“Ine na Sofiyaa takhala pabodzi ninga banja mu pyaka pyakupiringana 39, buluka penepo iye alowa thangwi ya utenda. Ndikhali na ciphedzo ca axamwali, pontho ndikhali wakuphatika kakamwe na mabasa. Mbwenye mu caka camumphu ndikhatsukwala kazinji kene. Nee ndikhakwanisa kutonga mabvero anga. Maseze papita pyaka pitatu mbadamala kale kufa, midzidzi inango mwakukhonda dikhira ndisakundwa na mabvero akutsukwala.”—Kostas.

Kodi imwe mwaferwa na wakufunika wanu? Khala ndi tenepo, musathimbanambo na mabvero ninga a Kostas. Nkhabe cinthu cakuti cisapha kakamwe kupiringana kuferwa na ndzathu wa m’banja, wacibale, peno xamwali wakufunika. Anyakufufudza akuti asapfundza pya nyatwa inabwera thangwi yakuferwa na wakufunika asaphedzerambo pyenepi. Nsolo ubodzi udabuluswa mu Revista Americana de Psiquiatria walonga kuti “kuferwa ndi cinthu cakuti cisatsukwalisa kakamwe.” Munthu wakuti asathimbana na mabvero anewa anakwanisa kubvundzika: ‘Kodi ndinathimbana na mabvero anewa mpaka lini? Ndinakhala pontho wakutsandzaya? Ndinagumana kupi ciphedzo?’

Matawiro a mibvundzo ineyi asagumanika mu revista ino ya Lamukani! Nsolo unatowera unadinga mabvero anakhala na anthu angaferwa na wakufunika wawo, pontho nyatwa zinathimbana na iwo. Misolo inango inadzafokotoza njira zingasi zakuti zinakuphedzani toera kuthimbana na kutsukwala kwanu.

Tisadikhira na ntima onsene kuti ntsonga zinatowera zinadzabalangaza na kuphedza ale anathimbana na nyatwa zinabwera thangwi yakutsukwala.

Maseze anyakufufudza anango asalonga kuti kutsukwala kusakhala kubodzi kwene, mbwenye munthu m’bodzi na m’bodzi asatsukwala munjira yace. Kodi kutsukwala kunacita anango kusapangiza kuti asatsukwala pang’ono peno “asabisa” mabvero awo? Nkhabe. Maseze kutsukwala kunakwanisa kuphedza munthu, mbwenye nkhabepo “njira yakuthema” toera kupangiza kutsukwala. Pyonsene pisanyindira mbuto idabalwa munthu, makhaliro ace, pinthu pidathimbana na iye mu umaso, kuphatanizambo njira idafa munthu.

PINADZAIPA MPAKA PAPI?

Munthu wakuti aferwa na wakufunika wace, panango nkhabe dziwa kuti anathimbana tani na pyenepi. Mbwenye kazinji kene asadikhira kuti anadzathimbana na mabvero akutsukwala na pinentso pinango. Tendeni tidinge pitsandzo pingasi:

Kukundwa na mabvero. Munthu anakwanisa kulira, kufuna kukhala pontho na munthu adalowa na kucimwana kutsandzaya. Anakwanisambo kukumbuka pinthu pyakale na kulota. Mbwenye pakutoma, munthu nee asatawira kuti pyacitikadi. Tiina asakumbuka mu ndzidzi udalowa mamunace, Timo, mwakukhonda dikhira. Iye alonga: “Pakutoma ndikhali ninga munthu wakukomoka. Nee ndikhakwanisa kulira paulendo wakutoma. Midzidzi inango ndikhanentseka kakamwe kwakuti nee ndikhakwanisa kupuma mwadidi. Nee ndikhakwanisa kutawira pidacitika.”

