MBIRI YA UMASO
Kugumana Cinthu Cadidi Kakamwe Piringana Mbiri
Yakulongwa na Mina Hung Godenzi
Ntsiku inango namasiku mu caka 1984, ndacinja mbindikhala ntsikana wa mbiri. Ndabvazikwa nthimba ya Sinyala wa ku Hong Kong. Foto yanga ikhagumanika m’marevista na m’matsamba a mphangwa. Ndikhaimba, kubvina, kulonga pa mwinji, kucemerwa m’matelevizau, kubvala nguwo zakubalika kakamwe na kukhala na anthu a pidzo pikulu ninga governadoro wa ku Hong Kong.
Caka cindzace, ndatoma kucita mafilimu, kazinji kene ndikhacita khundu ya nyakuwina wankulu. Anyakukwata mphangwa akhafuna mbiri yanga, anyakubulusa mafoto akhafuna foto yanga na anthu akhandifuna m’maphwando, pakuzimula nyumba zipswa na mbuto zinango. Ndzidzi onsene ndikhafunika kakamwe na anthu.
Pang’ono na pang’ono, ndadzindikira kuti pyenepi nee pikhali pinthu pyakutundusa ninga mukhanyerezera ine. Ndapitiriza basi ene kucita mafilimu, pontho pyenepi pikhali pyakugopswa. Anyakucita mafilimu mu dziko ya Hong Kong nkhabe kuphatisira anthu akusangizira ninga pikhacita anthu akucita mafilimu a ku Hollywood, natenepa ndacita mafilimu anga ninga mapika a mota na motokala. Mafilimu mazinji akhacita ine akhali akuipa na auphanga. Anango akhaphataniza pyamizimu.
Mu 1995, ndamanga banja na nyakucita mafilimu. Maseze ndikhaona kuti ndiri na pyonsene toera kukhala wakutsandzaya ninga kubvekera, kobiri na mamuna waufuni—ndikhanentseka mbanditsukwala. Ndatonga kusiya basa yanga.
KUKUMBUKA PIKHAKHULUPIRA INE MU UWANA WANGA
Ndatoma kukumbuka na cifuno ca cikhulupiro cikhali na ine mu utsikana wanga. Mu ndzidzi unoyu, m’Masabudu onsene ine na m’bale wanga wankazi tikhaenda kacedza na banja ya Mboni za Yahova. Baba wa banja ineyi, Joe McGrath, akhapfundza Bhibhlya na ife, pabodzi na anace atatu acitsikana. Ikhali banja yadidi na yaufuni, pontho “Pai Joe” akhatsalakana mwacilemedzo nkazace na anace. Ndikhakomerwambo kuenda nawo pabodzi kumisonkhano yawo Yacikristu. Midzidzi inango tikhaenda kumisonkhano mikulu. Ineyi ikhali midzidzi yakutsandzayisa kakamwe. Ndikhapibva wakutsidzikizika kukhala pabodzi na Mboni za Yahova.
Mwakusiyana na banja ineyi, ndikhacitirwa pinthu pyakuipa panyumba pathu pene. Pikhacita baba pikhatsukwalisa kakamwe mama, pontho pikhancitisa kukhala wakunentseka. Pikhali ine nkati mwa pyaka khumi, Mama asiya kusonkhana na Mboni za Yahova. Ine ndikhapitiriza, mbwenye na ntima ubodzi, mbandibatizwa pikhali ine na pyaka 17. Mbwenye mwakukhonda dembuka, ndatoma kucita pinthu pyakukhonda khala pyacikristu mbandisiya kucita khundu ya mpingo.
