Nyumba Za Umambo—Zisamangirwanji, Pontho Zisamangwa Tani?

Dzina yakuti Nyumba ya Umambo isabveka mbuto inadingwa pipfundziso pya Bhibhlya pyakuti pisagomezera Umambo wa Mulungu—nsolo wa utumiki wa Yezu.—Luka 8:1.

Ndi nyumba za ulambiri wandimomwene pacisa. Kubulukira pa Nyumba za Umambo, Mboni za Yahova zisatsalakana basa yakumwaza mphangwa zadidi pacisa. (Mateo 24:14) Nyumba za Umambo zisasiyana kukula na makhaliro, mbwenye zonsene zisakhala zakuthema, zizinji zisaphatisirwa na mpingo wakupiringana ubodzi. Mu pyaka pya cincino, tamanga Nyumba za Umambo zipswa zakukwana makhumi a pikwi (ndi medya ya nyumba zixanu pa ntsiku ibodzi) toera kutsalakana kuthimizirika kwa amwazi mphangwa na kwa mipingo. Pyenepi pisakwanisika tani?—Mateo 19:26.

Zisamangwa na pyakupereka pinacitwa toera kumanga Nyumba ya Umambo. Pyakupereka pyenepi pisatumizwa ku ofesi ya filiali toera kobiri ineyi iphatisirwe m’mipingo inafuna kumanga peno kusasanyira Nyumba ya Umambo.

Zisamangwa na anyakuperekeka akukhonda kulipwa a maluso na a makhaliro akusiyana-siyana. M’madziko mazinji musakhazikiswa Misoka Yakumanga Nyumba za Umambo. Misoka ya atumiki a basa yakumanga na anango akuperekeka asaenda ku mpingo ubodzi na ubodzi mu dziko yawo, ngakhale ku pisa pyakutali kakamwe toera kutsogolera basa yakumanga Nyumba ya Umambo pacisa. M’madziko anango, abale na alongo akuthema asaphembwa toera kutsogolera kumangwa na kusasanyirwa kwa Nyumba za Umambo mu cisa cinapaswa iwo. Maseze abale na alongo aluso asaperekeka toera kuphata basa ineyi, basa izinji isacitwa na abale na alongo a pa mpingo. Nzimu wa Yahova pabodzi na kuwangisira konsene kwa mbumba yace kusacitisa kuti pyonsene pikhale pyakukwanisika.—Masalmo 127:1; Akolose 3:23.

• Thangwi yanji mbuto zathu za ulambiri zisacemerwa Nyumba za Umambo?

• Pisakwanisika tani kumanga Nyumba za Umambo mu dziko yonsene yapantsi?