Kuthimbana na kupswipa ntima, kuipirwa na kupasika mulando. Ivan alonga: “Pidafa mwanathu Eric wa pyaka 24 pyakubalwa, ine na nkazanga Yolanda takhala akuipirwa mu ndzidzi uzinji! Pyenepi pyatidzumatirisa, thangwi cipo tikhadapangiza kale mabvero akuipirwa. Tikhapasikambo mulando mbatinyerezera kuti ciripo cikhafunika ife kucita toera kuphedza mwanathu.” Alejandro, wakuti nkazace alowa thangwi ya utenda, akhalambo na mabvero akupasika mulando, iye alonga: “Pakutoma ndikhanyerezera kuti khala Mulungu akutawirisa kuti ndithabuke, panango ine ndine munthu wakuipa. Buluka penepo ndatsumbikika thangwi ndikhapasa mulando Mulungu thangwi ya pidacitika.” Kostas adalongwa mu nsolo wakutoma, alonga: “Midzidzi inango ndikhaipirwa thangwi yakulowa kwa Sofiya. Buluka penepo ndikhatsumbikika thangwi yakukhala na mabvero anewa. Kusiyapo pyenepi, iye nee akhali na mulando.”

Manyerezero akuphonyeka. Midzidzi inango munthu adaferwa na wakufunika anakwanisa kunyerezera mwakudodomeka. Mwacitsandzo, nyakuferwa ananyerezera kuti anakwanisa kubva fala ya munthu adalowa peno kumuona. Peno nyakuferwa ananentseka toera kunyerezera mwadidi peno kukumbuka pinthu. Tiina alonga: “Midzidzi inango ndikhacedza na anango, mbwenye manyerezero anga akhali kutali! Pikhali pyakunentsa kakamwe mu ndzidzi udalowa Timo. Midzidzi inango nee ndikhakwanisa kunyerezera mwadidi, pontho ndikhatsukwala.”

Mabvero akufuna kukhala wekha. Munthu wakutsukwala anakwanisa kuipirwa peno kukhala wakukhonda kusudzuka pamaso pa anango. Kostas alonga: “Pikhali ine pabodzi na axamwali akumanga banja, ndikhabva kuti ndiri ndekha. Mbwenye ndikhabvambo kuti ndiri ndekha pikhali ine na axamwali akuti adzati kumanga banja.” Nkazi wa Ivan, Yolanda, asakumbuka: “Pikhali pyakunentsa kakamwe kukhala cifupi na anthu akuti akhadungunya thangwi ya nyatwa zawo zakuti zikhaoneka ninga zakucepa tingalandanisa na zathu! Buluka penepo, anango akhatipangambo kuti anawo ali mwadidi. Ndikhakomerwa na iwo, mbwenye mu ndzidzi ubodzi ene, nee ndikhakwanisa kuabvesera mwadidi. Ine na mamunanga tabvesesa kuti nee tikhafunika kufewa manungo, mbwenye nee tikhakwanisa kuthimbana na pyenepi.”

Nyatwa za ungumi. Tingaferwa panango tinaluza cifuno cakudya, tinaonda peno kusowa citulo. Aaron asakumbuka pidapita caka cibodzi pai wace mbadamala kulowa. Iye alonga: “Ndikhanentseka toera kuphatwa na citulo. Namasiku ndikhalamuka ndzidzi ubodzi ene mbandinyerezera thangwi yakulowa kwa pai wanga.”

Alejandro asakumbuka kuti nee akhadziwa cikhanentsa ungumi wace, alonga: “Maulendo mazinji ndikhadingwa na dotoro mbalonga kuti ndiri na ungumi wadidi. Ndikhaona kuti kutsukwala ndiko kukhandibweresera nyatwa za ungumi.” Mukupita kwa ndzidzi mabvero anewa amala. Ngakhale tenepo, cisankhulo cidacita Alejandro toera kalonga na dotoro cikhali cadidi. Kutsukwala kunakwanisa kuondesa munthu, kutekeresa nyatwa za ungumi peno kubweresa mautenda anango.

