NSOLO WA REVISTA

Kodi Mboni za Yahova Mbani?

“Ndisadziwa Mike kwa pyaka pizinji. Iye ndi m’bodzi wa Mboni za Yahova. Mbwenye nee ndisabvesesa mwadidi uphemberi wace. Yahova mbani? Thangwi yanji Mboni za Yahova nkhabe kucita maphwando a mafiriyadu? Kodi Mike abvungazikana na nsoka unango wa uphemberi?”​—Becky, California, E.U.A.

“Mudatoma anyakuendekana anga kupfundza Bhibhlya na Mboni za Yahova, ine ndabvundzika: ‘Kodi dzina ineyi yakuti Mboni za Yahova, isabvekanji? Kwa ine ukhali uphemberi wacilendo.”​—Zenon, Ontario, Kanada.

“Ine na nkazanga tikhanyerezera kuti Mboni za Yahova zabwera panyumba pathu toera kubandza mabvero athu akupasika mulando thangwi nee tikhaenda ku gereja. Taona kuti khala magereja mazinji nee ali napyo pinasaka ife, panango Mboni za Yahova nee ali napyombo.”​—Kent, Washington, E.U.A.

“Mwandimomwene nee ndikhadziwa kuti iwo mbani na asakhulupiranji.”​—Cecilie, Esbjerg, Dinamarka.

Panango imwe musaaonambo mbakamwaza mphangwa nyumba na nyumba peno mbuto zapakweca, kugawira mabukhu akubuluswa m’Bhibhlya na kucitisa mapfundziro a Bhibhlya akukhonda lipa. Panango mwatambira revista ino na m’bodzi wa izo. Ngakhale tenepo, panango musabvundzika kuti mwandimomwene Mboni za Yahova mbani. Manyerezero anu panango ndi akulandana na a anthu adalongwa padzulu apa.

Khala muli nayo mibvundzo ineyi, munagumana kupi matawiro? Munadziwa tani pinakhulupira Mboni za Yahova mwandimomwene, basa yawo yakumwaza mphangwa na mbuto zakulambira pisaphedzerwa tani, pontho thangwi yanji asabwera m’manyumba mwanu na kucedza na imwe m’mbuto zapakweca?

Cecilie adalongwa padzulu alonga: “Ndaleri kakamwe pya Mboni za Yahova mu Interneti. Ndabva mphekesera zakuipa na mphangwa zizinji za kupwazwa kwawo. Na thangwi ineyi, ndakhala na maonero akuphonyeka thangwi ya Mboni za Yahova.” Mbwenye patsogolo pace, acedza na Mboni za Yahova mbagumana matawiro akutsandzayisa ku mibvundzo yace.

Kodi musafuna kugumana matawiro andimomwene a mibvundzo yanu thangwi ya Mboni za Yahova? Tisakuwangisani toera kulonga na phata yakunyindirika​—Mboni za Yahova, anabulusa revista ino. (Misangani 14:15) Tisadikhira kuti misolo inatowerera inadzakuphedzani toera kudziwa kuti ndife ani, pontho tisakhulupiranji na tisacitanji.

NSOLO WA REVISTA | KODI MBONI ZA YAHOVA MBANI?

Mboni za Yahova Ndi Ntundu Wanji wa Anthu?

Ndife gulu ya dziko yonsene yakuti nkhabe kubvungazikana na misoka ya mauphemberi anango. Maseze ofesi yathu ikulu ya dziko yonsene yapantsi iri ku Estados Unidos, azinji a ife asakhala m’madziko anango. Mwandimomwene, Mboni za Yahova zakukwana mamiliyau masere zisapfundzisa anthu Bhibhlya m’madziko akukwana 239. Tisacita pyenepi mukubvera mafala a Yezu: ‘Penepo mphangwa zadidi za Umambo zinadzamwazwa pantsi ponsene, toera zikhale umboni kwa anthu a mitundu yonsene.’​—Mateo 24:14.

