KODI IMWE MUKHAPIDZIWA?

Kodi Mwanampheu Akhaphatisirwa Tani M’midzidzi Yakale?

Mwanampheu akhaphatisirwa toera kupeya tirigu peno pinango mbipikhala ufa wakucita nawo mikate. Kupeya ikhali basa ya ntsiku zonsene ya akazi peno anyabasa m’mabanja mazinji. Dzumbi yakupeya ikhacita khundu ya umaso wa ntsiku na ntsiku m’midzidzi yakale.​—Eksodo 11:5; Yeremiya 25:10.

Pithundzithundzi pya mu Ejito wakale pisapangiza basa ineyi. Pinthu pikhafuna kupeyiwa pikhaikhwa pa mwala, wakuti kazinji kene usacemerwa libwe. Nyakupeya akhagodama nduli mwa libwe mbaphatira mwanampheu na manja mawiri mbatoma kupeya. Mwakubverana na revista inango, kazinji kene anampheu akhalemera makilu 2 peno 4. Mwanampheu angaphatisirwa ninga cida, mwala unoyu ukhakwanisa kupha.​—Atongi 9:50-54.

Kupeya kukhali kwakufunika kakamwe toera banja ikhale mwadidi, ndi thangwi yace mwambo wa Bhibhlya ukhakhondesa kuphatira mwanampheu ninga cipanda. Deuteronomyo 24:6 isalonga: ‘Lekani kuphatira ninga cipanda mwanampheu wa libwe, thangwi ipyo mbapidakhala ninga cipanda ca moyo ene wa munthu.

Kodi Fala Yakuti ‘Pacifuwa’ Isabvekanji?

Bhibhlya isalonga kuti Yezu ali ‘pacifuwa pa Babace.’ (Jwau 1:​18) Fala ineyi isabveka uxamwali wakupambulika uli na Yezu na Mulungu. Mafala anewa asakumbusa misambo ikhacita Ayuda pa ndzidzi wakudya.

Mu ntsiku za Yezu, Ayuda akhatsamira masofaa nkhundu-khundu mwa meza toera kudya. Anthu onsene akhabwera kudzadya akhaikha misolo yawo kukhundu ya meza na miyendo yawo akhaikha kutali na meza, mbatsamira masofaa na pigunkunu pyawo pyabzwere. Pyenepi pikhacitisa mikono yawo yamadyo kukhala yakusudzuka. Anthu onsene akhadya pa meza akhatsamira khundu ibodzi ene yabzwere, unango nduli mwa ndzace. Bukhu inango isafokotoza kuti “nsolo wa mamuna ukhali cifupi na cifuwa ca mamuna unango wakuti akhali nduli mwace na wacembo ukhali cifupi na cifuwa ca ndzace.”

Kutsamira pacifuwa ca nsolo wa banja peno nyakutsogolera phwando pikhaoniwa ninga mwai wakupambulika kakamwe. Na thangwi ineyi, pa Paskwa yakumalisa ya Yezu, akhali “nyakupfundza wa pa ntima wa Yezu,” mpostolo Jwau adatsamira pacifuwa ca Yezu. Natenepa Jwau ‘atsamira pacifuwa pa Yezu’ toera kumbvundza.​​—Jwau 13:23-25; 21:20.