Kucimwana kucita mabasa akufunika. Ivan asakumbuka: “Pidalowa Eric tikhafunika kudziwisa acibale athu, axamwali, kuphatanizambo anthu anango ninga patrau wace na mwanaciro nyumba ikakhala iye. Pontho tikhafunika kulemba madhukumentu mazinji mwakubverana na mwambo. Buluka penepo, tikhafunikambo kutsalakana pinthu pya Eric. Pyonsene pikhaphemba kuwangisira, thangwi mu ndzidzi unoyu tikhadasowa mphambvu, pontho manyerezero athu nee akhali pa mbuto.”

Mbwenye kwa anango, pinentso pisabwera mu ndzidzi unafunika iwo kutsalakana pinthu pyakuti pikhatsalakanwa na wakufunika wawo adafa. Ndi pyenepi pidacitika na Tiina. Iye alonga: “Ndi Timo akatsalakana konta yathu ya ku bhanku na pinthu pinango pya malonda. Pinthu pyenepi akhafuna kupitsalakana ndine, mbwenye pikhali pyakunentsa. Mbidakwanisadi kucita pyenepi pyonsene mbandikhonda kudzudzumika?”

Pitsandzo pidadinga ife, pisapangiza kuti mphyakunentsa kuthimbana na kutsukwala. Undimomwene ndi wakuti nyatwa zinabwera thangwi yakuferwa zisapha, mbwenye kuzidziwa mwanyapantsi kunakwanisa kuphedza munthu adaferwa. Kumbukanimbo kuti kutsukwala kunathimbana na anthu ndi kwakusiyana. Kusiyapo pyenepi, ale adaferwa anakwanisa kubalangazwa mukudziwa kuti mabvero awo akutsukwala nee ndi akuipa.

NDINAKWANISA KUKHALA PONTHO WAKUTSANDZAYA?

Pinafunika ife kudikhira. Kutsukwala nee kunakhala kwenda na kwenda; mukupita kwa ndzidzi kusapunguka. Pyenepi nee pisabveka kuti kutsukwala kwa munthu kusamaliratu peno anaduwala wakufunika wace. Mbwenye mwapang’ono-pang’ono, kusapunguka. Mabvero anewa anakwanisa kuoneka munthu angatoma kukumbuka pinthu pyakale mwakukhonda dikhira ninga ntsiku zakupambulika zidakhala iwo pabodzi. Mbwenye mukupita kwa ndzidzi, anthu azinji asakwanisa kutonga mabvero awo mbakwanisa pontho kucita mabasa awo a ntsiku na ntsiku. Pyenepi pisacitika makamaka khala nyakuferwa asatambira ciphedzo ca acibale peno axamwali na kucita pinthu pinango toera kupungula kutsukwala.

Kodi ndinatsukwala mpaka lini? Anango asathimbana na mabvero akutsukwala miyezi mingasi. Mbwenye anango, asamala caka cibodzi peno piwiri toera kukunda mabvero awo. Anangombo asapiringana pyaka piwiri.a Alejandro alonga: “Kwa ine, papita pyaka pitatu mbandikatsukwala.”

Khalani wakupirira. Tsalakanani ntsiku ibodzi na ibodzi pa yokha, citani pire pinakwanisa imwe, pontho kumbukani kuti kutsukwala kwanu nee kunakhala kwenda na kwenda. Mafala anewa, anakuphedzani toera kupungula kutsukwala kwanu, pontho anakuphedzani toera mukhonde kutsukwala mu ndzidzi uzinji.

Mungasaka ciphedzo toera kuthimbana na kutsukwala, munadzagumana maonero akusiyana-siyana—maonero anango ndi adidi kupiringana anango. Ninga pidalongwa pakutoma, pyenepi pisacitika thangwi anthu asatsukwala munjira yakusiyana. Pinaphata basa kuna munthu m’bodzi nee pinaphata basa kuna unango.

