MBIRI YA UMASO

Maso a Jayro Njira Inaphatisira Iye Toera Kutumikira Mulungu

Yakulongwa na ng’ono wace Samuel Ruiz-león Arroyo

M’bale wanga Jayro nee asakwanisa kucita cinthu kusiyapo kuphatisira maso ace. Mbwenye, iye ali na umaso wakutsandzayisa. Mbandidzati longa pizinji, dikhirani ndikufokotozereni mbiri yace kuti thangwi yanji umaso wace ndi wakuphindulisa.

Jayro abalwa na paralisia cerebral ntundu unango wa utenda wa ongo unacemerwa espasmódica quadriplegiaa wakuti usacitisa piwalo pizinji pya manungo ace pikhonde phata basa. Natenepa, iye nee asakwanisa kucita cinthu ekha. Ongo wace nee usakwanisa kuphata basa mwakubverana na manungo ace, natenepa miyendo na mikono yace nee iri na mphambvu. Midzidzi inango, mwakukhonda dikhira Jayro asagwa ekha mbaphekeka. Anthu anakhala na iye cifupi angakhonda cita mpholemphole asaphekekambo. Mwakutsukwalisa, kazinji kene miyendo na mikono yace isamangirirwa pa njinga yace ya nyakulamala toera akhonde kuphekeka.

KUBVA KUPHA KUTOMERA UWANA MPAKA KUKULA

Jayro akula mwakunentseka kakamwe. Mukhali iye na nthanda zitatu zakubalwa, atoma kugwa njirinjiri kwakuti kukhancitisa kukomoka. Kazinji kene, Mama akhankwata mwakucimbiza mbaenda naye kunyumba yaungumi, mbakanyerezera kuti alowa.

Mukupita kwa ndzidzi, thangwi ya utenda unoyu wakunentsa, magogodo a Jayro nee adzakhala mwadidi. Mukhali iye na pyaka 16, kholokolo yace ikhadabuluka pa mbuto mbicitwa operasau yakunentsa kakamwe pabodzi na ntcafu na cuno cace. Ndiciri kukumbuka kubulira kwa Jayro namasiku onsene mu ndzidzi ukhakondzwa iye.

Kukhonda phata basa kwa piwalo pizinji pya Jayro pisancitisa kunyindira anango toera kutsalakana pifuno pyace pya ntsiku zonsene ninga kudya, kubvala na kuenda kagona pa talimba. Mama na Baba ndiwo asacita pyenepi. Maseze Jayro asafunika ciphedzo ntsiku zonsene, anyakubala athu kazinji kene asampanga kuti umaso wace nee usanyindira basi anthu mbwenyembo Mulungu.

NJIRA YAFUNGUKA TOERA KULONGA

Anyakubala athu ndi Mboni za Yahova na akhaleri mbiri za Bhibhlya kuna Jayro kutomera uwanace. Ndzidzi onsene iwo akhadziwa kuti umaso usakhala wakuphindulisa kakamwe munthu angakhala na uxamwali na Mulungu. Jayro nee akhacita cinthu thangwi manungo ace nee akhaphata basa, mbwenye mbadakhala na cidikhiro cakudzumatirisa na cakuwanga ca ntsogolo. Natenepa, anyakubala athu akhafuna kudziwa kakamwe khala Jayro mbadakhala na cidziwiso ca Bhibhlya.

Ntsiku inango, Jayro mbali mwana, Baba ambvundza, “Jayro unakwanisa kulonga na ine?” Buluka penepo baba athimiza, “Khala iwe usandifunadi unacita!” Mudamphemba Baba toera alonge fala ibodzi basi, Jayro abulusa misozi m’maso mwace. Maseze akhayesera kuphatisira mafala toera kulonga mabvero ace, mbwenye mafala nee akhabveka. Baba atsukwala thangwi yakucitisa Jayro kulira. Mbwenye kulira kwa Jayro kwapangiza kuti akhadabva pidalonga Baba. Nkandzo ndi wakuti nee mbadakwanisa kulonga.

Mukupita kwa ndzidzi, anyakubala athu akhaona m’midzidzi inango Jayro mbakazungunusa maso ace mwakucimbiza mukupangiza pikhafuna iye. Pikhali pyakutsukwalisa kwa Jayro kudziwa kuti nee mbadakwanisa kutsalakanika ekhene. Mbwenye mudapfundza anyakubala athu pidzindikiro pya kulonga kwace mukuphatisira maso na kumpasa pikhafuna iye, nkhope ya Jayro ikhali yakutsandzaya kakamwe. Ineyi ikhali njira yace yakupereka takhuta.

Dotoro anakondza anthu akukhonda kulonga mwadidi alonga kuti toera kucedza naye mwadidi tisafunika kuthukula mikono yathu mukucita mbvundzo wakuti ntawiro wace ndi inde peno nkhabe. Nkono wamadyo ndi inde na nkono wadzwere ndi nkhabe. Natenepa, iye mbadakwanisa kulonga pifuno pyace mukuyang’ana nkono unafuna iye.

CAKUCITIKA CAKUFUNIKA MU UMASO WA JAYRO

Mboni za Yahova zisacita misonkhano ya cisa miwiri na wa gawo ubodzi pa caka, pa misonkhano ineyi pasacitwa nkhani zakubuluswa m’Bhibhlya kwa anyakubvesera azinji. Kazinji kene Jayro akhakomerwa kakamwe na nkhani ikhacitirwa anyakufuna kubatizwa. Ntsiku inango, mukhali iye na pyaka 16, Baba ambvundza, “Jayro usafuna kubatizwa?” Kuyang’ana kwace mwakukhonda dembuka nkono wamadyo wa Baba, kwapangiza kuti akhafuna. Buluka penepo Baba athimiza, “Kodi wapikira kwa Mulungu mu phembero toera kuntumikira kwenda na kwenda?” Ayang’ana pontho nkono wamadyo wa Baba. Natenepa, pyaoneka pakweca kuti Jayro akhadapereka toera kutumikira Yahova.

