MBIRI YA UMASO

Tagumana Basa Yadidi Kakamwe

Yalongwa Na David Na Gwen Cartwright

INE NA Gwen pikhali ife na pyaka pixanu pyakubalwa, tatoma kupfundza kubvina. Ife nee tikhadziwana. Mbwenye pikhakula ife tasankhula basa yakubvina mu umaso wathu. Pikhathambaruka ife kakamwe m’basa yathu, ife taisiya. Thangwi yanji tacita cisankhulo ceneci?

David: Ndabalwa mu caka 1945 ku Shropshire mu dziko ya Inglatera. Babanga akhali na munda mu cisa cadidi kakamwe cakuti cikhagumanika kutali na nzinda. Pikhakotoka ine kuxikola, ndikhaenda kadyesa nkhuku na kugumanya mazai kuphatanizambo kutsalakana ng’ombe na mabira. Mu ndzidzi wa maferya, ndikhaphedza basa yakubvuna, midzidzi inango ndikhatekenya matratori athu.

Mbwenye cifuno cinango cikhatoma kukula mu umaso wanga. Babanga akhadaona kuti kutomera mu uwana wanga ndzidzi onsene ukhabva ine nyimbo ndikhabvina. Natenepa, pikhali ine na pyaka pixanu pyakubalwa, iye aphemba mai wanga toera kundiyendesa kuxikola ya pacisa inapfundzisa kubvina toera ndipfundze kubvina. Mpfundzisi wanga aona kuti ndikhali na luso kakamwe yakubvina balé, iye andipfundzisa ntundu unoyu wakubvina. Pikhali ine na pyaka 15 pyakubalwa, ndawina phaso toera kuenda kapfundza kuxikola yapadzulu kakamwe ya Royal Ballet School ku Londoni. Kweneku ndadziwana na Gwen, ife tasankhulwa toera kubvina pabodzi.

Gwen: Ndabalwa mu caka 1944 mu nzinda wakuthambaruka wa Londoni. Pikhali ine mwana, ndikhakhulupira kakamwe Mulungu. Ndikhaleri Bhibhlya yanga mbwenye ikhanentsa kuibvesesa. Pikhali ine na pyaka pixanu pyakubalwa, ndikhaenda kapfundza kubvina. Mudapita pyaka pitanthatu ndawina mapika adacitwa na anthu azinji a ku Britanya, akuti akhapasa mwai nyakuwina toera kuenda kapfundza kuxikola ya Royal Ballet School yakuti ikhapfundzisa anang’ono kubvina. Xikola ineyi ikhagumanika ku White Lodge, nyumba ikulu na yakubalika kakamwe mu cisa ca Geórgia ku Richmond Park kutali pang’ono na nzinda wa Londoni. Kweneku apfundzisi apadzulu kakamwe andipfundzisa pya xikola kuphatanizambo kubvina balé. Pikhali ine na pyaka 16, ndatoma kupfundza xikola ya akulu ku Royal Ballet School pakati pa dziko ya Londoni, ndi kweneku kudadziwana ine na David. Mu nthanda zingasi, tatoma kubvina pabodzi balé m’matsendzo mu Royal Opera House ku Covent Garden, Londoni.

David: Inde, ninga pidalonga Gwen, basa yathu yakubvina yaticitisa kuenda kabvina kunyumba yakubvekera ya Royal Opera House na ku Maphwando a Balé ku Londoni (cincino isacemerwa English National Ballet). M’bodzi wa apfundzisi a Balé akhazikisa kampanya ya dziko yonsene yakuti mbidacitwa ku Wuppertal mu Alemanya, iye atisankhula toera uwiri wathu tikhale anyakubvina nyimbo za ntundu wa solo. M’basa yathu, ife tabvina m’mathando a matsendzo m’mbuto zizinji pa dziko, mbatisangizira anyakubvekera ninga Dame Margot Fonteyn na Rudolf Nureyev. Ntundu unoyu wa umaso wa mapika usacitisa munthu kunyerezera kakamwe pinafuna iwe basi, natenepa tikhatsalakana pya basa yathu basi.