Ngakhale tenepo, pana pitsogolero pidaoniwa kuti pisaphata basa kuna anthu azinji. Pitsogolero pyenepi pisalongwa kazinji kene na ale anapereka ciphedzo kuna anthu akutsukwala, iwo asalonga midida yadidi yakuti isagumanika m’bukhu ya udziwisi yakuti yalembwa kale kakamwe, Bhibhlya.

1: TAWIRANI CIPHEDZO CA ACIBALE NA AXAMWALI

• 

  Anyakufufudza anango asaona pyenepi ninga cinthu cakufunika kakamwe toera kuthimbana na kutsukwala kunabwera thangwi yakuferwa. Mbwenye midzidzi inango munafuna kukhala mwekhene. Panango munaipirwa na ale anayesera kukuphedzani. Pyenepi pisacitika.

• Nee musakakamizwa kukhala cifupi na anthu ndzidzi onsene, mbwenye lekani kuasiyiratu. Kusiyapo pyenepi, imwe munadzafuna ciphedzo cawo kutsogolo. Mwakukoma ntima pangani anango pinafuna imwe mu ndzidzi unoyu na pinakhonda imwe funa.

• Mwakubverana na pyakufuna pyanu, khazikisani ndzidzi unafuna imwe kukhala na anango na ndzidzi unafuna imwe kukhala mwekhene.

BHIBHLYA ISALONGANJI: ‘Mphyadidi kukhala anthu awiri, thangwi m’bodzi angagwa, ndzace anamulamusa.’—Koelete 4:9, 10.

2: DYANI NINGA PIKHACITA IMWE KALE, PONTHO KHALANI NA NDZIDZI TOERA KUSENDZEKA

• Kudya ninga pikhacita imwe kale, kunakuphedzani toera kuthimbana na kutsukwala kuli na imwe thangwi yakuferwa. Yeserani kudya misapo yakusiyana-siyana, masamba na proteína magra.

• Mwani madzi mazinji na pyakumwa pinango pinabweresa ungumi.

• Mungasowa cifuno cakudya, wangisirani kudya pang’ono. Panango musafunikambo kubvundza dotoro wanu thangwi ya pyakudya pinango pyakupasa ungumi.a

• Kufamba peno masendzekero anango anakuphedzani toera kupungula manyerezero akuipa, pontho anakuphedzani toera kuduwala pidacitika.

BHIBHLYA ISALONGANJI: ‘Nkhabepo munthu anaida manungo ace, mbwenye iye asaadyesa mbaatsalakana mwadidi.’—Aefesi 5:29.

3: GONANI MWAKUKWANA

• 

  Kugona ndi kwakufunika kuna onsene, mbwenye makamaka ndi kwakufunika kwa ale anatsukwala, thangwi asakhala akuneta kakamwe.

• Calirani kumwa café na pyakumwa pyakuledzeresa, thangwi pinagwanda citulo.

BHIBHLYA ISALONGANJI: ‘Kupuma pang’ono mphyadidi kupita kuphata basa mwakuwanga na kuthamangira mphepo.’—Koelete 4:6.

4: LEKANI KULANDANISA PINACITA IMWE NA PINACITA ANANGO

• 

  Kumbukani kuti anthu asatsukwala munjira yakusiyana. Natenepa, musafunika kucita pinthu pyakuti pinakuphedzani.

• Anthu azinji asaona kuti kulonga mabvero awo akutsukwala kuna anango kusaaphedza toera kuthimbana na pyenepi, mbwenye anango asaona kuti mphyadidi kumatama. Anyakufufudza ali na maonero akusiyana-siyana thangwi ya pyenepi. Khala imwe musafuna kulonga mabvero anu, mbwenye musanyinyirika kucita pyenepi, yeserani kulonga na xamwali wanu wapantima.

• Anthu anango asaona kuti kulira kusaaphedza kuthimbana na kutsukwala kwawo, mbwenye anango asakwanisa kuthimbana na kutsukwala kwawo maseze alire pang’ono.

