NSOLO WA REVISTA | KODI MUSAFUNA KUPFUNDZA BHIBHLYA

Thangwi Yanji Tisafunika Kupfundza Bhibhlya?

Ndi cipi cifuniro ca umaso?

Thangwi yanji anthu asathabuka na kufa?

Ndi cipi cidikhiro ca ntsogolo?

Kodi Mulungu asanditsalakana?

Kodi mwacitikambo kale mibvundzo ninga ineyi? Khala ndi tenepo, nee muli mwekha. Anthu pa dziko yonsene yapantsi asanyerezera pya mibvundzo yakufunika kakamwe ya umaso. Mphapo munakwanisa kugumana matawiro?

Pikwi na pikwi pya anthu asatawira, “Inde!” Thangwi yanji? Thangwi iwo asagumana matawiro akutsandzayisa a mibvundzo yawo m’Bhibhlya. Kodi musafuna kudziwa kuti Bhibhlya isalonganji? Natenepa, phindulani na programu ya pfundziro ya Bhibhlya yakukhonda lipa inacitwa na Mboni za Yahova.a

Mwandimomwene, thangwi yakudinga Bhibhlya, anthu anango asalonga: “Ine nkhabe ndzidzi.” “Ndi yakunentsa kakamwe.” “Nee ndisafuna kucita cibverano mbindikhonda kwanirisa.” Mbwenye anango ali na maonero akusiyana. Iwo asakomerwa na mwai wakupfundza Bhibhlya. Dingani pitsandzo pingasi:

“Ndikhaenda ku gereja ya Katolika na protestante, templo ya Siques, gereja ya Budista na kupfundza teologiya ku universidade. Ngakhale tenepa, mibvundzo yanga mizinji yakulonga pya Mulungu nee yatawirwa. Buluka penepo m’bodzi wa Mboni za Yahova afika panyumba panga. Mu kudzumatirwa na matawiro ace akubulukira m’Bhibhlya, ndatawira kupfundza Bhibhlya.”​—Gill, England.

“Ndikhali na mibvundzo mizinji thangwi ya umaso, mbwenye matawiro a ntsogoleri wanga wa gereja nee akhandiphata ntima. Mbwenye, m’bodzi wa Mboni za Yahova atawira mibvundzo yanga mukuphatisira Bhibhlya. Mudandibvundza iye khala ndisafuna kupfundza pyakuthimizirika, ndatawira mwakutsandzaya.”​—Koffi, Benin.

“Ndikhafuna kakamwe kudziwa makhaliro a anyakufa. Ndikhakhulupira kuti anyakufa anakwanisa kuphekesa anthu amaso, mbwenye ndikhafuna kudziwa kuti Bhibhlya isalonganji. Natenepa ndatoma kupfundza Bhibhlya na xamwali wanga wakuti akhali Mboni ya Yahova.”​—José, Brazil.

“Ndikhayesera kuleri Bhibhlya, mbwenye nee ndikhaibvesesa. Buluka penepo Mboni za Yahova zabwera mbizifokotoza mwakubveka mapikiro mangasi a Bhibhlya. Ndikhafuna kudziwa pinango.”​—Dennize, Mexico.

“Ndikhafuna kudziwa khala Mulungu asanditsalakanadi. Natenepa, ndatonga kuphembera kuna Mulungu mwanaciro Bhibhlya. Mangwana mwace, Mboni za Yahova zafika panyumba panga, pontho ndatawira kupfundza Bhibhlya.”​—Anju, Nepal.

Pyakucitika pyenepi pisatikumbusa mafala a Yezu: “Anyakutsandzaya ndi ale anadzindikira pifuno pyawo pyauzimu.” (Mateo 5:3, Tradução do Novo Mundo) Inde, mwacibaliro anthu asafuna kudziwa Mulungu. Basi ene Mulungu ndi anakwanirisa cifuno ceneci, pontho asacita pyenepi kubulukira m’Mafalace, Bhibhlya.

Mphapo, pfundziro ya Bhibhlya isaphatanizanji? Inakuphindulisani tani? Mibvundzo ineyi inadzatawirwa mu nsolo unatowerera.

