahova] pinadzudzumika na iwe, thangwi ndiyene anakuonera.”​—Masalmo 55:22

[Bokosi pa tsamba 7]

Maphindu a Phembero

Ntendere wa m’manyerezero ‘Lekani kutsamali nee na cinthu cibodzi tayu, mbwenye pakulonga maphembero, pakudembetera, pakucitambo takhuta mudziwise Mulungu pinthu pyanu pyonsene. Ntendere wa Mulungu wakupiringana ndzeru zonsene unadzakoya mitima yanu na ndzeru zanu mwa Kristu Yezu.’​—Afilipi 4:6, 7.

Kubalangazwa na Mulungu “Asimbwe Mulungu, Baba wa Mbuyathu Yezu Kristu thangwi ndiye Baba anabvera ntsisi anthu, ndiye anabalangaza anthu onsene, ndiyembo anatibalangaza ife mu nyatwa zathu zonsene.”​—2 Akorinto 1:3, 4.

Citsogolero toera kucita pisankhulo mwandzeru ‘Munthu angasowa ndzeru aziphembe Mulungu, anadzazitambira, thangwi Mulungu asapasa onsene mwakudzala manja.’​—Tyago 1:5.

Ciphedzo toera kucalira mayesero “Citani maphembero toera mukhonde kugwa m’mayesero.”​—Luka 22:40, NM.

Kulekererwa madawo ‘Mbumba yanga inacemerwa na dzina yanga ingacepeseka, mbicita phembero na kusaka-saka nkhope yanga, pontho mbisiya njira zawo zakuipa, ine ndinadzabva bulukira kudzulu mbandilekerera madawo awo.’​—2 Pya dziko ya Israele 7:14, NM.

Njira toera kuphedza anango ‘Maphembero a munthu wakulungama ali na mphambvu kakamwe.’​—Tyago 5:16.

Ciwangiso maphembero angatawirwa ‘Yahova atawira Salomoni mbati: Ndabva maphembero na madembetero adandicita iwe.’​—1 Amambo 9:3.