MBIRI YA UMASO

Yahova Asandipasa Pizinji Kupiringana Pikhadikhira Ine

Yakulongwa na Félix Alarcón

Mukhali ine na pyaka 17 pyakubalwa, ndikhali na pyakunyerezera, pontho pifuno ninga pya aphale azinji. Ndikhafuna kakamwe kucedza na axamwali anga, kusambirira na kugwa bhola. Mbwenye ntsiku inango namaulo umaso wanga wacinja mwandzidzidzi. Ndagwa na mota, natenepa manungo anga kubulukira n’khosi mpaka kumiyendo nee akuphatabve basa. Pyenepi pyacitika pyaka 30 nduli, tenepa ndiri pa kama mu ndzidzi uzinji.

Ndakula mu nzinda wa Alicante, kumabulukiro dzuwa a Espanya. Banja yathu nee ikhabverana mwadidi, natenepa ndzidzi uzinji wa uphale wanga ndikhakhala m’miseu. Cifupi na nyumba yathu pakhali na mbuto yakusasanya maroda. Penepo ndaphatana uxamwali na José María, m’bodzi wa anyabasa. Iye akhali munthu wadidi wakuti akhanditsalakana piringana anthu a m’banja yathu. M’midzidzi yakunentsa iye akhali ninga m’bale wa mimba ibodzi ene​—xamwali wandimomwene, maseze tikhali a thunga yakusiyana pyaka 20.

José María akhadatoma kupfundza Bhibhlya na Mboni za Yahova. Iye akhakomerwa kakamwe na kuleri Bhibhlya, pontho kazinji kene akhandipanga undimomwene wa Bhibhlya. Ndikhambvesera mwacilemedzo, mbwenye cipo ndapangiza cifuno mu pinthu pikhalonga iye. Mu uphale wanga ndikhacita pinthu kakamwe. Mbwenye pyenepi pikhali cifupi na kucinja.

CIDENGWA CIDACINJA UMASO WANGA

Ine nkhabe funa kulonga pizinji thangwi ya cidengwa ceneci ca mu nseu. Mbwenye pinafuna ine kulonga ndi pyakuti ndacita pinthu mwaupswiru na mwakusowa ndzeru. Pa ntsiku ibodzi basi, umaso wanga onsene wacinja kakamwe. Buluka pa uphale wamphambvu, mwandzidzidzi ndagumanika pa kama mu nyumba yaungumi. Kutawira macinjo anewa mu umaso wanga kukhali kwakunentsa kakamwe. Ndikhapitiriza kubvundzika, ‘Thangwi yanji ndisapitiriza na umaso?’

José María abwera kudzandiona mbasaka Mboni za Yahova mwakucimbiza za mpingo wa cisa ceneci toera kudzandiona ku nyumba yaungumi. Kubwera kwawo mwakukhonda phonya kwandikhuya kakamwe. Mudacita ine mbwenye pang’ono, ndatoma kupfundza Bhibhlya. Ndadziwa undimomwene wakuti thangwi yanji anthu asathabuka na kufa, pontho thangwi yanji Mulungu asalekerera pinthu pyakuipa kucitika. Ndapfundzambo pya mapikiro a Mulungu thangwi ya tsogolo, ndzidzi wakuti dziko yonsene yapantsi inadzadzala na anthu aungwiro, pontho nee m’bodzi anadzalonga: ‘Ndiri kuduwala.’ (Izaiya 33:24) Unoyu ukhali ulendo wakutoma mu umaso wanga kukhala na cidikhiro cadidi kakamwe.

Mudabuluka ine kunyumba yaungumi, ndathambaruka mwakucimbiza mu pfundziro yanga ya Bhibhlya. Mukuphatisira njinga ya anyakulamala, ndikhaenda ku misonkhano inango ya Mboni za Yahova ngakhale kucita khundu m’basa yawo yakumwaza mphangwa. Pa ntsiku 5 ya Bingu ya 1988, mukhali ine na pyaka 20 ndabatizwa m’basiya ikulu yakusambira. Yahova Mulungu andiphedza kukhala na maonero akulinganira thangwi ya umaso. Mphapo, mbandidacitanji toera kupangiza kupereka kwanga takhuta?

KUPITIRIZA MWAKUKHONDA TSALAKANA UNGUMI WANGA

Ndatonga toera ungumi wanga ukhonde kundicimwanisa kucita pyonsene pinakwanisa ine m’basa ya Yahova. Ndikhafuna kuthambaruka. (1 Timoti 4:15) Pakutoma pikhali pyakunentsa, thangwi acibale anga nee akhafuna uphemberi wanga upswa. Mbwenye, ndikhali na anyakukhulupira andzanga akuti akhali abale na alongo anga auzimu. Iwo akhacita pyonsene toera ndikhonde kuluza misonkhano na kucita basa yakumwaza mphangwa mwaphinga.

Mukupita kwa ndzidzi, pyadzaoneka kuti ndikhafunika citsalakano ca dotoro ntsiku zonsene. Kubulukira mu kusaka mwacidikhodikho mu ndzidzi uzinji, ndagumana mbuto yadidi inatsalakanwa anyakulamala mu nzinda wa Valencia, makilometru 160 kunkwiriro kwa Alicante. Mbuto ineyi yadzakhala nyumba yanga.