BHIBHLYA ISALONGANJI: ‘Ntima ubodzi na ubodzi usadziwa kuthabuka kwace.’—Misangani 14:10.

5: CALIRANI MISAMBO YAKUTI INAKUPHEKESANI

• 

  Anyakuferwa anango asayesera kupungula kutsukwala kwawo mukuphatisira mwakuipa pyakumwa pyakuledzeresa peno mitombwe yakuledzeresa. “Njira” zenezi ndi zakuphekesa. Anthu anacita pyenepi asakwanisa pungula kutsukwala kwawo, mbwenye basi ene ndi mu ndzidzi wakucepa, pontho pinakwanisa kubweresa ngozwi. Yeserani njira zadidi zakuti zinakuphedzani kupungula kutsukwala kwanu.

BHIBHLYA ISALONGANJI: ‘Tisafunika kuceneseka, mbatisiya pinthu pyonsene pinapswipisa.’—2 Akorinto 7:1.

6: GAWANI MWADIDI NDZIDZI WANU

• Anango asaona kuti pisaphedza kakamwe kukhala na ndzidzi wakutsukwala (ndzidzi wakuthimbana na mabvero awo) na ndzidzi wakupuma (mabasa akuti asaaphedza kuduwala pang’ono kutsukwala kwawo).

• Munakwanisa kupungula kutsukwala kwanu mukucita uxamwali peno kucedza na axamwali anu, kupfundza pinthu pipswa peno kucita masendzekero.

• Mukupita kwa ndzidzi, munakwanisa kukhala na mabvero adidi. Panango munakwanisa kuona kuti midzidzi inapibva imwe mwadidi inakhala mizinji kupiringana midzidzi yakutsukwala —pyenepi pisapangiza kuti muli kupungula kutsukwala kwanu.

BHIBHLYA ISALONGANJI: ‘Pinthu pyonsene pina midzidzi yapyo, ulipo ndzidzi wakulira na ndzidzi wakuseka; ulipo ndzidzi wakubulira na ndzidzi wakubvina.’— Koelete 3:1, 4.

7: KHAZIKISANI NDANDANDA

• 

  Mwakukhonda dembuka citani pontho pinthu pikhacita imwe kale.

• Mungacita pontho pinthu pikhacita imwe kale ninga kugona, kuphata basa na pinthu pinango pinadzakuphedzani kakamwe.

• Khalani wakuphatika na mabasa akuti anakuphedzani kupungula mabvero anu akutsukwala.

BHIBHLYA ISALONGANJI: ‘Nee anadzanyerezerabve umaso wace wakale, thangwi Mulungu wandimomwene asacitisa kuti ntima wace ukhale wakutsandzaya.’—Koelete 5:20.

8: CALIRANI KUCITA PISANKHULO MWAKUCIMBIZA KAKAMWE

• Azinji anacita pisankhulo mwakucimbiza kakamwe pakumala kuferwa na wakufunika wawo, mukupita kwa ndzidzi asatsumbikika.

• Pingakwanisika, dikhirani ndzidzi uzinji mbamudzati kucinja basa peno kutaya pinthu pya wakufunika wanu.

BHIBHLYA ISALONGANJI: ‘Pinanyerezera munthu waphinga, pisafamba mwadidi. Mbwenye pinanyerezera munthu wakupolola pisantcerengesa.’—Misangani 21:5.

9: KUMBUKANI WAKUFUNIKA WANU

• 

  Anyakuferwa azinji asaona kuti pisakhala pyadidi kucita pinthu pyakuti pinaaphedza kukumbuka munthu adalowa.

• Munaonambo kuti pinakubalangazani kakamwe kugumanya mafoto peno pinthu pinango pyakuti pinakuphedzani kukumbuka wakufunika wanu.

• Koyani pinthu pinafuna kuona imwe ntsogolo toera pikuphedzeni kukumbuka midzidzi yadidi.