Mwakukhonda tsalakana dziko inakhala ife, tisabvera ntemo. Maseze tenepo, tisapitiriza kukhonda cita khundu ya ndale. Tisacita pyenepi thangwi tisabvera ntemo wa Yezu kwa Akristu unalonga pyakukhonda “kucita khundu ya dziko.” Natenepa, ife nkhabe cita khundu m’mabasa na mu pinthu pya ndale peno kuphedzera nkhondo. (Jwau 15:19; 17:16, Tradução do Novo Mundo) Na thangwi ineyi, nkati mwa Nkhondo II Ya Dziko Yonsene Yapantsi, Mboni za Yahova zikhaikhwa nkaidi, kusikimizwa ngakhale kuthabuswa munjira zinango zakuipa kakamwe thangwi ya kukhonda kuswa unakatinakati wawo. Bispu wakale wa ku Alemanya alemba: “Mboni za Yahova ndi zakuthema kulonga kuti ndi gulu yawo basi idathabuswa na Reich Wacitatu thangwi yakukoya unakatinakati wawo.”

Ngakhale tenepa, ife nkhabe kupambulika. Yezu aphembera kuna Mulungu thangwi ya atowereri ace: “Ine sinaphemba tayu kuti imwe muakwate mbamuabulusa pantsi pano.” (Jwau 17:15) Ndi thangwi yace, panango musationa pacisa mbatiphata basa, kucita malonda na kuenda kuxikola.

[Ntsonga ikulu pa tsamba 4]

“[Mboni za Yahova] ziri na midida mikulu ya makhaliro adidi. Ife mbitidakomerwa kupasa anthu anewa akusowa umbirimi pidzo pikulu mu ndale za dziko, mbwenye iwo nkhabe tawira. . . . Iwo asalemedza atongi a dziko, mbwenye asakhulupira kuti ndi Umambo wa Mulungu basi unakwanisa kumalisa nyatwa zonsene za anthu.”​—Tsamba ya mphangwa ya Nová Svoboda, Czech Republic.

[Bokosi pa tsamba 4]

MADZIKO AKUTI ALI NA MBONI ZA YAHOVA ZIZINJI

Estados Unidos 1.190.000

Mexiko 800.000

Brazil 770.000

Nigerya 330.000

Italya 250.000

Japau 220.000

[Bokosi pa tsamba 4]

Onani vidyu Congresso especial em Israel mu www.pr418.com/pt, pontho onani kuti Mboni za Yahova za ku Israele na ku Palestina zakunda tani kusankhulana kwa mitundu na madzindza.(Sakani pa QUEM SOMOS > CONGRESSOS)

NSOLO WA REVISTA | KODI MBONI ZA YAHOVA MBANI?

Ninji Pisakhulupira Mboni za Yahova?

Mboni za Yahova zisakhulupira kuti “Malemba onsene mbakupumirwa na Mulungu, pontho mbakuphindulisa.” (2 Timoti 3:16, NM) Ife tisaphatisira Bhibhlya ninga citsogolero toera kupfundza pya Nciti, pontho kukhala na umaso wakuphindulisa.

Bhibhlya isalonga: “Toera anthu akudziweni kuti imwe, dzina yanu ndi Yahova, imwe mwekha ndimwe Wankulu kakamwe kupiringana pyonsene pa dziko yapantsi.” (Masalmo 83:18, NM) Ndi thangwi yace, tisalambira basi ene Yahova Mulungu, pontho ninga Mboni zace, tisawangisira toera kudziwisa dzina yace.​—Izaiya 43:10-12.

Ninga Akristu, tisakhulupira kuti Yezu, “Mwana wa Mulungu,”a abwera pa dziko ya pantsi mbakhala Mesiya. (Jwau 1:34, 41; 4:25, 26) Mudafa iye, alamuswa muli akufa mbabwerera kudzulu. (1 Akorinto 15:3, 4) Mukupita kwa ndzidzi adzakhala Mambo wa Umambo wa Mulungu. (Apokalipse 11:15, NM) Umambo unoyu ndi utongi wandimomwene unafuna kudzabweresa papswa Paradizu pa dziko yapantsi. (Danyele 2:44) Bhibhlya isalonga: “Anyakupfulika anakhala na dziko, mbakomerwa na ntendere ukulu kakamwe.”​—Masalmo 37:10, 29.

