Kupereka Umboni Mwakukwana Kusabweresa Maphindu​—Mphangwa izi zabuluswa mu Anuário das Testemunhas de Jeová de 2015

Filipina

“Kutumiza Mphangwa Mu Ndzidzi Wa Kubvumba”

Tsamba 63, ndima 2 mpaka tsamba 64, ndima 1

Greg na Alma afuluka mbaenda kakhala pa ntsuwa ya Catanduanes mu dziko ya Filipina toera kutumikira ku mbuto yakuti iri na kufuna kukulu kwa amwazi mphangwa. Nakuti kweneko kuna mapiri, Greg na Alma asafamba makilometru akukwana 19 toera kugumana anthu mu pisa pyawo. M’midzidzi inango, asafamba nsindzo wa midzidzi miwiri mukuphatisira mwadiya toera kamwaza mphangwa mu ntsuwa zinango. Madzi angabvumba, pisakhala pyakunentsa kwa iwo kucita maulendo anewa. M’mbuto mwakukhala kwene, iwo asatumiza mphangwa mukuphatisira ntokodzi thangwi makompanyia a mitokodzi asapereka mwai wa kutumizirana mphangwa pa ntengo wakucepa.

Greg alonga kuti pakulemba mphangwa, asatoma kulemba dzinace. Iye asapitiriza: “Ndisafuna kucedza na imwe mphangwa za m’Bhibhlya.” Ibodzi mwa malemba anaona iye kuti ndi akuphata ntima ndi Jwau 17:3. Angamala kuilemba, asacita mibvundzo miwiri: Mbani Mulungu wandimomwene? na Mbani Yezu Kristu? Buluka penepo asaphemba ntawiro wa munthu unoyu. Angatawira, Greg asatumiza lemba inango, ninga Masalmo 83:18. Khala munthu asapitiriza kutawira mphangwa zace, iye asambvundza khala asafuna kupitiriza kucedza mukuphatisira ntokodzi. Greg na Alma alonga kuti azinji asatawira.

Nkazi m’bodzi wakuti Greg na Alma akhatumizirana naye mphangwa akhali na mibvundzo mizinji thangwi ya Bhibhlya, natenepa atumizirana mphangwa zizinji. Kutumizirana kweneku kwatsogolera ku pfundziro ya Bhibhlya. Nkazi unoyu akhapangambo ndzukulu wace na ndzace wa pabasa pikhapfundza iye. Ninga maphindu, utatu wawo onsene abatizwa.