Anthu azinji asalimira kucita khundu m’mabasa a marelijiau thangwi nee asagumana citsogolero peno cibalangazo cauzimu. Mphapo, thangwi yanji musafunika kugumanika pa misonkhano Yacikristu yakukhunganywa na Mboni za Yahova? Munadzaonanji kweneko?

Munadzatsandzaya kukhala pakati pa anthu aufuni na acitsalakano. Mu pyaka dzana yakutoma, Akristu akhali ninga misoka ya m’mipingo na akhacita misonkhano toera kulambira Mulungu, pontho toera kupfundza Malemba, na kuwangisana unango na ndzace. (Ahebere 10:24, 25) Mukhagumanyikana iwo m’makhaliro aufuni, akhapibva kuti akhali pakati pa axamwali andimomwene—abale na alongo awo auzimu. (2 Atesalonika 1:3; 3 Jwau 14) Tisatoweza citsandzo ca Akristu a pyaka dzana yakutoma, pontho tisakhala na kutsandzaya kubodzi kwene.

Maphindu akupfundza kuti tinaphatisira tani midida ya Bhibhlya. Ninga pikhacitwa m’midzidzi ya Bhibhlya, amuna, akazi na anapiana onsene akhagumanyikana pabodzi pene. Apfundzisi akuthema asaphatisira Bhibhlya toera kutiphedza kudzindikira kuti tinaphatisira tani midida ya Bhibhlya mu umaso wathu wa ntsiku na ntsiku. (Deuteronomyo 31:12; Nehemiya 8:8) Onsene anakwanisa kucita khundu mu nkhani zakucedza na kuimba, pyenepi pisaticitisa kupangiza cidikhiro cathu Cacikristu.—Ahebere 10:23.

Nkhombo zakuwangiswa cikhulupiro canu na Mulungu. Mpostolo Paulu alonga kuna mpingo ubodzi wa mu ntsiku zace: ‘Ndisafunambo kakamwe kudzakuonani, toera tiwangisane unango na ndzace na cikhulupiro canu na canga.’ (Aroma 1:11, 12) Pa misonkhano ya mpingo, kugumanyikana kwathu mwakukhonda phonya na anyakukhulupira andzathu kusawangisa cikhulupiro cathu na kutonga kwathu toera kukhala maso mwakubverana na midida ya Bhibhlya.

Thangwi yanji nkhabe kutawira ncemerero toera kugumanika pa nsonkhano wathu wa mpingo unafuna kudza, mbamuona mwekhene pinthu pyenepi? Imwe munadzatambirwa na ntima onsene. Pa misonkhano yathu yonsene nkhabe kulipwa kobiri, pontho nkhabe kucitwa nsonkhonsonkho.

• Ndi citsandzo cipi cinatowezerwa pa misonkhano yathu ya mpingo?

• Tinaphindula tani mu kugumanika pa misonkhano Yacikristu?

Ngakhale njira yathu isagwanda na mu nsitu wakupata peno makhaliro akudambo ndi akunentsa kakamwe, mwakukhonda phonya tisagumanika pa misonkhano yathu Yacikristu. Mwakukhonda tsalakana pinentso mu umaso peno kuneta pakumala kuphata basa, thangwi yanji Mboni za Yahova zisawangisira toera kugumanyikana na anyakukhulupira andzawo?

Ndi kwadidi toera tikhale mwadidi. Paulu alemba kwa ale anagumanyikana na ife m’misonkhano ya mpingo kuti “tinyerezerane unango na ndzace.” (Ahebere 10:24) Mafala anewa asabveka “kunyerezera cinthu mwacidikhodikho,” peno kudziwana unango na ndzace. Mafala a Paulu asatiwangisa toera kudzudzumika thangwi ya anango. Mu kusaka kudziwa mabanja anango Acikristu, tinadzadzindikira kuti anango mwa iwo apembera pakuthimbana na pinentso pyakulandana na pyathu, pontho iwo anadzatiphedza kupemberambo pinentso pyathu.