NDATONGA KUBWERERA
Pidamala phwando yanga yakumanga banja, akulu a mpingo awiri a Mboni za Yahova abwera kudzacedza na ine. Iwo afokotoza kuti mbandidakwanisa tani kubwerera kuna Yahova Mulungu, pontho acita masasanyiro toera misionaryo wacikazi anacemerwa Cindy andiphedze. Mu ndzidzi unoyu, ndikhadaferatu mwauzimu, natenepa ndamphemba toera andipangize khala Bhibhlya ndi Mafaladi a Mulungu. Iye andipangiza pitsandzo pya maprofesiya a Bhibhlya anakwanirisika. Pang’ono na pang’ono, tadzakhala axamwali a ponda ndipondembo, pontho andiphemba toera kupfundza pipfundziso pyakutoma pya Bhibhlya na iye. Ine ndatawira. Pakutoma, ndadzindikira kuti Yahova ndi Mulungu waufuni, wakuti asafuna ndikhale wakutsandzaya.
Pidatoma ine kuenda pontho kumisonkhano Yacikristu, ndaona kuti ndikhatsandzaya kakamwe na Mboni za Yahova piringana kukhala na anthu akucita mafilimu. Mbwenye pikhathimbana na ine mu uwana wanga pikhandicitisa kupibva kuti nee ndisafunika kunyindira munthu, pontho nee ndikhakomerwa na pikhacita ine. Mulongo wa pa mpingo andiphedza mudandipangiza iye m’Bhibhlya kuti ndinathimbana tani na mabvero anewa, pontho ndapfundza kusankhula axamwali andimomwene.
CINTHU CADIDI KAKAMWE PIRINGANA MBIRI
Mu caka 1997, ine na mamunanga tafuluka kuenda ku Hollywood, California, E.U.A. Kweneko ndatoma kucita basa yakuphedza anthu toera kuphindula na cidziwiso ca Mafala a Mulungu. Kupfundzisa anthu Bhibhlya kusanditsandzayisa kakamwe piringana mabasa a mbiri na kucita mafilimu. Mwacitsandzo, mu 2002, ndagumanikana na Cheri, akhadziwana na ine kale ku Hong Kong. Mbiri ya umaso wathu ikhali yakulandana. Iye akhali Sinyala wa ku Hong Kong caka cibodzi ine mbandidzati kukhala sinyala. Mwandimomwene, mudawina ine cidzo ceneci, ndiye adandibvazika nthimba. Pontho adzakhalambo nyakucita mafilimu, mbaphata basa pabodzi na akulu a mbiri. Natenepa iye afulukambo kuenda ku Hollywood.
Ndatsukwala mudabva ine kuti mamunace Cheri alowa thangwi ya utenda wa ntima. Iye nee akhagumana cibalangazo mu uphemberi wace wa Budista. Ninga ine, iye akhali wakubvekera kakamwe kwakuti anango akhancitira bibvu, mbwenye akhali wakutsukwala, pontho nee akhanyindira munthu. Ndatoma kucedza naye pidapfundza ine m’Bhibhlya, mbwenye pikhan’nentsa kupibvesesa thangwi yakukhala m’Budista.
Ntsiku inango mu 2003, Cheri andicemera ku Vancouver, Kanada, kule kukhacita iye mafilimu. Mwakutsandzaya, iye andipanga kuti akhatekenya motokala kunja kwa nzinda mbatoma kuphembera mwandzidzidzi na mwakugaluza: “Ndipange, Mbani Mulungu wandimomwene? Dzina yanu ndimwe ani?” Mu ndzidzi unoyu, iye akhapita cifupi na Nyumba ya Umambo mbaona dzina yakuti Yahova. Natenepa, iye aona kuti ukhali ntawiro wa Mulungu, pontho akhafuna kugumanikana na Mboni za Yahova mwakucimbiza. Ndacita masasanyiro, mwakukhonda dembuka atoma kusonkhana na mpingo Wacixina ku Vancouver.