[Cidzindikiro capantsi]

[Bokosi pa tsamba 4]

UNDIMOMWENE WA BHIBHLYA

DZINA: Fala Yacigrego bi·bliʹa, isabveka “mabukhu mang’ono”

PYANKATI: Mabukhu 39 alembwa mu Cihebheri (na makhundu anango mu Ciaramaki) na mabukhu 27 alembwa mu Cigrego

KULEMBWA: Yalembwa na amuna 40 mu pyaka pyakupiringana 1.600, kutomera 1513 M.N.W. mpaka cifupi na 98 N.W.b

PILONGERO: Yathumburuzwa yonsene peno khundu ibodzi mu pilongero pyakupiringana 2.500

KUGAWIRWA: Mu medya, mabhilyau maxanu a Mabhibhlya asagawirwa, mbipicitisa kuti ikhale bukhu inagawirwa kakamwe pa dziko yonsene yapantsi

[Cidzindikiro capantsi]

NSOLO WA REVISTA | KODI MUSAFUNA KUPFUNDZA BHIBHLYA

Programu Yakupfundza Bhibhlya Kwa Onsene

Mboni za Yahova zisadziwika kakamwe na basa yawo yakumwaza mphangwa. Kodi musadziwambo kuti tiri na programu yakucitisa pfundziro ya Bhibhlya pa dziko yonsene yapantsi?

Mu caka 2014, Mboni za Yahova zakupiringana 8.000.000 m’madziko 240 zacitisa mapfundziro a Bhibhlya cifupi na 9.500.000 nthanda zonsene.a Mwandimomwene, numero ya anthu anapfundza Bhibhlya na ife isapiringana numero ya anthu a madziko anango akukwana 140!

Toera kukwanirisa basa ineyi yakupfundzisa, Mboni za Yahova zisabulusa Mabhibhlya, mabukhu, marevista cifupi na bhiliyau ibodzi na hafu na pinango pyakuphedzera toera kupfundza Bhibhlya pyakuti pisabuluswa pyaka pyonsene mu pilongero 700! Basa ineyi yakukhonda landanisika yakubulusa mabukhu isacitisa anthu kupfundza Bhibhlya mu cilongero cinafuna iwo.

MATAWIRO A MIBVUNDZO INACITWA KAZINJI KENE THANGWI YA PROGRAMU YATHU YAKUPFUNDZA BHIBHLYA

Kodi pfundziro ya Bhibhlya isacitwa tani?

Ife tisaphatisira misolo yakusiyana-siyana yakubuluswa m’Bhibhlya na kudinga mavesi akuti asabverana na ntsonga zenezi. Mwacitsandzo, Bhibhlya isatawira mibvundzo ninga iyi: Mulungu mbani? Kodi iye akhala tani? Kodi ali na dzina? Asakhala kupi? Tinakwanisa kunfendedzera? Nkandzo ulipo ndi wakudziwa kuti munasaka tani matawiro ace m’Bhibhlya.

Toera kuphedza anthu kugumana matawiro, ife kazinji kene tisaphatisira bukhu ya matsamba 224 ya nsolo wakuti Kodi Mwandimomwene Biblya Isapfunzisanji?b Bukhu ineyi yabuluswa toera kuphedza anthu kubvesesa pipfundziso pyakufunika pya Bhibhlya. Iri na misolo inalonga pya Mulungu, Yezu Kristu, nyatwa za anthu, kulamuka muli akufa, phembero na inango mizinji.

Kodi pfundziro ya Bhibhlya isacitwa lini pontho kupi?

Pfundziro ya Bhibhlya inakwanisa kucitwa pa ndzidzi na mbuto yakuthema kwa imwe.

Kodi pfundziro ya Bhibhlya isamala ndzidzi ungasi?

Anthu azinji asasankhula ndzidzi ubodzi masumana onsene toera kupfundza Bhibhlya. Mbwenye ndandanda wa pfundziro ndi wakukhonda nentsa. Ife tinadzacita mwakubverana na ndandanda wanu. Mapfundziro anango asacitwa basi ene mu mphindi 10 peno 15 masumana onsene.

Kodi pfundziro ya Bhibhlya isalipwa ntengo ungasi?