BHIBHLYA ISALONGANJI: ‘Kumbukani ntsiku zakale.’—Deuteronomyo 32:7.

10: CITANI ULENDO

• Khalani na ndzidzi wakupuma peno kubulusa ferya.

• Khala ndzidzi wanu wakupuma ndi wakucepa, panango yeserani kucita cinthu cinango cakutsandzayisa ntsiku ibodzi peno ziwiri, ninga kufamba, kuona muzeu, kuenda mbuto zipswa peno kuenda ku bara.

• Kucita mabasa anango kunakuphedzani toera kuthimbana na kutsukwala kwanu.

BHIBHLYA ISALONGANJI: ‘Bwerani imwe basi, tendeni ku mbuto ya pathu tekha toera mupume pang’ono.’—Marko 6:31.

11: PHEDZANI ANANGO

• 

  Kumbukani kuti ndzidzi onsene unaphedza imwe anango pinakuphedzanimbo toera kupungula kutsukwala kwanu.

• Tomani kuphedza ale adakhuyiwa na kulowa kwa wakufunika wanu, ninga axamwali peno acibale anafuna cibalangazo.

• Kuphedza na kubalangaza anango kunakucitisani kukhala wakutsandzaya mbamukhala pontho na cifuniro cikhali na imwe mu umaso.

BHIBHLYA ISALONGANJI: ‘Kupasa kusatsandzayisa kakamwe kupiringana kutambira.’—Machitiro 20:35.

12: CITANI NDANDANDA YA PINTHU PINAFUNIKA KUTSALAKANWA PAKUTOMA

• Kutsukwala kunakwanisa kukuphedzani toera kuona pinthu pyakufunika kakamwe.

• Bandzani ndzidzi unoyu toera kunyerezera njira inaphatisira imwe umaso wanu.

• Pingafunika, citani macinjo mu pinthu pinaikha imwe pa mbuto yakutoma.

BHIBHLYA ISALONGANJI: ‘Mphyadidi kuenda kunyumba ya nyakuferwa kusiyapo kuenda kunyumba inacitwa phwando, thangwi kufa kusacitika kuna anthu onsene, pontho onsene ali maso asafunika kunyerezera pyenepi.’—Koelete 7:2.

Kulonga undimomwene, pinacimwanika kumalisa mabvero anu onsene akutsukwala. Mbwenye kubulukira mu pinthu pidathimbana na ale onsene adaferwa na wakufunika wawo, anakwanisa kutawira kuti kuphatisira njira zadidi ninga zidalongwa mu nsolo uno, zaabalangaza. Mwandimomwene, pana njira zinango zakuti tinakwanisa kuziphatisira toera kupungula kutsukwala kwathu thangwi yakuferwa. Mbwenye mungayesera kuphatisira maonero adadinga ife, munaona kuti anakuphedzani kakamwe toera kupungula kutsukwala kwanu.

KUTSUKWALA KUNABWERA THANGWI YAKULOWA KWA WAKUFUNIKA NDI CINTHU CAKUTI CISAFUFUDZWA KAKAMWE NTSIKU ZATHU. Ninga pidalongwa nduli, uphungu wadidi kakamwe udaperekwa na anyakufufudza, kazinji kene usabverana na udziwisi wakale unagumanika m’Bhibhlya. Pontho usabverana na midida inagumanika mwenemo. Mbwenye m’Bhibhlya musagumanika pizinji kupiringana uphungu wakunyindirika. Pontho muli na mphangwa zakuti nkhabe gumanika mbuto zinango, mphangwa zenezi zinabalangaza ale adaferwa na wakufunika wawo.

• Khalani na cinyindiro cakuti anyakufunika athu adafa nee ali kuthabuka

  Lemba ya Koelete 9:5 isalonga kuti ‘anyakufa nkhabe cinadziwa iwo.’ Iwo ‘nkhabebve kunyerezera.’ (Masalmo 146:4) Bhibhlya isalandanisa kufa na citulo cikulu.—Jwau 11:11.