Maseze ndikhali pa kama, ndikhali dzololo toera kupitiriza kutumikira Yahova. Mukuphatisira kobiri inapaswa anyakulamala na inango, ndagula ntcini wandzeru mbandiuikha cifupi na kama yanga. Ndagulambo ntokodzi wa m’manja. Natenepa, ntsiku zonsene namacibese nyakutsalakana atenda asafungula ntcini wanga wandzeru na ntokodzi wanga wa m’manja. Ndisaikha ntundu unango wa alavanca pacidevu, toera kuphatisira ntcini wandzeru. Pontho ndiri na cimuti cakupambulika cakuti ndisaciluma. Cimuti ceneci cisandiphedza kulemba peno kusaka numero mu ntokodzi wanga wa m’manja.

Tekinolojiya ineyi yandiphedza tani? Cakutoma, isandiphedza kupita mu website jw.org na BIBLIYOTEKA MU INTERNETI ya Torre de Vigia. Feramentu ineyi ndi yadidi kakamwe kwa ine! Kazinji kene ndisamala midzidzi mizinji ntsiku zonsene mukupfundza na kufufudza mabukhu analonga pya Bhibhlya toera ndipitirize kudziwa Mulungu na makhaliro ace akudzumatirisa. Pontho ndingatsoperwa peno kufewa manungo, ndzidzi onsene mphangwa zinagumanika mu website zisandiwangisa mwauzimu.

Ntcini wanga wandzeru usandiphedzambo toera kubvesera na kucita khundu m’misonkhano ya mpingo. Ndisakwanisa kupereka matawiro, kucita phembero, nkhani, ngakhale kuleri revista ya Ncenjezi ndingaphembwa. Maseze nee ndisagumanika pa misonkhano ineyi, ndisapitiriza kupibva kuti ndisacita khundu ikulu ya mpingo.

Kukhala na ntokodzi wa m’manja na ntcini wandzeru kusandiphedzambo kucita khundu mwakukwana m’basa yakumwaza mphangwa. Ndimomwene kuti nee ndisakwanisa kuenda nyumba na nyumba ninga pinacita Mboni za Yahova zizinji. Mbwenye pyenepi nkhabe kundibweza n’nduli. Mukuphatisira maferamentu anewa, ndisakwanisa kupanga anango cikhulupiro canga. Mwandimomwene, ndisakomerwa kakamwe kulonga na anthu pa ntokodzi wanga wa m’manja na thangwi ineyi akulu a mpingo andiphemba toera kutsogolera makampanya akumwaza mphangwa mukuphatisira ntokodzi. Makampanya anewa aphedza kakamwe abale na alongo m’mpingo akuti nkhabe kwanisa kubuluka m’manyumba mwawo.

Mbwenye umaso wanga nee usanyindira tekinolojiya basi. Ntsiku zonsene, axamwali asabwera kudzandiona. Iwo asabwera na acibale awo pabodzi na anthu anango anadziwa iwo akuti asafuna kupfundza Bhibhlya. Kazinji kene, asandiphemba toera kutsogolera makani a Bhibhlya. M’midzidzi inango, mabanja asabwera kudzandiona na asandiphemba toera kucita khundu pa kulambira kwawo kwa banja namaulo. Ndisakomerwa kakamwe anang’ono angakhala nkhundu mwanga mbandipanga thangwi inaacitisa kufuna Yahova.

Ndisatsandzaya kutambira alendo azinji. Kazinji kene kwartu yanga isadzala na anthu anabwera kudzandiona, acifupi na akutali. Citsalakano ceneci caufuni cisadzumisa kakamwe anyakutsalakana atenda a pa mbuto ineyi. Ntsiku zonsene, ndisapereka takhuta kwa Yahova thangwi yakucita khundu ya ubale unoyu wakutsandzayisa.

NDISAPITIRIZA KUMENYA NKHONDO

Munthu onsene angandimutsa kuti ndacerwa tani, ndisatawira, “Ndiri pano, ndikupitiriza kumenya nkhondo!” Mwandimomwene, ndisadziwa kuti nee ndiri ndekha mu nyatwa ineyi. Mwakukhonda kutsalakana makhaliro athu peno mipingizo, Akristu onsene ali pa nkhondo—‘nkhondo yadidi ya cikhulupiriro.’ (1 Timoti 6:12) Ninji cinandiphedza kumenya nkhondo mu pyaka pizinji? Ndisaphembera ntsiku zonsene na kupereka takhuta kwa Yahova thangwi yakudziwa cifuniro ca umaso wanga. Pontho ndisawangisira kucita pyonsene pinakwanisa ine mukutumikira Mulungu, mbandiyang’ana cidikhiro ca ntsogolo.

Ndzidzi onsene ndisanyerezera pya dziko ipswa kuti inadzakhala tani toera ndidzathamange na kunumpha pontho. M’midzidzi inango, ndisasendzeka na xamwali wanga wapantima José María wakuti asathimbana na nfutete, pya mapika akuthamanga pabodzi. Ine ndisambvundza, “Mbani anafuna wina?” Iye asatawira, “Nkhabe tsalakana anafuna kuwina, cakufunika kakamwe ndi kukhala m’Paradizu, toera kuthamanga.”

Mphyakunentsa kakamwe kuthimbana na utenda wanga. Ndisadziwa kuti pikhali ine mphale, ndacita pinthu mwakusowa ndzeru na pyenepi pyandibweresera nkandzo ukulu. Mbwenye ndisapereka takhuta kwa Yahova thangwi yakukhonda kundisiya. Iye andipasa pizinji—banja ikulu yauzimu, cifuno cakukhala maso, citsandzayo cakuphedza anango na cidikhiro cadidi cantsogolo. Mwacigwagwa ndinalonga kuti Yahova asandipasa pizinji kupiringana pikhadikhira ine.

[Ntsonga ikulu pa tsamba 11]

Ndisakwanisa kusaka numero mu ntokodzi wa m’manja na cimuti