Gwen: Manyerezero anga na manungo anga akhadaperekeka toera kucita basa yakubvina. Ine na David tikhali na manyerezero akufuna kubvekera kakamwe. Ndikhakomerwa na kukorondza, kutambira maluwa, na kumenyerwa manja na anthu pa tsendzo. M’basa yakubvina ndikhali pakati pa anthu a makhaliro akuipa ninga ulukwali, kufumali na kumwa; ninga anyamapika anango, ndikhanyindira kakamwe pithumwa pyanga pyakupasa ncena.

UMASO WATHU WACINJA KAKAMWE

David: Pidamala ine pyaka pizinji m’basa yakubvina, ndadzaneta kakamwe na kucita maulendo ndzidzi onsene. Nakuti ndakula na kucita basa yakulima, ndatoma kutsuwa umaso wakusowa pizinji ukhali na ife kucisa cathu. Natenepa, mu caka 1967, ndasiya basa yanga yakubvina mbaditoma kuphata basa kumunda ukulu cifupi na nyumba ya anyakubala anga. Basa yakulima yandicitisa kulugari nyumba ing’ono. Buluka penepo ndamenyera ntokodzi Gwen wakuti akhapitiriza na basa yakubvina, mbandimphemba toera kumanga naye banja. Iye akhadathambaruka kakamwe m’basa yakubvina nyimbo za solo, pontho basa yace ikhafamba mwadidi, natenepa, pyan’nentsa kucita cisankhulo. Ngakhale tenepo, iye atawira phembo yanga mbatikhala pabodzi mu umaso wakuti nee akhaudziwa mwadidi.

Gwen: Inde, ndanentseka toera kudzolowera umaso wa nyakulima. Kukamula nkaka wa ng’ombe na kudyesa nkhumba na nkhuku pantsi pa makhaliro onsene, pikhali pyakusiyana kakamwe na ntundu wa umaso ukhadziwa ine. David atoma mapfundziro akulima a nthanda zipfemba ku xikola toera kudziwa njira zipswa za basa yakulima, natenepa ndikhasala ndekha panyumba mpaka kubwerera kwace pa ndzidzi upfemba wa kumasiku. Pa ndzidzi unoyu, Gilly mwanathu wakutoma wankazi akhadabalwa. David andiphemba toera kupfundza kutekenya motokala, ine ndacita pyenepi. Ntsiku inango, pidaenda ine kaona nzinda wacifupi, ndaonana na Gael. Ndadziwana naye pa ndzidzi ukhaphata iye basa mu loja ibodzi pacisa cathu.

Mwakukoma ntima, Gael andiphemba toera kuenda kamwa xaya kunyumba kwace. Taona mafoto awo akumanga banja, foto yace inango ikhapangiza nsoka ukhali kunja kwa mbuto inango inacemerwa Nyumba ya Umambo. Ndabvundzisa kuti ndi gereja yanji ineyi. Pidandipanga iye kuti iye na mamunace akhali Mboni za Yahova, ndakomerwa kakamwe. Ndakumbuka kuti m’bodzi wa abale acikazi a pai wanga akhali Mboni. Ndakumbukambo kuti pai wanga akhanentseka mbaipirwa kakamwe na iye, akhaponya mabukhu ace kukhuku. Nee ndikhadziwa kuti thangwi yanji baba akhacita pyenepi, thangwi baba akhali munthu wadidi, mbwenye akhaipirwa kakamwe na iye.

Pakumalisa ndakhala na mwai wakudziwa kuti pikhulupiro pya mwanankazi wa pai wanga pikhali pyakusiyana kakamwe na pipfundziso pya magereja anango. Gael andipangiza kuti mwandimomwene Bhibhlya isapfundzisanji. Ndadzumatirwa pidaona ine kuti pipfundziso pizinji, ninga pya Utatu na kukhonda kufa kwa umaso, nee pisabverana na Malemba. (Koel. 9:5, 10; Jwau 14:28; 17:3) Pontho, ukhali ulendo wakutoma kwa ine kuona dzina ya Mulungu m’Bhibhlya, Yahova.​—Eks. 6:3.