Pakumala kudinga pipfundziso pyakufunika pya Bhibhlya, pyakhala pontho pakweca kuti Jayro abvesesa mabvekero a ubatizo Wacikristu. Natenepa, mu 2004, iye atawira mbvundzo wakufunika kakamwe wakuti cipo aucitwa kale, “Kodi mwaperekeka kwa Yahova toera kucita cifuniro cace?” Jayro atawira mbvundzo unoyu mukukwiza maso ace ndzulu. Ineyi ikhali njira idasankhula iye toera kutawira inde. Natenepa, mukhali iye na pyaka 17 abatizwa ninga m’bodzi wa Mboni za Yahova.

MASO AKUCITA PINTHU PYA MULUNGU

Mu 2011, Jayro aona njira ipswa yakulonga nayo—ntcini wandzeru wakubverana na diso yace. Ntcini wandzeru unoyu usabverana na kuzungunuka kwa diso yace toera itome kuphata basa na pidzindikiro pinagumanika mu ntcini wandzeru. Kuyang’ana cidzindikiro mu ntcini wandzeru kusakhala ninga kuphata mouse wa ntcini wandzeru. Mu ntcini wandzeru muli na pidzindikiro pya mafala pidacitwa toera kuphedza Jayro kulonga na anthu. Angayang’ana pa cidzindikiro cibodzi, khundu ibodzi ya programu ya ntcini wandzeru ya software isacinja mafala akulembwa mbabveka kuna anthu.

Mukhathimizirika cidziwiso cace ca Bhibhlya, Jayro akhala na cifuno cikulu cakuphedza anango mwauzimu. Nkati mwa pfundziro yathu ya Bhibhlya ya pabanja, kazinji kene iye akhayang’ana ine na ntcini wace wandzeru. Ineyi ikhali njira yakundipanga toera ndilembe matawiro anafuna kapereka iye m’makhundu a mibvundzo na matawiro ku misonkhano yathu ya mpingo Wacikristu.

Pa misonkhano, iye akhayang’ana mwacidikhodikho pa cidzindikiro mu ntcini wandzeru, buluka penepo falace ikhabveka kwa onsene. Kumwetulira kwace kazinji kene kusawangisa tonsene m’mpingo. Alex, xamwali wa Jayro, alonga, “Pisandidzumatirisa kakamwe ndingabva Jayro mbatawira ntsonga ya Bhibhlya.”

Pontho, Jayro asaphatisirambo maso ace toera kupanga anango pikhulupiro pyace. Iye asacita pyenepi mu kuyang’ana pa cidzindikiro cakuti ciri na pithundzithundzi pya munda wakubalika wakuti pinyama na anthu akukhala pabodzi mwantendere. Angaya’ana pa pidzindikiro pyenepi, ntcini wace wandzeru usabveka mafala akuti, “Bhibhlya isalonga kuti dziko yapantsi inadzakhala paradizu, dziko yakuti anthu nee anadzaduwala nee kufa, Apokalipse 21:4.” Anyakubvesera angapangiza cifuno, iye asayang’ana cidzindikiro cinango mu ntcini wace mbabveka mafala akuti, “Kodi musafuna kupfundza Bhibhlya na ine?” Mwakudzumatirisa, yavu wathu atawira kupfundza Bhibhlya. Mphyakutsandzayisa kuona Jayro, mbakaphedzwa mwapang’ono-pang’no na Mboni inango kupfundzisa Yavu wathu Bhibhlya! Mwakutsandzayisa, Yavu abatizwa pa nsonkhano wa gawo udacitwa mu nzinda wa Madri mu nthanda ya Malimwe ya 2014.

Kukhulupirika kwa Jayro kwa Mulungu kusadziwika na apfundzisi a kuxikola yace. Rosária, m’bodzi wa adotoro ace anakondza anthu akukhonda kulonga mwadidi, alonga: “Mbidafuna kukhala nyakuphembera, mbidakhala m’bodzi wa Mboni za Yahova. Ndaona kuti cikhulupiro ca Jayro campasa tani cidikhiro candimomwene ca umaso, mwakukhonda tsalakana nyatwa zace.”

Ndzidzi onsene maso a Jayro asayetimira ndingaleri kwa iye pikiro ya m’Bhibhlya: ‘Anyanfutete anadzafamba mbanumpha ninga mbawala, alembo anacimwana kulonga anadzakhuwa na kusekera.’ (Izaiya 35:6) Ngakhale kuti midzidzi inango asatsukwala, kazinji kene asakhala wakutsandzaya. Pyenepi pisakwanisika basi ene thangwi ya uxamwali wace na Mulungu pabodzi na axamwali ace Acikristu. Kuwangisira kwace na cikhulupiro cace cakuwanga pisapangiza kuti kutumikira Yahova kusacitisa kuti umaso wakunentsa ukhale wakuphindulisa.

[Cidzindikiro capantsi]

[Bokosi pa tsamba 10]

Pidalonga Andzace a Jayro

Rosa, wa pyaka 63, alonga: “Jayro ali wakutsandzaya. Pontho, kuwangisira kwace kutumikira Yahova kusakhuya anango.”

Antonio, wa pyaka 32, alonga: “Ndzidzi onsene ndisadzumatirwa ndingaona Jayro mbakalonga pya cikhulupiro cace.”

Andrés, wa pyaka 67, alonga: “Pisaoneka ninga Jayro asabvesesa mwadidi pipfundziso pinango pya Bhibhlya piringana ine.”