Kodi Musaipirwa na Mulungu?
“THANGWI yanji pyandicitikira? Thangwi yanji Mulungu atawirisa pyenepi kundicitikira?” Ineyi ndi mibvundzo idadzudzumisa Sidnei wa pyaka 24 ku Brazil. Pakugwerwa na cidengwa, iye adzakhala wakulamala mbafamba pa njinga ya anyakulamala.
Kuthabuka thangwi ya cidengwa, mautenda, kuferwa na nyakufunika, cidengwa cacibaliro peno nkhondo pisacitisa anthu kuipirwa na Mulungu. Pyenepi nee mphyacilendo. Mamuna wa ndzidzi wakale Yobe agwerwa na nyatwa zakusiyanasiyana. Mwakudodomeka iye apambizira Mulungu mukulonga kuti: ‘Ndingakucemerani, imwe nee musanditawira; ndingakudembeterani, imwe nee musanditsalakana. Mwacinja mbamukhala nsumankha kwa ine, mbamundimenya na mphambvu yonsene ya manja anu.’—Yobe 30:20, 21, NM.
Yobe nee akhadziwa kudabuluka nyatwa peno thangwi yanji akhathabuka peno thangwi yanji zancitikira. Mwakutsandzayisa, Bhibhlya isatipangiza thangwi yanji nyatwa zisatigwera pontho tinathimbana nazo tani.
KODI MULUNGU ASAFUNA KUTI ANTHU ATHABUKE?
Kulonga pya Mulungu, Bhibhlya isatipanga: ‘Basa yace ndi yaungwiro, njira zace zonsene ndi zakulungama. Mulungu wakukhulupirika, wakuti nkhabe cita cakukhonda kulungama; iye ndi wakulungama na wadidi.’ (Deuteronomyo 32:4) Pyenepi pisapangiziratu pakweca kuti Mulungu ‘wakulungama na wadidi,’ nee mbadafuna kuti anthu athabuke peno kuphatisira pidengwa toera kuatcunyusa.
Mwakuthimizira, Bhibhlya isatipanga: ‘Nee munthu m’bodzi alonge pa kupendiwa kuti: Anandipenda ndi Mulungu; thangwi Mulungu anacimwana kupenda toera acite pyakuipa, iyembo hanapenda nee munthu m’bodzi tayu.’ (Tyago 1:13) Inde, ife tisapfundza m’Bhibhlya kuti Mulungu akhadapasa anthu matomero adidi kakamwe. Iye akhadapasa anthu akutoma, Adhamu na Eva, mbuto yakubalika kakamwe, pyakufuna pyonsene pya umaso na basa yakuphindulisa toera kuicita. Mulungu aapanga: “Balanani mbamuinjipa, dzadzani dziko ya pantsi mbamuitonga.” Mwandimomwene, Adhamu na Eva nee akhali na thangwi toera kuipirwa na Mulungu.—Genesi 1:28.
Mbwenye lero, makhaliro a umaso ndi akunentsa kakamwe. Inde, m’mbiri yonsene ya anthu, nyatwa zisathimizirika kakamwe. Lemba iyi ndi yandimomwene: ‘Pinthu pyonsene pidacitwa pikubulira thangwi ya nyatwa mpaka lero.’ (Aroma 8:22) Ninji cidacitika?
THANGWI YANJI TISATHABUKA?
Toera kubvesesa thangwi yanji tisathabuka, tisafunika kubwerera nduli mu ndzidzi udatoma nyatwa. Mukukulumizwa na anju wakupanduka wakuti patsogolo pace adzacemerwa Sathani Dyabo, Adhamu na Eva akhonda midida ya Mulungu ya cadidi na cakuipa ikhadaperekwa kwa iwo mukuphatisira ntemo wakukhonda kudya ‘muti wakudziwa pyadidi na pyakuipa.’ Dyabo alonga kuna Eva kuti iwo nee mbadafa angakhonda bvera Mulungu, kupambizira Mulungu kuti ndi nyauthambi. Sathani apambizira pontho kuti Mulungu asakhondesa anthu ufulu wakudziwa pyadidi na pyakuipa. (Genesi 2:17; 3:1-6) Sathani apangiza kuti anthu mbadakhala na umaso wadidi kakamwe angakhonda kutongwa na Mulungu. Pyenepi pyonsene pyasosa mbvundzo wakufunika kakamwe—Kodi Mulungu nee akhali wakuthema kutonga?