David: Gwen andipanga pikhapfundza iye. Ndisakumbuka kuti pikhali ine mwana, baba akhandipanga kuti ndisafunika kuleri Bhibhlya. Natenepa, ine na Gwen tatawira kupfundza Bhibhlya na Gael pabodzi na mamunace anacemerwa Derrick. Mudapita nthanda zitanthatu, taenda kakhala ku nzinda wa Oswestry, mu dziko ibodzi ene ya Shropshire thangwi tikhadatambira mwai wakukhala na munda wathu ene ung’ono’ wakutsalakana pifuyo. Kweneku, Deirdre wakuti akhali Mboni ya Yahova, mwakupirira apitiriza kutipfundzisa Bhibhlya. Pakutoma, nee tikhathambaruka mwakucimbiza. Basa yakutsalakana pinyama ikhaticitisa kukhala anthu akuphatika kakamwe. Mbwenye mwapang’ono pang’ono, undimomwene watoma kukhuya ntima wathu.

Gwen: Mpingizo ukulu kakamwe ukhafunika ine kukunda ndi kukhulupira malodza. Lemba ya Izaiya 65:11 yandiphedza toera kuona kuti Yahova asaona tani ale anakhulupira pya ‘mulungu wapezi Wakupasa Ncena.’ Pyakwata ndzidzi uzinji na kucita phembero toera kusiya pinthu pyonsene pyakupasa ncena pikhali na ine na pithumwa pyanga. Kudziwa kuti ‘munthu onsene wakudzikuza anadzacepeswa, mbwenye munthu onsene anacepeseka anadzakuzwa’ pyandiphedza kudziwa makhaliro anakomerwa na Yahova. (Mat. 23:12) Ndikhafuna kutumikira Mulungu wakuti asatitsalakana kakamwe mpaka kupereka Mwanace ninga ntsembe ya ciomboli. Pa ndzidzi unoyu, mwanathu unango wa nkazi akhadabalwa, pontho pikhali pyakutsandzayisa kakamwe kudziwa kuti ninga banja mbatidakwanisa kukhala maso kwenda na kwenda mu paradizu pa dziko yapantsi.

David: Pidabvesesa ine mwakukwana kukwanirisika kwakudzumisa kwa maprofesiya a Bhibhlya, ninga anagumanika pa Mateo kapitulu 24 na a m’bukhu ya Danyele, ndakhala na cinyindiro cakukwana kuti unoyu ukhali undimomwene. Ndadzindikira kuti mu dziko ino ya makhaliro akuipa, nkhabebve cadidi kakamwe kusiyapo kukhala na uxamwali wadidi na Yahova. Natenepa, mukupita kwa ndzidzi, ndatoma kusiya kukhala munthu wakufuna pizinji. Ndabvesesa kuti nkazanga na ananga akhali akufunika kakamwe ninga ine. Lemba ya Afilipi 2:4 yandiphedza toera kubvesesa kuti nee ndisafunika kutsalakana uunthu wanga na pifuniro pyanga pyakukhala na munda ukulu kakamwe. Mbuto mwace, ndikhafunika kuikha basa yakutumikira Yahova pa mbuto yakutoma mu umaso wanga. Ndasiya kufumali. Mbwenye kusasanyira umaso wathu toera kugumanika pa misonkhano n’Sabudu yakuti tikhafunika kufamba nsindzo wa makilometru 10, pikhali pyakunentsa, thangwi mu ndzidzi unoyu tikhafunika kukamula nkaka wa ng’ombe. Mbwenye na ciphedzo ca Gwen, ife cipo taluza nsonkhano, pontho cipo tasiya anathu pikhaenda ife kamwaza mphangwa n’Dimingu namacibese pakumala kukamula nkaka wa ng’ombe.

Anyakubala athu nee akhakomerwa na kucinja kwathu. Baba wa Gwen amala pyaka pitanthatu nee kulonga na iye. Anyakubala anga ayeserambo kutipingiza toera tikhonde kusonkhana na Mboni za Yahova.

Gwen: Yahova atiphedza toera kupirira pinentso pyenepi. Mukupita kwa ndzidzi, abale na alongo a Mpingo wa Oswestry adzakhala ninga acibale apswa kwa ife, mwaufuni iwo atiphedza mu nyatwa zathu zonsene. (Luka 18:29, 30) Taperekeka kwa Yahova mbatibatizwa mu caka 1972. Ndikhafuna kuphata basa mwakuwanga toera kuphedza anthu azinji toera kudziwa undimomwene, natenepa ndatoma kutumikira ninga mpainiya.