Mboni za Yahova zisakhulupira kuti midida ya Bhibhlya inakwanisa kuphindulisa anthu ngakhale lero. (Izaiya 48:17, 18) Natenepa, ife tisabvera kakamwe midida ineyi. Mwacitsandzo, nakuti Bhibhlya isaticenjeza toera kucalira kucita pinthu pinapswipisa manungo na manyerezero, ife nkhabe kufumali peno kutomali, peno kuphatisira mwakuipa mitombwe yakuledzeresa. (2 Akorinto 7:1) Tisacalirambo mabasa anakhondeswa mwakubveka m’Bhibhlya, ninga kuledzera, makhaliro aulukwali na kuba.​—1 Akorinto 6:9-11.

[Cidzindikiro capantsi]

[Ntsonga ikulu pa tsamba 5]

“Angaleri Bhibhlya, asakhulupira kuti Mulungu akulonga na iwo. Angagwerwa na nyatwa mu umaso wawo, asasaka Mafala a Mulungu toera kuthimbana nazo . . . Kwa iwo, Mafala a Mulungu asapitiriza kukhala a maso.”​—Ntsogoleri wa gereja ya Katolika Benjamin Cherayath, tsamba ya mphangwa ya ku Alemanya ya Münsterländische Volkszeitung

[Bokosi pa tsamba 5]

Toera kudziwa pinakhulupira ife, kuphatanizambo mathangwi anaticitisa kukhonda kucita maphwando a mafiriyadu na kukhonda kuikhwa ciropa, pitani mu www.pr418.com/pt na sakani pa QUEM SOMOS > PERGUNTAS FREQUENTES.

NSOLO WA REVISTA | KODI MBONI ZA YAHOVA MBANI?

Basa Yathu Isaphedzerwa Tani?

Pyaka pyonsene, ife tisadhinda na kugawira pikwi pizinji pya Mabhibhlya na mabukhu akubuluswa m’Bhibhlya. Tisamanga nyumba, maofesi a filiali na nyumba zakudhindira mabukhu pa dziko yonsene. Pikwi pizinji pya mipingo isasonkhana n’nyumba zakubalika za ulambiri zinacemerwa Nyumba za Umambo. Mbani asalipa pyenepi pyonsene?

Basa yathu yonsene isaphedzerwa na pyakupereka pyakufuna. (2 Akorinto 9:7) Mu caka 1879, revista yaciwiri ya revista ino yalonga: “Ife tisakhulupira kuti basa ya ‘Zion’s Watch Tower’ [ninga mukhacemerwa revista ino] isaphedzerwa na YAHOVA, natenepa nee tinaphemba anthu peno kuadembetera toera kuphedzera basa ineyi.” Ife tisapitiriza na nsambo unoyu.

Pyakupereka pisatumizwa kwa ibodzi mwa maofesi athu a filiali peno pisaikhwa m’mabokosi anagumanika n’Nyumba zonsene za Umambo. Mbwenye ife cipo tisacita nsonkhonsonkho peno kulonga ntengo thangwi ya basa yathu peno mabukhu athu. Ife nkhabe kuphemba kulipwa toera kumwaza mphangwa, kupfundzisa m’mpingo peno kuphedzera basa yakumanga nyumba za ulambiri. Kusiyapo pyonsene, Yezu alonga: “Mwatambira pezi, pasanimbo pezi.” (Mateo 10:8) Atumiki onsene anaphata m’maofesi athu a filiali na ofesi ikulu pa dziko yonsene yapantsi, kuphatanizambo Mathubo Akutonga a Mboni za Yahova, nkhabe kutambira kobiri thangwi ya basa inacita iwo.