Dyabo alamusa nseru unango. Iye apambizira anthu kuti asatumikira Mulungu thangwi ya maphindu akumanungo. Thangwi ya nyakukhulupirika Yobe, Dyabo alonga kuna Mulungu: ‘Imwe nee mwaikha mpanda kwa iye, kwa nyumba yace na kwa pyonsene piri na iye? . . . Mbwenye, futhulani djanja yanu na kufudza pyonsene piri na iye, munaona, iye anadzakutikanani pamaso panu pene.’ (Yobe 1:10, 11) Ngakhale Sathani akhalonga thangwi ya Yobe, mafala ace asapangiza kuti anthu onsene asatumikira Mulungu thangwi ya maphindu akumanungo.
KODI MULUNGU ATONGA TANI MISERU INEYI?
Mbadacitanji toera kumalisa miseru ineyi mikulu kabodzi basi? Mulungu wakuti ali na udziwisi onsene, akhali na njira yadidi toera kumalisa miseru ineyi mwakukhonda kutitsukwalisa. (Aroma 11:33) Iye atawirisa anthu kutongana okha okha kwa ndzidzi ungasi toera kupangiza kuti ndi upi utongi ukulu kakamwe.
Kuinjipa kwa nyatwa pa dziko yapantsi lero, kusapangiza kuti utongi wa anthu wacimwana. Mautongi a dziko nee acimwana basi ene kubweresa ntendere, citsidzikizo na citsandzayo mbwenye acitisambo dziko kufudzika. Pyenepi pisathimizira undimomwene wakufunika kakamwe unalongwa m’Bhibhlya: ‘Nee munthu m’bodzi asadziwa pya patsogolo pace nee kupitonga.’ (Yeremiya 10:23) Basi ene utongi wa Mulungu ndiwo unakwanisa kubweresa ntendere, citsandzayo na uthambaruki wa anthu kwenda na kwenda thangwi ceneci ndi cifuniro ca Mulungu.—Izaiya 45:18.
Kodi Mulungu anakwanirisa tani cifuniro cace kwa anthu? Kumbukani kuti Yezu apfundzisa atowereri ace kuphembera tenepa: ‘Umambo wanu mbudze kuna ife. Pinafuna imwe mbapicitwe pantsi pano ninga kudzulu.’ (Mateo 6:10) Inde, pa ndzidzi wakuthema Mulungu anadzafudza mathangwi onsene anacitisa nyatwa mukuphatisira Umambo wace. (Danyele 2:44) Utcerengi, mautenda na kufa pinadzamala. Thangwi ya nyakutcerenga, Bhibhlya isalonga kuti Mulungu “anadzapulumusa ntcerengi anaphemba ciphedzo.” (Masalmo 72:12-14, NM) Kuna anyakuduwala, Bhibhlya isapikira: ‘Nee m’bodzi anadzalonga: Ndiri kuduwala.’ (Izaiya 33:24) Thangwi ya anyakufa ali m’manyerezero a Mulungu, Yezu alonga: ‘Unadzafika ndzidzi wakuti anthu onsene anagona mu nthumbi anadzabva mafala ace. Penepo iwo anadzalamuka.’ (Jwau 5:28, 29) Anewa ndi mapikiro akukhuya ntima kakamwe!
KUMALISA MABVERO AKUIPIRWA NA MULUNGU
Pakupita pyaka 17 bulukira ntsiku idagwerwa iye na cidengwa, Sidnei adalongwa pakutoma kwa nsolo uno, alonga: “Cipo ndapasa mulando Yahova Mulungu thangwi ya cidengwa, mbwenye ndisatawira kuti pakutoma ndikhaipirwa na Mulungu. Ntsiku zinango ndisatsukwala na kulira ndinganyerezera makhaliro anga. Mbwenye kubulukira m’Bhibhlya ndakwanisa kubvesesa kuti cidengwa cidandigwera nee kukhali kutcinyuswa na Mulungu. Ninga pinalonga Bhibhlya, ‘ndzidzi na pinthu pyakukhonda kudikhirwa pisagwera tonsene.’ Kuphembera kuna Yahova na kuleri malemba akubverana na makhaliro anga pisandiwangisa mwauzimu na kundiphedza toera kukhala na maonero akulinganira.”—Koelete 9:11; Masalmo 145:18; 2 Akorinto 4:8, 9, 16.
Kudziwa mathangwi anacitisa Mulungu kulekerera nyatwa, pontho kuti mwakukhonda dembuka zinadzamaliswa kusatiphedza toera kumalisa mabvero onsene ali na ife akuipirwa na Mulungu. Ife tisanyindira kuti Mulungu “ndiye anabwezera pyadidi ale ananfuna.” Munthu onsene anakhulupira iye na Mwanace cipo anadzaphatiswa mwala.—Ahebere 11:6; Aroma 10:11.