BASA IPSWA YAKUPHINDULISA

David: Pyaka pidaphata ife basa toera kutsalakana pifuyo pyathu na munda wathu pikhali pyakunetesa kakamwe; ngakhale tenepo, ife tacita pyonsene toera kupangiza citsandzo cadidi cauzimu kwa anathu. Mukupita kwa ndzidzi, na thangwi ya kugwa kwa mpfuma, ife tasiya basa yathu yakulima na ya kufuya pinyama. Nee tikhali na basa nee nyumba yakukhala, pontho mwanathu wankazi wacitatu akhali na caka cibodzi basi, tacita phembero kuna Yahova toera kuphemba ciphedzo na citsogolero cace. Tatonga kuphatisira maluso athu, mbatifungula mbuto yakupfundzisa kubvina toera kutsalakana banja yathu. Cisankhulo cathu cakuikha pinthu pyauzimu pa mbuto yakutoma cabala misapo yadidi. Mwakutsandzayisa, anathu atatu ene acikazi atoma kutumikira ninga apainiya pidamalisa iwo mapfundziro akuxikola. Gwen akhatumikirambo ninga mpainiya, natenepa, iye akhakwanisa kuphedza anathu ntsiku zonsene.

Pidasembwa anathu awiri akutoma Gilly na Denise, tasiya basa yakupfundzisa kubvina. Talembera ofesi ya filiali toera kudziwa mbuto zakuti mbatidakwanisa kuphedza. Iwo atipangiza mizinda ya kubangwe kwa dziko ya Inglatera. Nakuti tikhali na mwana m’bodzi basi panyumba, Debbie, ndatomambo kutumikira ninga mpainiya. Mudapita pyaka pixanu, taphembwa toera kuphedzera mipingo inango ya kunkwiriro. Pidasembwa Debbie, takhala na mwai wakutumikira m’basa yakumanga pa dziko yonsene mu pyaka khumi ku Zimbabwe, Moldavia, Hungria, na Costa do Marfim. Buluka penepo, tabwerera ku Inglatera toera kuphedza basa yakumanga Beteli ya ku Londoni. Thangwi ya maluso anga akulima na akutsalakana pinyama, ndaphembwa toera kutsalakana munda na pifuyo pya Beteli mu ndzidzi unoyu. Cincino tisatumikira ninga apainiya ku khundu ya kumadokero a dzuwa kunkwiriro kwa Inglatera.

Gwen: Kuperekeka kwathu kwakutoma​—toera kubvina balé—​kukhali kwakutsandzayisa mbwenye kukhali ninga madzi akupita. Kuperekeka kwathu kwaciwiri na kwakufunika kakamwe​—toera kutumikira Yahova—​kwatibweresera kutsandzaya kukulu kakamwe, pontho ndi kwakukhonda mala. Tisapitiriza kucita pinthu pabodzi, mbwenye pa ndzidzi uno tisaphatisira miyendo yathu toera kutumikira pabodzi ninga apainiya. Kuphedza anthu azinji toera kupfundza undimomwene wakufunika kakamwe wakupulumusa umaso pisatibweresera kutsandzaya kukulu kakamwe. Anthu anewa akuti ndi ninga ‘matsamba anatisimbisa’ ndi akufunika kakamwe kupiringana kukhala wakubvekera kudziko. (2 Akor. 3:1, 2) Mbatidakhonda kudziwa undimomwene, mbatidakumbuka pyakale basi, mafoto akale, na maprogramu a basa yathu yakubvina ikhacita ife kale.

David: Kutumikira Yahova m’basa ya ndzidzi onsene, kwacinja kakamwe umaso wathu. Ndisadziwa kuti pyenepi pyandiphedza toera kukhala mamuna na baba wadidi. Bhibhlya isalonga pya Miriya, Mambo Dhavidhi na anango akuti abvina toera kupangiza kukomerwa kwawo. Ife pabodzi na anango, tisadikhira kubvina mwakukomerwa mu dziko ipswa ya Yahova.—Eks. 15:20; 2 Sam. 6:14.