Kupereka Umboni Mwakukwana Kusabweresa Maphindu—Mphangwa izi zabuluswa mu Anuário das Testemunhas de Jeová de 2015
Amerika
Anapiana aumphawi asagumanika pa misonkhano
Tsamba 54, ndima 1
Angela, wa ku Suriname, aenda kamwaza mphangwa pa mbuto inatsalakanwa anapiana aumphawi cifupi na panyumba pace. Mwanaciro mbuto ineyi akhali mulongo wakufewa mwauzimu, mwakukhonda nyinyirika atawirisa Angela kumwazira mphangwa anapiana. Angela acedza na anapiana 85 mbaapangiza mavidyu anagumanika mu jw.org. Buluka penepo, iye atoma kupfundzisa Bhibhlya azinji a iwo. Natenepa apainiya awiri am’phedza, onsene akhali na nsoka wace wace.
Mulongo wakufewa mwauzimu alonga kuti akhapfundzisa anapiana nyimbo mukuphatisira ibodzi mwa mabukhu athu a nyimbo, pontho na masiku akhaleri mbiri za Bhibhlya kuna iwo. Iye alonga kuti akhafuna kuenda ku misonkhano, mbwenye nee mbadakwanisa kusiya anapiana 85 okhene. Natenepa, masasanyiro acitwa toera anapiana onsene agumanike ku Nyumba ya Umambo. Nakuti mbuto inatsalakanwa anapiana aumphawi ikhali cifupi na Nyumba ya Umambo, abale acita masasanyiro toera kuakwata onsene kuti agumanike ku Nyumba ya Umambo. Cincino mulongo na anapiana onsene 85 asagumanika pa misonkhano mwakukhonda phonya.
Brazil
“Kundicedzera Kwanu Nee Kukhali Kwasusudeu”
Tsamba 56 ndima 2, mpaka tsamba 57, ndima 1
Jennifer wa ku Brazil, mukhagawira iye tratado Anyakufa Anakwanisadi Khala Pontho Maso? agogoda nsuwo wa nkazi unango wakuti akhacimbiza toera kuenda ku ciliro ca xamwali wace wakufunika. Jennifer ampanga kuti, mwasusudeu iye akhafuna kumpasa tratado yakuti isalonga pya cidikhiro ca kudzaona papswa anyakufunika athu adafa. Nkazi unoyu anyinyirika pang’ono thangwi ya nsolo wa tratado, mbwenye adzaitambira. Mudam’bvundzisa mulongo khala anakwanisa kukwata matratado anango toera kuenda kapasa banja idaferwa na wacibale wawo, iye atawira kuti anewa akhali maonero adidi, natenepa aphemba matratado mapfemba.
Pakupita ntsiku zakucepa, Jennifer acita ulendo wakubwereza, nkazi mbalonga: “Ntsiku yakutoma idagumanikana ife, nduli mwanu ndadzindikira kuti kundicedzera kwanu nee kukhali kwasusudeu. Mulungu ndiye adakutumani na mphangwa za cibalangazo zakuti ndikhazifuna kakamwe.” Nkazi unoyu agawira matratado onsene adapaswa iye. Mamuna adacita nkhani ya ciliro, aleri tratado yonsene mwakugaluza. Anthu onsene apereka takhuta kuna nkazi thangwi ya kubweresa mphangwa za cibalangazo. Buluka penepo nkazi atawira pfundziro ya Bhibhlya.