Kusawangisa uxamwali wathu. M’misonkhano yathu, tisagumanyikana pabodzi, tayu toera kudziwana basi, mbwenye ninga nsoka wa axamwali apantima. M’midzidzi inango, tisagumanyikana toera kucita masendzekero akuwangisa. Kugumanyikana kweneku kusatiphindulisa tani? Tisapfundza kulemedzana unango na ndzace, pyenepi pisawangisa ufuni wathu. Natenepa, pa ndzidzi wakuti abale na alongo athu akuthimbana na nyatwa, mwakufunisisa tisaaphedza thangwi takhazikisa kale uxamwali wakuwanga. (Misangani 17:17) Kusonkhana kwathu na abale na alongo pa mpingo wathu, kusapangiza citsalakano cathu ‘kwa unango na ndzace.’—1 Akorinto 12:25, 26.

Tisakuwangisani toera musankhule ninga axamwali anu ale anacita cifuno ca Mulungu. Munagumana axamwali anewa pakati pa Mboni za Yahova. Taphata miyendo, lekani kutawirisa cinthu consene kukulimirisani kugumanyikana na ife.

• Thangwi yanji ndi kwakuphindulisa kwa ife kugumanyikana pabodzi pa misonkhano ya mpingo?

• Ndi ntsiku ipi inafuna imwe kudziwa mpingo wathu?

Misonkhano Yacikristu yakale ikhaphataniza makamaka kuimba nyimbo, kuphembera, kuleri na kudinga Malemba, nee kukhacitwa maserimonya. (1 Akorinto 14:26) Munakwanisa kuona pinthu pibodzi pyene pa misonkhano yathu ya mpingo.

Pipfundziso pisabuluswa m’Bhibhlya, pontho ndi pyakuphindulisa. N’Sabudu peno n’Dimingu, mpingo ubodzi na ubodzi usagumanyikana toera kubvesera nkhani ya Bhibhlya ya mphindi 30 inapangiza kuti Malemba asabveranisa tani umaso wathu na ndzidzi unakhala ife. Tonsene tisawangiswa kutowezera pabodzi m’Bhibhlya yathu kulerwi kwa malemba. Pakumala kwa nkhani, pasacitwa Pfundziro ya “Ncenjezi,” ya ndzidzi ubodzi. Onsene m’mpingo asawangiswa toera kutawira pakudinga nsolo wa Ncenjezi wa pfundziro. Pfundziro ineyi isatiphedza kuphatisira citsogolero ca Bhibhlya mu umaso wathu. Mphangwa zibodzi zene zisapfundzwa m’mipingo yonsene yakupiringana 110.000 pa dziko yonsene.

Tisaphedzwa toerakuthimiziramaluso athuakupfundzisa. Tisagumanyikanambo pabodzi pene pakati pa sumana toera kucita nsonkhano unacemerwa, Umaso Wathu Wacikristu na Utumiki, mphangwa zinapfundzwa pa nsonkhano unoyu zisabuluswa mu Programu ya Misonkhano ya Umaso Wathu Wacikristu inatambira ife miyezi yonsene. Nsonkhano unoyu usagawiwa mu makhundu matatu. Khundu ya kutoma ndi Mpfuma za Mafala a Mulungu yakuti isatiphedza toera kubvesesa mavesi a m’Bhibhlya akuti abale aaleri kale kunyumba. Khundu yaciwiri ndi Pfundzisani Mwaluso Pakumwaza Mphangwa. Pa khundu ineyi pasacitwa pitsandzo pyakuti pisatiphedza kuti tinalonga tani na anthu pakumwaza mphangwa. Buluka penepo, m’bale anatsogolera asapereka maonero akuti tinakhala tani anyakuleri adidi na apfundzisi adidi. (1 Timoti 4:13) Khundu yakumalisa Kukhala Maso Ninga Akristu, isatiphedza kuona kuti tinaphatisira tani pinalonga Bhibhlya mu umaso wathu. Iwo isaphataniza mibvundzo na matawiro akuti asatiphedza kubvesesa Bhibhlya.

Mungagumanika pa misonkhano yathu ya mpingo, mwakukhonda penula imwe munadzakhuyiwa na cipfundziso cadidi ca Bhibhlya cinafuna kudzatambira imwe.—Izaiya 54:13.

• Musadikhira kubveseranji pa misonkhano ya mpingo ya Mboni za Yahova?

• Ndi nsonkhano upi wa Mboni za Yahova unafuna imwe kugumanika?