• Kukhulupira kuti Mulungu ndi waufuni kusabalangaza

  Lemba ya Masalmo 34:15 isalonga: ‘Maso a Yahovaa asayang’ana anthu akulungama, makutu ace asabva maphembero awo.’ Kulonga mabvero athu kuna Mulungu ndi kwakufunika kakamwe kupiringana kulonga kuna munthu unango peno kutonga tekhene mabvero athu. Kusatiphedza kukhala na uxamwali na Nciti wathu, wakuti anakwanisa kuphatisira mphambvu yace toera kutibalangaza.

• Cidikhiro ca tsogolo yadidi

  Nyerezerani ndzidzi wakuti ale ali munthumbi anadzalamuswa muli akufa mbakhala pa dziko yapantsi! Bhibhlya isalonga pyenepi mwaku- bwereza-bwereza. Mukulonga pya makhaliro a ntsogolo pa dziko yapantsi, Bhibhlya isalonga kuti Mulungu ‘anadzapukuta misozi yonsene m’maso [mwathu], pontho nkhabe kudzaonekabve kufa, nee kutsukwala, nee kulira, nee kubva kupha.’—Apokalipse 21:3, 4.

Azinji anakhulupira Yahova, mwanaciro Bhibhlya, asakwanisa kuthimbana na kutsukwala thangwi iwo apfundza kuti anyakufunika awo adafa anadzalamuswa pontho. Mwacitsandzo, Ann adaferwa na mamunace wa pyaka 65 pyakubalwa, alonga: “Bhibhlya isandipasa cinyindiro cakuti anyakufunika athu adalowa nee akuthabuka, pontho Mulungu anadzalamusa onsene ali m’manyerezero mwace. Ndisakumbuka pyenepi ndzidzi onsene unanyerezera ine wakufunika wanga adalowa, natenepa pyenepi pisandiphedza toera kuthimbana na cinthu cakutsukwalisa kakamwe cidandicitikira.”

Tiina, adalongwa pakutoma kwa misolo ino, alonga: “Kubulukira ntsiku idalowa Timo, Mulungu asandiphedza kakamwe. Ndisakwanisa kuona djanja ya Yahova m’midzidzi ya nyatwa. Pontho pikiro ya Bhibhlya inalonga pya kulamuswa muli akufa ndi yandimomwene kakamwe kwa ine.”

Anthu azinji ananyindira pinalonga Bhibhlya ali na mabvero mabodzi ene. Maseze khala musanyerezera kuti pinalonga Bhibhlya ndi uthambi peno ndi ndoto, yeserani kuifufudza toera kuona khala uphungu wayo peno mapikiro ayo ndi andimomwene. Buluka penepo munadzindikira kuti kupiringana cinthu consene, Bhibhlya ndi bukhu yakuthema kakamwe toera kuphedza ale adaferwa na wakufunika wawo.

PFUNDZANI PIZINJI THANGWI YA CIDIKHIRO CA ANYAKUFA

Onani mavidhyu analonga thangwi ya pyenepi mu saiti yathu, jw.org

QUAL É A CONDIÇÃO DOS MORTOS?

Ninji pinacitika na ife tingafa? Ntawiro wa Bhibhlya unatibalangaza na kutipasa cinyindiro

Sakani pa MABUKHU > MAVIDYU (Sakani mbuto yakuti: Bíblia)

MUSAFUNA KUBVA MPHANGWA ZADIDI?

Nakuti tisabva mphangwa zizinji zakutsukwalisa, mphapo tinagumana kupi mphangwa zadidi? Vidhyu iyi isalonga pya bhruxura Mphangwa Zadidi za Mulungu!

Sakani pa MABUKHU > MAVIDYU (Sakani mbuto yakuti: Misonkhano Yathu na Utumiki)