Pyonsene Pyatoma Thangwi ya Kumwetulira

ATSIKANA awiri akhafamba pabodzi mu Nzinda wa Baguio, ku Filipina. Iwo aona mulongo akhamwaza mphangwa na karinya, mbwenye nee anfendedzera. Mulongo Helen wakuti akhamwaza mphangwa na karinya aamwetulira. Iwo apitiriza na ulendo wawo, mbwenye adzumatirwa na njira idaamwetulira mulongo Helen.

Pikhabwerera iwo kunyumba kwawo na maxibhombo, iwo aona Nyumba ya Umambo yakuti ikhali na cidzindikiro ca jw.org. Pidaona iwo cidzindikiro ceneci ca jw.org akumbuka cidzindikiro cidaona iwo pa karinya ikhaphatisira mulongo Helen. Natenepa iwo atcitha m’maxibhombo mbaenda pa Nyumba ya Umambo ineyi. Pidafika iwo penepo aona ndandanda ya midzidzi inacitwa misonkhano.

Mukupita kwa ndzidzi, atsikana anewa aenda kumisonkhano. Iwo adzumatirwa kakamwe pidapita iwo mu Nyumba ya Umambo, thangwi aona mulongo Helen. Natenepa iwo andzindikira mwakukhonda dembuka thangwi ya kumwetulira kwace. Mulongo Helen alonga: “Pidaaona ine mbabwera kuna ine ndadzudzumika pang’ono thangwi ndikhanyerezera kuti ndacita cinthu cakuipa.” Mbwenye atsikana anewa apanga mulongo Helen kuti iwo akhadamuona kale ntsiku ikhamwaza iye mphangwa na karinya.

Atsikana anewa atsandzaya kakamwe na misonkhano, pontho na citsalakano cidapangiza abale na alongo. Pidaona iwo abale na alongo mbacenesa Nyumba ya Umambo pakumala kwa misonkhano, iwo aphembambo toera kuphedzera. Ntsikana m’bodzi nee asakhalabve mu dziko ya Filipina, mbwenye unango atoma kugumanika pa misonkhano, pontho atoma kupfundza Bhibhlya. Pyenepi pyonsene pyacitika thangwi ya kumwetulira.