Mukupita kwa ndzidzi Cheri andipanga: “Anthu anewa asanditsalakana mwandimomwene. Ndisakwanisa kuapanga mabvero anga.” Ndatsandzaya kakamwe kubva mafala anewa, thangwi ndzidzi ukhacita iye mafilimu, Cheri nee akhali na axamwali. Iye apitiriza kugumanika pa misonkhano. Mbwenye mu 2005, acemerwa ku Xina toera kacita mafilimu mawiri akulapha, pyenepi pyancitisa kubwerera pontho ku Hong Kong. Mwakutsandzayisa, mu 2006, Cheri apereka umaso wace kuna Yahova mbabatizwa pa nsonkhano wa Mboni za Yahova ku Hong Kong. Maseze akhafuna kutumikira Yahova mwakukwana, basa yace yakucita mafilimu ikhacitisa kukhala kwakunentsa kwa iye na akhatsukwala kakamwe.
KUKOMERWA THANGWI YAKUPHEDZA ANANGO
Mu 2009, umaso onsene wa Cheri wadzacinja. Iye atonga kusiya kucita mafilimu toera kutumikira Yahova mwakukwana. Iye acita axamwali azinji apswa m’mpingo Wacikristu. Adzakhala ntumiki wa ndzidzi onsene wakumwaza mphangwa zadidi za Umambo na asatsandzaya kuphedza anthu kugumana njira yadidi ya umaso.—Mateo 24:14.
Buluka penepo Cheri atonga kupfundza Cinepali toera kuphedzera nsoka wa Mboni za Yahova zinalonga Cinepali ku Hong Kong. Ndinakwanisa kulonga kuti anthu azinji a ku Nepali anakhala mu Hong Kong asapwazwa ngakhale kucalirwa thangwi nkhabe kulonga mwadidi Cingerezi peno Cixina, pontho thangwi ya misambo yawo. Cheri andipanga kuti ali wakutsandzaya kakamwe kuphedza anthu anewa kubvesesa Bhibhlya. Mwacitsandzo, ntsiku inango, pikhamwaza iye mphangwa nyumba na nyumba, agumanikana na nkazi wa Cinepali wakuti akhadziwa pang’ono pya Yezu, mbwenye tayu pya Mulungu wandimomwene, Yahova. Cheri aphatisira Bhibhlya toera kumpangiza kuti Yezu aphembera kuna Babace wakudzulu. Mudadzindikira nkazi kuti asafunika kuphembera kuna Mulungu wandimomwene, wakuti dzinace ndi Yahova, iye atawira mphangwa zadidi. Mwakukhonda dembuka, mamunace na mwanawo wankazi atomambo kupfundza Bhibhlya.—Masalmo 83:18; Luka 22:41, 42.
Pikhaona ine Cheri mbakomerwa thangwi yakumwaza mphangwa ndzidzi onsene, ndikhabvundzika, ‘Ninji cinandicimwanisa kucita pinacita iye?’ Mu ndzidzi unoyu, ndafulukambo kuenda pontho ku Hong Kong. Ndatonga kusasanyira umaso wanga toera kupita m’basa ya ndzidzi onsene yakupfundzisa undimomwene wa Bhibhlya. Ndadzindikira kuti kubvesera anthu na kuaphedza toera kubvesesa Mafala a Mulungu pisanditsandzayisa kakamwe.
Mwacitsandzo, ndapfundzisa Bhibhlya nkazi Wacivietinami wakuti ndzidzi onsene akhatsukwala mbalira. Lero ali na umaso wakutsandzaya kakamwe na asakomerwa kusonkhana na mpingo.
Ine pabodzi na Cheri tagumana cinthu cadidi kakamwe piringana mbiri. Maseze kucita mafilimu kukhali kwakutsandzayisa na kwaticitisa kukhala akubvekera, kupfundzisa anthu pya Yahova Mulungu kusatitsandzayisa kakamwe thangwi kusapasa mbiri Mulungu. Taona kukwanirisika kwandimomwene kwa mafala a Yezu: “Kupasa kunakomeresa kupita kutambira.”—Machitiro 20:35.
[Ntsonga ikulu pa tsamba 10]
Ndadzindikira kuti kubvesera anthu na kuaphedza toera kubvesesa Mafala a Mulungu pisanditsandzayisa kakamwe