Pyakupereka pyakufuna pisaphatisirwambo toera kuphedzera pangaoneka pidengwa. Akristu akutoma akhatsandzaya kucita pyakupereka toera kuphedza anyakugwerwa na pidengwa. (Aroma 15:26) Munjira ibodzi ene, tisaphedzambo anagwerwa na pidengwa mu kuamangira nyumba, mbuto za ulambiri na kuapasa pyakudya, pyakubvala na mitombwe.

[Ntsonga ikulu pa tsamba 6]

‘Mboni za Yahova zisatsalakana mabasa awo onsene kubulukira mu pyakupereka pyakufuna. Munthu onsene asatonga ekha kobiri inafuna pereka iye ninga ‘cakupereka cakufuna’ na anacita pyenepi mu ndzidzi unafuna iye.’​—Thando Ikulu Inatsalakana Udidi wa Anthu ku Europa, 2011

[Bokosi pa tsamba 6]

Onani vidyu Tufão nas Filipinas: A fé supera dificuldades mu www.pr418.com/pt. (Sakani pa QUEM SOMOS > ATIVIDADES)

NSOLO WA REVISTA | KODI MBONI ZA YAHOVA MBANI?

Thangwi Yanji Tisamwaza Mphangwa?

Panango nkhabe cinango cinakucitisani kutidziwa mwadidi kupita basa yathu yakumwaza mphangwa nyumba na nyumba, mbuto zapakweca na mbuto zonsene zinagumanika anthu. Thangwi yanji tisacita basa ineyi?

Mboni za Yahova zisamwaza mphangwa toera kupasa mbiri Mulungu na kudziwisa dzina yace. (Ahebere 13:15) Pontho tisafuna kubvera Yezu Kristu adalonga kuti: ‘Ndokoni mphapo, citani anyakupfundza kwa anthu a madzindza onsene, . . . mbamuapfundzisa kukoya pinthu pyonsene pidakutumani ine.’​—Mateo 28:18, 19.

Mwakuthimizira, ife tisafuna anyakuendekana athu. (Mateo 22:39) Mbwenye, tisadziwa kuti anthu azinji ali na pikhulupiro pya mauphemberi awo, pontho nee onsene asafuna kubva mphangwa zathu. Ngakhale tenepa, ife tisadziwa kuti pipfundziso pya Bhibhlya pisapulumusa umaso. Ineyi ndi thangwi inaticitisa kupitiriza ‘kupfundzisa na kumwaza mphangwa zadidi zinalonga pya Kristu mwaphinga’ ninga pikhacita Akristu a m’pyaka dzana yakutoma.​—Machitiro 5:41, 42.

Anthu azinji analeri mabukhu athu nee ndi Mboni za Yahova. Pontho pikwi na pikwi pya anthu anapfundza Bhibhlya na ife ali na uphemberi wawo. Mbwenye, iwo asapereka takhuta kakamwe thangwi yakucedzerwa na Mboni za Yahova.

Mwakukhonda penula, panango muli na mibvundzo inango thangwi ya Mboni za Yahova. Tisakuphembani toera kugumana matawiro mu

• Kubvundza m’bodzi wa Mboni za Yahova.

• Kupita mu website yathu, www.pr418.com/pt.

• Kugumanika pa misonkhano yathu, yakuti nkhabe lipwa pontho kwa anthu onsene.

[Ntsonga ikulu pa tsamba 7]

Nyakupfundza makhaliro a anthu (Sociólogo) Antonio Cova Maduro alemba pya “kuwangisira na pinentso pinathimbana na Mboni za Yahova ngakhale mwakuneta . . . , toera mphangwa zakucena zifike kwa anthu pa dziko yonsene yapantsi.”​—Tsamba ya mphangwa ya El Universal, Venezuela

[Bokosi pa tsamba 7]

Toera kugumana mphangwa zakuthimizirika zinalonga pya Mboni za Yahova, onani vidyu Mboni za Yahova-Kumwaza Mphangwa Zadidi Pa Dziko Yonsene, mu www.pr418.com/seh. (Sakani pa MABUKHU > MAVIDYU)