Pfundziro ya Bhibhlya na mabukhu anaphatisirwa nkhabe lipwa. Pyenepi pisabverana na pidalonga Yezu kuna anyakupfundzace: “Mwatambira pezi, pasanimbo pezi.”​—Mateo 10:8.

Kodi pfundziro ya Bhibhlya isamala ntsiku zingasi?

Pyonsene pinanyindira imwe. Bukhu yakuti Kodi Mwandimomwene Biblya Isapfunzisanji? iri na misolo 19. Munakwanisa kumala misolo yonsene mwakubverana na ntsiku zinafuna imwe.

Kodi ndisafunika kudzakhala m’bodzi wa Mboni za Yahova?

Nkhabe. Ife tisadziwa kuti munthu onsene ali na ufulu wakusankhula pinafuna iye kukhulupira. Anthu akuti agumana cidziwiso cakufunika ca Bhibhlya, anakwanisa kusankhula mwakubverana na pinapfundza iwo.

Ndinagumana kupi mphangwa zakuthimizirika?

Web site jw.org iri na mphangwa zakunyindirika zinalonga thangwi ya pikhulupiro na mabasa a Mboni za Yahova.

Ndinaphemba tani pfundziro ya Bhibhlya?

● Citani phembo yanu mu www.jw.org.

● Lemberani mbuto zinapangizwa pa tsamba yaciwiri ya revista ino.

● Pitani n’cibverano na Mboni za Yahova cifupi na kunakhala imwe. Munakwanisa kuasaka mukuphatisira numero za ntokodzi zidalembwa penepa.

[Pidzindikiro pyapantsi]

[Bokosi pa matsamba 5, 6]

“Cipo ndafuna kupfundza kuxikola, mbwenye pfundziro iyi ikhali yakutsandzayisa. Pontho pinthu pikhapfundza ine pikhandibalangaza kakamwe!”​—Katlego; South Africa.

“Pfundziro ya Bhibhlya yatawira mibvundzo yanga yonsene na pinango pizinji.”​—Bertha, Mexico.

“Pfundziro ya Bhibhlya ikhacitwa panyumba panga mu ndzidzi udasankhula ine. Pyenepi pikhanditsandzayisa kakamwe!”​—Eziquiel, Brazil.

“Pfundziro midzidzi inango ikhamala mphindi 15 mpaka 30​—midzidzi inango tikhadembuka​—mbwenye pikhabverana na ndzidzi wanga.”​—Viniana, Australia.

“Pfundziro ikhali yakukhonda lipa​—pyenepi pikhali pyakudzumatirisa.”​—Aimé, Benin.

“Mpfundzisi wanga wa Bhibhlya akhali wakupirira na wacitsalakano. Uxamwali wathu wadzakula kakamwe.”​—Karen, Northern Ireland.

“Anthu azinji asapfundza Bhibhlya mbakhonda kukhala Mboni za Yahova.”​—Denton, England.

[Bokosi pa tsamba 7]

CIPHEDZO KWA MABANJA

“Mudatoma nkazanga kupfundza Bhibhlya, ndaona kucinja kukulu mu umaso wace. Banja yathu yatoma kukhala mwadidi. Nakufuna kudziwa pikhapfundza iye, ndatomambo kupfundza. Pidapfundza ine pyandicitisa kukhala munthu wadidi. Kupfundza Bhibhlya kwaphedza banja yathu kukhala yakuphatana.”​—Eziquiel.

“Mudatoma ine kupfundza Bhibhlya, ndasiya nsambo wanga wakuphatisira mitombwe yakuledzeresa, kumwa mwakupiringana midida na kucalira kuipirwa mwakucimbiza. Nyumba yanga iri yakucena na yakukhunganywa mwadidi. Ndisapereka takhuta thangwi ya banja yanga na ndisakomerwa kucita pinthu toera ikhale yakutsandzaya. Ndiri wakutsandzaya kakamwe.”​—Karen.

“Anthu anango nee akhakomerwa thangwi yakupfundza kwanga Bhibhlya. Mbwenye mamunanga aphedzera cisankhulo canga mukulonga: ‘Ine nkhabe tsalakana pinalonga anthu. Basi ene ndisakomerwa na kucinja kwako. Pitiriza na kucita pyenepi.’ Banja yathu nee ikhali mwadidi!”​—Viniana.