“Khala Kingsley Akwanisa Kucita, Ine Ndinakwanisambo”

PIDAMALA iye kubva cidzindikiro paphewa pace, Kingsley atoma kuleri Bhibhlya paulendo wakutoma pa Xikola Ya Utumiki Wa Mulungu m’mpingo. Iye alonga mafala onsene mwacidikhodikho nee kuphonyeka. Mphapo thangwi yanji iye nee akuyang’ana pa Bhibhlya yace?

Kingsley asakhala ku Sri Lanka, iye ndi boliboli. Iye nkhabe kwanisa kubva, pontho asafamba mu kuphatisira njinga ya anyakulamala. Kodi iye akwanisa tani kupfundza pya Yahova mpaka kuthema toera kulembesa pa Xikola Ya Utumiki Wa Mulungu? Dikhirani ndilonge mbiri yace.

Pidaona ine Kingsley paulendo wakutoma, ndadzuma kakamwe thangwi iye akhali na nyota kakamwe ya undimomwene wa Bhibhlya. Iye akhadapfundza kale Bhibhlya na Mboni zakusiyana-siyana. Bukhu yace Conhecimento Que Conduz à Vida Eterna mu Cibraile ikhadasakala kakamwe.a Iye atawira phembo yanga toera kutoma pontho kupfundza Bhibhlya, mbwenye tathimbana na mikandzo miwiri.

Mpingizo wakutoma, Kingsley akakhala pabodzi na andzace azinji panyumba inatsalakanwa ankhalamba na anyakumala. Na thangwi ya Dzumbi, pontho Kingsley nee akhabva mwadidi, ndikhafunika kulonga mwakugaluza kakamwe. Mwandimomwene, munthu onsene mu nyumba akhakwanisa kubva pfundziro yathu ikhacita ife pa sumana!

Mpingizo waciwiri, Kingsley akhakwanisa kuleri na kubvesesa mphangwa zipswa zakucepa kakamwe pa pfundziro ibodzi na ibodzi. Toera kuphindula kakamwe na pfundziro yathu, Kingsley akhakhunganyika mwakukwana. Iye akhaleri mwanyapantsi mphangwa za pfundziro, akhaleri malemba m’Bhibhlya yace ya Cibraile, mbayesera kutawira mibvundzo mu kuphatisira mafala ace ene. Njira ineyi ikhali yakuphindulisa kakamwe. Pa pfundziro yathu, iye akhakhala pantsi pa mpfumba mbafunya miyendo yace, akhalemba pantsi mu ndzidzi ukhafokotoza iye mwakugaluza kakamwe pinthu pidapfundza iye. Mwakukhonda dembuka, tikhapfundza kawiri pa sumana, mbatiphatisira midzidzi miwiri toera kucita pfundziro ibodzi!

KUGUMANIKA PA MISONKHANO NA KUCITA KHUNDU

Kingsley akhafuna kakamwe kugumanika pa misonkhano pa Nyumba ya Umambo, mbwenye pikhali pyakunentsa. Iye akhafuna ciphedzo toera kukwira pa njinga yace, munthu toera kunkhuba na kunkwiza m’motokala, na kumphedza toera kufika pa mbuto inakhala iye mu Nyumba ya Umambo. Mbwenye anthu azinji pa mpingo akhacinjana toera kumphedza, mbaona pyenepi ninga mwai. Pa misonkhano, Kingsley akhakhala cifupi na altofalante mbabvesera mwacidikhodikho, ngakhale kupereka matawiro!

Pidamala iye kupfundza mu ntsiku zingasi, Kingsley atonga kulembesa pa Xikola Ya Utumiki Wa Mulungu. Masumana mawiri mbadzati kucita nkhani yace yakutoma, ndambvundza khala akhakhunganyika peno nkhabe. Iye atawira na cinyindiro: “Inde M’bale, ndakhunganyika maulendo 30.” Ndansimba thangwi yakucita pyenepi, mbandimphemba toera ndibvesere kuti asaleri tani. Iye afungula Bhibhlya yace, aikha pyala pyace pa malemba a Cibraile mbatoma kuleri. Mbwenye ndaona kuti nee akhafambisa pyala pyace pa tsamba ninga pinacita iye pakuleri. Iye akhadaikha m’manyerezero ace khundu yonsene ya Bhibhlya ikhafunika iye kuleri!

Na misozi m’maso mwanga, ndamuyang’ana mwakukhonda tawira. Ndabvundza Kingsley kuti akwanisa tani kukumbuka mafala onsene pakumala kuyesera m’maulendo 30 basi. Iye atawira: “Nkhabe, ine ndisakhunganyika maulendo 30 pa ntsiku.” Kingsley akhakhala pa mpfumba yace mbaleri mwakubwereza-bwereza malemba anewa mpaka kukhazikika m’manyerezero, iye akhacita pyenepi kupiringana nthanda ibodzi.

Buluka penepo, yafika ntsiku yakucita nkhani yace pa Nyumba ya Umambo. Pidamalisa Kingsley kuleri, mpingo wamenya manja mwakukomerwa, azinji alira thangwi yakuwangisira kwa nyakupfundza mupswa unoyu. M’mwazi mphangwa unango wakuti mu ndzidzi uzinji akhadasiya kucita nkhani pa xikola thangwi ya kugopa, aphemba toera kulembesa pontho. Thangwi yanji? Iye alonga, “Khala Kingsley akwanisa kucita, ine ndinakwanisambo!”

Pakumala kupfundza Bhibhlya mu pyaka pitatu, Kingsley apangiza kuperekeka kwace kuna Yahova mu kubatizwa m’madzi pa ntsiku 6 ya Nyendzi ya caka 2008. Kingsley apitiriza ninga Mboni wakukhulupirika mpaka kufa kwace pa ntsiku 13 ya Gonkho ya caka 2014. Iye akhali na cinyindiro cakuti mu Paradizu pa dziko yapantsi, anadzakhala na mphambvu yakukwana na ungumi waungwiro toera kupitiriza na basa yace yakukhulupirika. (Iza. 35:5, 6)​—Mbiri iyi yalongwa na Paul McManus.

[Cidzindikiro capantsi]